މެދު ރާއްޖެތެރޭގެ 3 އަތޮޅަކަށް ފެރީގެ ޚިދުމަތް ދިނުމަށް އެމްޓީސީސީން ތައްޔާރުވެއްޖެއެވެ. އެމްޓިސީސީން ވިދާޅުވީ ޓްރާންސްޕޯޓް މިނިސްޓްރީގެ އެދުމަކަށް މ،ފ،ދ މިތިން އަތޮޅަށް ފޭރީގެ ޚިދުމަތް ދިނުމަށް ވާންޖެހޭ ތައްރާރީތައް ވަމުން އަންނަކަމަށެވެ.
މެދުރާއްޖެތެރޭގެ މ،ފ،ދ، މިތިން އަތޮޅަށް މީގެކުރިން ފެރީގެ ޚިދުމަތް ދެމުންދިޔައީ ވާމިލިއަން ކިޔާ އަމިއްލަ ކުންފުންޏަކުންނެވެ. އެކުންފުނިން ދެމުންދިޔަ ޚިދުމަތް ހުއްޓާލާފައިވާތީވެ އަތޮޅުގެ ރައްޔިތުންނަށް އެކިކަހަލަ ދަތިތަކާ ކުރިމަތިލާން ވަނީ ޖެހިފައެވެ.
އެމްޓީސީސީގެ ޓްރާންސްޕޯޓު ޑިޕާޓްމެންޓުންދޭ ޚިދުމަތްތަކާ ގުޅޭގޮތުން ނޫސްވެރިންނަށް މަޢުލޫމާތު ދިނުމަށްބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އެކުންފުނީގެ ސީއީއޯ ހަސަން ޝާހު ވިދާޅުވީ މިއަތޮޅުތަކަށް ފެރީގެ ޚިދުމަތް ދިނުމާ ގުޅޭގޮތުން ޓްރާންސްޕޯޓު މިނިސްޓްރީން އެ ކުންފުންޏާއެކު މަޝްވަރާ ކޮށްފައިވާކަމަށެވެ. މިގޮތުން މިހާރުވެސް ޚިދުމަތް ދިނުމަށް ތައްޔާރަށް އޮތްކަމަށާ، މިކަމަށް ހިނގާނެ ޚަރަދުގެ ތަފްސީލްވެސް މިނިސްޓްރީއާ ޙިއްސާކޮށްފައިވާކަމަށެވެ. އަދި ޓްރާންސްޕޯޓް މިނިސްޓްރީން އެޚިދުމަތް ފަށަން އެންގި އެންމެ އަވަހަކަށް ފަށާނެކަމަށް ޝާޙް ވިދާޅުވިއެވެ.
އެމްޓީސީސީން ދެމުން ގެންދާ ދަތުރުފަތުރުގެ ނިޒާމު މެދުވެރިކޮށް މިދިޔަ އަހަރު 15 މިލިއަން މީހުން އުފުލާދެވިފައިވާ ކަމަށް އެ ކުންފުނިން ވިދާޅުވެއެވެ. އެކުންފުނީގެ ޗީފް އޮޕަރޭޓިން އޮފިސަރު ޝާހިދު ހުސެއިން ވިދާޅުވީ، އެކުންފުނީގެ ތަފާސްހިސާބުތަކުން ދައްކާ ގޮތުގައި އެންމެ ގިނައިން ފެރީގެ ޚިދުމަތް ބޭނުން ކުރަނީ ވިލިނގިލި ދާއިރާއަށް ކަމަށާ، އެދާއިރާ އިން ގާތްގަނޑަކަށް 15000 އާއި 16000 އާދެމެދުގެ ފަސެންޖަރުން ދުވާލަކަށް ދަތުރުކުރަމުންދާ ކަމަށެވެ. މިގޮތުން ދަތުރުފަތުރު ތަކުގެ ޢާންމުދަނީއަށް މިދިޔަ އަހަރު 137 މިލިއަން ރުފިޔާ ލިބުނު ކަމަށާއި މިއަހަރުގެ މިހާތަނަށް 50 މިލިއަން ރުފިޔާ ލިބިފައިވާ ކަމަށެވެ.
އެމްޓީސީސީން ބުނީ ބްރިޖް ހުޅުވުމުގެ ކުރިން ހުޅުމާލެއަށް ކުރާ ފެރީތަކުގައި ދުވާލަކަށް 20000 ފަސެންޖަރުން ދަތުރުކުރާ ކަމަށެވެ. ނަމަވެސް ބްރިޖް ހުޅުވުމުން އެޢަދަދު މިހާރު ވަނީ 4000 އާއި 5000އާ ދެމެދުގެ ޢަދަދަކަށް ދަށްވެފައިކަމަށްވެސް އެމްޓީސީސިން ވިދާޅުވެއެވެ.
އެމްޓީސީސީން 169 ރަށަކަށް ދަތުރުފަތުރުގެ ޚިދުމަތް ދެމުންގެންދެއެވެ.