ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމުގެ ސިޔާސީ އިސްލާޙީ ހަރަކާތް، މޯލްޑިވްސް ރިފޯމް މޫވްމަންޓް (އެމްއާރުއެމް) ރަޖިސްޓްރީ ކުރުމަށް މިމަހުގެ 20ވަނަ ދުވަހު އިލެކްޝަންސް ކޮމިޝަނަށް ހުށަހެޅުމަށް ނިންމާފައިވާކަމުގައި އެމްއާރުއެމްއިން ވިދާޅުވެއްޖެއެވެ.
އެ ޙަރަކާރުގައި އިސްކޮށް ހަރަކާތްތެރިވެވަޑައިގަންނަވާ ޢަބްދުލްއަލީމް ވިދާޅުވީ އިލެކްޝަން ކޮމިޝަންގައި އެމްއާރުއެމް ސިޔާސީ ޕާޓީއެއްގެ ގޮތުގައި ރަޖިސްޓްރީ ކުރުމަށް ބޭނުންވާ 3000 މީހުންގެ ސޮއި މިހާރު ލިބިފައިވާކަމަށެވެ. މިހާރު ކުރަމުންދަނީ ފޯމުތައް ޗެކުކޮށް އިލެކްޝަނަށް ހުށަހެޅުމުގެ މަސައްކަތް ކަމަށާ، ޢީދު ބަންދަށްފަހު މިމަހުގެ 20 ވަނަ ދުވަހު އިލެކްޝަނަށް ފޯމްތައް ހުށަހެޅުމަށް ނިންމާފައިވާކަމުގައި އަލީމް ވިދާޅުވިއެވެ.
އަދި މިމަސައްކަތް ކާމިޔާބު ކަމާއެކު ކުރެވިފައިވަނީ ވަރަށް ގިނަބައެއްގެ އެހީތެރިކަމާ އެކުގައިކަމަށްވުމުން އެންމެހައި ފަރާތްތަކަށް ރައީސް މައުމޫން ވަރަށް ޚާއްސަ ޝުކުރެއް އަދާކުރައްވާ ކަމުގައި އޭނާ ވިދާޅުވިއެވެ. އެމްއާރުއެމް އުފެއްދުމުގެ ހުއްދަ އިލެކްޝަން ކޮމިޝަނުން ދީފައިވަނީ މިއަހަރުގެ ފެބްރުއަރީ މަހުގެ ފުރަތަމަ ދުވަހުއެވެ.
އެމްއާރްއެމްއަކީ ރައީސް އަލްއުސްތާޛު މައުމޫން ޢަބްދުލްޤައްޔޫމް އިސްވެ ހުންނަވައިގެން އުފައްދާ ތިންވަނަ ސިޔާސީ ޕާޓީއެވެ. އެންމެ ފުރަތަމަ އެމަނިކުފާނު އުފެއްދެވީ ދިވެހި ރައްޔިތުންގެ ޕާޓީ، ޑީއާރުޕީއެވެ. އެއަށް ފަހު ފާއިތުވެދިޔަ 5 އަހަރުދުވަހު ރާއްޖޭގެ ވެރިކަންކުރި ޕާޓީ ޕްރެގެރެސިވް ޕާޓީ އޮފް މޯލްޑިވްސް، ޕީޕީއެމް އުފެއްދެވީވެސް އެމަނިކުފާނު އިސްކޮށް ހުންނަވައިގެންކަން ފާހަގަކޮށްލެވެއެވެ. މައުމޫން ރިފޯމް މޫވްމަންޓްގެ ނަމުގައި ހަމަރަކާތްތެރިވާ އެމްއާރުއެމްއަކީ ސަރުކާރު ކޯލިޝަންގައި ހިމެނޭ ފަރާތެކެވެ.