މިއަހަރުގެ ރަމަޟާންމަހުގެ ފުރަތަމަ ދުވަހަކީ މިހިނގާ މެއި މަހުގެ 6 ވާ ހޯމަ ދުވަސް ކަމަށާއި މާދަމާއަކީ ޝައުބާންމަހުގެ 30ވަނަ ދުވަސްކަމަށް ކަނޑައަޅައި މިނިސްޓްރީ އޮފް އިސްލާމިކް އެފެއާޒުން އެކަން ހާމަކުރައްވައިފިއެވެ.
ހަނދު ސާބިތު ކުރުމަށް ބޭއްވި ރަސްމިއްޔާތުގައިވަނީ އިސްލާމިކް މިނިސްޓަރު ޑރ.އަޙްމަދު ޒާހިރުގެ ޤަރާރު އިއްވާފައެވެ. ޤަރާރު އިއްވަވައިދެއްވީ އެމިނިސްޓްރީގެ ސްޓޭޓް މިނިސްޓަރ އައްޝައިޚް އިލްޔާސް ޖަމާލެވެ. ޤަރާރުގައި އިސްލާމިކް މިނިސްޓަރުވަނީ ހޯމަދުވަހު ފެށޭ މިއަހަރުގެ ބަރަކާތްތެރި ރަމަޟާންމަހުގެ ދަރުމަޔާއި ސަވާބު ހޯދުމަށް ގަދައަޅައި މަސައްކަތް ކުރުމަށް ދިވެހި ރައްޔިތުންނަށް ނަޞޭހަތްތެރިވެ ވަޑައިގެންފައެވެ.
މިއަހަރުގެ ރަމަޟާން މަހުގެ ހަނދު ބެލުމަށް އިސްލާމިކް މިނިސްޓްރީން ވަނީ ޚާއްސަ ޙަރަކާތްތަކެއް ކުރިއަށްގެންގޮސްފައެވެ. އެހެންނަމަވެސް ރާއްޖޭގެ އެއްވެރަށަކަށް ހަނދު ފެނިފައެއްނުވެއެވެ.
ފަލަކީ ހިސާބުން ދައްކާ ގޮތުގައި، މާލެއަށް މިއަދުގެ އިރު އޮއްސުމުގެ 20 މިނެޓް ކުރިން ހަނދު އޮއްސޭނެ އެވެ. އަދި ރާއްޖޭގެ އެންމެ ދެކުނަށް މިއަދުގެ އިރު އޮއްސުމުގެ 17 މިނެޓް ކުރިން ހަނދު އޮއްސޭނެ އެވެ. ރާއްޖޭގެ އެންމެ އުތުރަށް، މިއަދުގެ އިރު އޮއްސުމުގެ ގާތްގަނޑަކަށް 20 މިނެޓް ކުރިން ހަނދު އޮއްސޭނެއެވެ.
އިސްލާމީ އެހެން ޤައުމުތަކަށް ބަލާއިރު، އިންޑޮނީޝިޔާ، ސެނެގޯލް، ތުރުކީ، ސަޢޫދީ ޢަރަބިއްޔާ، މިޞްރު މިހުރިހާ ޤައުމަށްވެސް ރު އޮއްސުމުގެ މާކުރިން ހަނދު އޮއްސޭނެއެވެ. އެހެންކަމުން ފަލަކީހިސާބު ދައްކާގޮތުން، ރަމަޟާން މަހުގެ ފުރަތަމަ ދުވަހަކީ ހޯމަ ދުވަހެވެ. އަދި މާދަމާއަކީ ޝައުބާން މަހުގެ ފަހުދުވަހެވެ.