މިއަހަރު ރާއްޖެއިން ޙައްޖަށްދިޔަ ޙައްޖާޖީން މާދަމާ އެނބުރި މާލެ އަންނަން ފަށާނެއެވެ.
އިސްލާމިކް މިނިސްޓްރީން ވިދާޅުވީ މާދަމާ އެންމެ ފުރަތަމަ ރާއްޖެ އައުމަށް ހަމަޖެހިފައިވަނީ ތަޒްކިޔާ ޕްރައިވެޓް ލިމިޓެޑްގެ ހަވާލުގައި ޙައްޖަށް ދިޔަ ސާޅިސް ހަތަރު ޙާޖީންކަމަށެވެ. އަދި އެމީހުން މާދަމާ ހެނދުނު ސަޢުދީ ޢަރަބިއްޔާ ގަޑިން ހަގަޑި ސާޅީސް ފަހެއްގައި ރާއްޖެއައުމަށް ފުރާނެކަމަށް އިސްކާމިކް މިނިސްޓްރީން މަޢޫލޫމާތުދެއްވައެވެ.
އަދި މިމަހުގެ އަށާވީސްވަނަ ދުވަހު ޙައްޖު ކޯޕަރޭޝަންގެ ޙަވާލުގައި ހައްޖަށްދިޔަ ހައްޖުވެރިން މާލެއަންނަންފަށާނެއެވެ. މިގޮތުން ޙައްޖު ކޯޕަރޭޝަންގެ ޙަވާލުގައި ޙައްޖަށްދިޔަ ޙާޖީންގެ ތެރެއިން ތިން ސަތޭކަ ބައްތިރީސް ޙާއްޖީން އަށާވީސްވަނަ ދުވަހުގެރޭ ސަޢުދީގަޑީން ބާރަގަޑި ފަންސަވީހުގެ ފްލައިޓުން ރާއްޖެ އައުމަށް ފުރާނެއެވެ.
މިއަހަރު ރާއްޖެއިން ޙައްޖަށް މީހުންގެ ގެންދިޔަ ޖަމާޢަތްތަކުގެ ތެރެއިން އެންމެ ފަހުން މާލެއައުމަށް ހަމަޖެހިފައިވަނީވެސް ހައްޖު ކޯޕަރޭޝަންގެ ޙަވާލުގައި ޙާއްޖަށް ދިޔަ ޙާޖީންނެވެ. އެގުރޫޕުގެ ޙަވާލުގައި ހައްޖަށްދިޔަ ދުއިސައްތަ ފަސްދޮޅަސް ތިން ޙާޖީން މާލެއައުމަށް ހަމަޖެހިފައިވަނީ މިމަހުގެ އެއްތިރީސްވަނަ ދުވަހުއެވެ.
މިއަހަރު ރާއްޖެއިން މީހުން ޙައްޖަށް ގެންދިޔުމަށްޓަކައި ހަ ޖަމާޢަތަކަށް ހުއްދަދިންއިރު ދެހާސް މީހުން ޙައްޖުގެ މަތިވެރިއަޅުކަން އަދާކުރިއެވެ. އެހެން އަހަރުތަކާ ޚިލާފާށް މިއަހަރު ހައްޖުވެރިންގެ ޢާއްމު ޙާލަތު ރަނގަޅެވެ. ކޮންމެ އަހަރެއްގެ ހައްޖު މޫސުން ނިމި ޙައްޖާޖީން މާލެ އަންނަ ދުވަސްވަރަކީ އެކިކަހަލަ ބަލި މަޑުކަމާ ކުރިމަތިވާ ދުވަސްވަރެކެވެ.
އެހެންކަމުން ޙައްޖުން އަންނައިރު އަރިދަފުސް ރޯގާ ޖެހިފައިވާނަމަ ކެއްސައި ކިނބިހިއަޅާއިރު އަނގަމައްޗާއި ނޭފަތް ކުޑަރުމާލެއް ނުވަތަ ޓިޝޫއެއްފަދަ އެއްޗަކުން ނިވާކުރުމަށް އެޗްޕީއޭއިން އިލްތިމާސް ކުރައްވައެވެ. އަދި ބޭނުންކުރާ މާސްކާއި ޓީޝޫފަދަތަކެތި ހާމަ ތަންތަނަށް އެއްލާލުމަކީ ރޯގާއާއި ބަލި ފެތުރުމަށް މަގުފަހިވެދާނެ ކަމެއްކަމުން އެކަމަށް ސަމާލުވެ އެފަދަ ތަކެތި ރައްކާތެރިކަމާއެކު ނައްތާލުން މުހިންމުކަމަށް އެޗްޕީއޭއިން ފާހަގަކުރައްވައެވެ.
އަދި ރޯގާޖެހި ކެއްސާނަމަ މީހުންއުޅޭ ތަންތަނަށް ނުދިޔުމާއި ހުމާއި އަރިދަފުސް ރޯގާ ޖެހިއްޖެނަމަ، ގިނައިން ދިޔާތަކެތި ބޭނުންކުރުމަށާ، އަރާމުކުރުން މުހިންމެވެ.