ކަނޑުވެށީގެ ދިރުންތައް ހިމާޔަތްކުރުމަށް ހަރުދަނާ އުޞޫލުތަކެއް އެކުލަވާލާނަން - މިނިސްޓަރ ޒަހާ
ރާއްޖޭގެ ކަނޑުވެށީގެ ދިރުންތައް ހިމާޔަތްކޮށް، ދެމެހެއްޓެނިވިގޮތެއްގައި ބޭނުންކުރުމުގެ ސިޔާސަތުތައް މިހާރަށްވުރެ ހަރުދަނާކުރައްވާނެކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު ވިދާޅުވެއްޖެއެވެ.
ދުނިޔޭގެ ކަނޑުތަކުގެ ދުވަސް ފާހަގަކުރުމަށް ބޭއްވި ޙާއްސަ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ޒަހާ ވަޙީދު ވިދާޅުވީ، ކަނޑުވެށީގެ ނުސާފުކަމާއި، ގޮނޑުވުމަކީ ރާއްޖޭގެ ކަނޑުގެ ދިރުންތަކަށް އޮތް ބޮޑު ނުރައްކަލެއްކަމަށެވެ. އަދި ވަކިން ޙާއްސަކޮށް ކަނޑަށް އުކާލެވޭ ޕްލާސްޓިކުގެ ސަބަބުން ކަނޑުގެ ދިރުންތަކަށާއި އިންސާނީ ދަރިފަސްކޮޅަށް އޮތް ނުރައްކާ ރާއްޖޭގައިވެސް އިތުރުވެފައިވާކަން މިނިސްޓަރ ފާހަގަކުރެއްވިއެވެ. މިނިސްޓަރ ޒަހާ ވިދާޅުވީ، ކަނޑަށް ޕްލާސްޓިކި އެޅުމަކީ ވިހަ މާއްދާއެއް ކަނޑަށް ދޫކޮށްލުންފަދަ ކަމެއްކަމަށާއި، އެކަމުގެ ނުރައްކާ ކޮންމެ މީހަކުވެސް ތަޞައްވުރުކޮށްލުން މުހިއްމުކަމަށެވެ.
ކަނޑުފަޅުގެ ދިރުންތައް ހިމާޔަތް ކުރުމުގެ މުހިއްމުކަން ފާހަގަކުރައްވާ މިނިސްޓަރ ޒަހާ ވިދާޅުވީ، ކަނޑަކީ ރާއްޖޭގެ ގުދުރަތީ މާހުލާއި، އިންސާނުންގެ ދިރިއުޅުމާއި ވަރަށްބޮޑަށް ގުޅިލާމެހިފައިވާ އެއްޗެއްކަމުން، ކަނޑާއި ކަނޑުގެ ވެއްޓަށް ގެއްލުންވާފަދަ ކަންކަމުން ދުރުވާންޖެހޭކަމަށެވެ. ހަމައެހެންމެ ކަނޑުވެށީގެ ދިރުންތައް ހިމާޔަތްކޮށް، ދެމެހެއްޓެނިވިގޮތެއްގައި ބޭނުންކުރުމުގެ ސިޔާސަތުތައް މިހާރަށްވުރެ ހަރުދަނާކުރައްވާނެކަމަށް މިނިސްޓަރ ވިދާޅުވިއެވެ.
"މަސްވެރިކަމާއި ކަނޑުގެ ދިރުންތަކާއި ދަނޑުވެރިކަމާއި ބެހޭ ދާއިރާގެ ފަރާތުން މިރޭ މި ވަޢުދުވަނީ ކަނޑުވެށީގެ ދިރުންތައް ދެމެހެއްޓެނިވިގޮތެއްގައި ބޭނުންކުރުމުގެ ސިޔާސަތުތައް އިތުރަށް ހަރުދަނާކުރުމަށާއި، ކަނޑުވެށްޓާއި، ކަނޑުވެށީގެ ދިރުންތައް ރައްކާތެރިކަމާއެކު ކުރިމަގުގެ ޖީލުތަކަށް އަމާނަތްތެރިކަމާއެކު ފޯރުކޯށްދިނުމަށް އެއްބާރުލުންދީ އެ މަސައްކަތް ކުރުމަށް.." މިނިސްޓަރ ވިދާޅުވިއެވެ.
ދުނިޔޭގެ ކަނޑުތަކުގެ ދުވަސް ފާހަގަކުރުމަށް ބޭއްވި ޙާއްސަ ރަސްމިއްޔާތުގައި މަސްވެރި އުޅަނދުތަކުން ކަނޑުތަކަށް ޕްލާސްޓިކް އުކާނުލާނެކަމަށް ވަޢުދުވެ، އެކަމުގެ ލިޔުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ އަތްޕުޅަށްވަނީ އަރުވާފައެވެ.
ފިޝަރީޒް މިނިސްޓަރ ޒަހާ ވަނީ މިއީ އެ މިނިސްޓްރީން ވަރަށް ތަރުޙީބުދޭ އަދި ހިތްވަރުދޭ ކަމެއްކަން ފާހަގަކުރައްވާ، މަސްވެރިންވީ ވަޢުދުގައި ދެމިތިބޭނެކަމަށް އުއްމީދުކުރައްވާކަމަށް ވިދާޅުވެފައެވެ. އަދި ކަނޑުތަކުގެ ދިރުންތައް ހިމާޔަތްކުރުމަށް ކުރެވޭ މަސައްކަތުގައި ސަރުކާރު މުއައްސަސާތަކުގެ އިތުރުން، ވިޔަފާރި ކުންފުނިތަކާއި، ސްކޫލް ދަރިވަރުންގެ ބައިވެރިވުން މިހާރަށްވުރެ ބޮޑަށް ލިބިގެންދާނެކަމަށް އުއްމީދުކުރައްވާކަމަށްވެސް ވިދާޅުވިއެވެ.