ޕީޕީއެމުން ދިއްގަރު ދާއިރާއަށް ނެރޭނީ ކޮން ކެންޑިޑޭޓެއް
ބާއްވައެވެ. ދިއްގަރުދާއިރާއަކީ ޕީޕީއެމަށް ތާއީދު ބޮޑު ދާއިރާއެކެވެ. ފެންނަ
ފެނުމަށް މިދާއިރާއަށް ޕީޕީއެމުން އާދައިގެ ކެންޑިޑޭޓެއް ނުނެރޭނެއެވެ. ޕީޕީއެމުން
ދިއްގަރު ދާއިރާއަށް ވާދަކުރާ ކެންޑިޑޭޓަކު ކުރިމަތިލުމަށް ހުޅުވާލާފައިވާ
ފުރުސަތު ބުރާސްފަތި ދުވަހު ހަމަވާއިރު އެޕަޓީގެ ވަފްދެއް އެދާއިރާއަށް
ޒިޔާރަތްކޮށް ރައްޔިތުންގެ ވިސްނުން ހުރިނެތްގޮތް ބަލާފައެވެ. ޕީޕީއެމްގެ ނާއިބް
ރައީސް އަބްދުއްރަހީމް ވިދާޅުވީ ޕާޓީން ރައްޔިތުންކުރެން އޮޅުން ފިލުވަން ބޭނުންވީ
ކެންޑިޑޭޓަކު ނެރުމުގައި ދާއިރާގެ ވިސްނުން ހުރިގޮތެކެވެ.
"އަޅުގަނޑުމެން ބަލަންބޭނުންވީ ރައްޔިތުން ބޭނުންވަނީ
އެދާއިރާގެ ބޭފުޅެއްތޯ ނުވަތަ މާލޭގެ ބޭފުޅެއްތޯ"
އޭނާ ވިދާޅުވީ ދިއްގަރު ދާއިރާގެ ރައްޔިތުންތިބީ
ޕީޕީއެމްގެތެރޭގައި އޮންނަ އުސޫލަކުން ހޮވޭ ކެންޑިޑޭޓަކަށް ތާއީދު ދިނުމަށެވެ.
ބުރާސްފަތި ދުވަހު މުއްދަތު ހަމަވާއިރު ރެއާއިހަމައަށް އެއްވެސް ބޭފުޅަކު
ޝައުގުވެރިކަން ފާޅުކޮށް ހުށަހަޅާފައެއް ނުވެއެވެ. މިއިން ދައްކައިދެނީ ޕީޕީއެމްގެ
ލީޑަރޝިޕްގެ ވިސްނުންފުޅު ކޮންމެވެސް ބޭފުޅަކަށް އަމާޒުވެފައިހުރުމެވެ.
ޣައްސާން މައުމޫން ބާއެވެ؟
ޣައްސާން މައުމޫން
ނުކުމެވަޑައިގަންނަވަން އުޅުއްވަނީ ނޫންބާވައެވެ. ޔޫތު މިނިސްޓްރީން ޣާއްސާން
ރައީސް އޮފީހަށް ބަދަލުކުރެއްވީ މިފަދަ ވިސްނުމެއްގެތެރެއިން ނޫންބާވައެވެ. ދިއްގަރުދާއިރާއަށް
ދަތުރުކުރެއްވި ޕީޕީއެމްގެ ޓީމްގެ މެމްބަރުންގެ މޫނުތަކުން ކޮންމެވެސް މަންޒަރެއް
ދައްކައެވެ. އެހެންނަމަވެސް އަބްދުއްރަހީމް ވިދާޅުވީ އެފަދަ އެއްވެސް
ޝައުގުވެރިކަމެއް ޣައްސާންގެ ފަރާތްޕުޅުން މިހާތަނަށް ފާޅުކޮށްފައިނުވާކަމަށެވެ.
ކުރިމަތިލެއްވުމާއި ނުލެއްވުން އެއީ އެބޭފުޅުންގެ އަމިއްލަފުޅުކަމެކެވެ. ރައީސް
މައުމޫންގެ އާއިލާއިން ސިޔާސީ މައިދާނަށް ނުކުތުމަށް މަސައްކަތްޕުޅުކުރެއްވީ
ޣައްސާން މައުމޫންއެވެ. 2009 ވަނަ އަހަރު ރައްޔިތުންގެ މަޖިލިސްގެ އިންތިޚާބުގައި
ތިމަރަފުށީ ދާއިރާއަށް ކުރިމަތިލައްވައި އޭނާއަށް ގޮނޑި ގެއްލިވަޑައިގަތީ
އެމްޑީޕީގެ ކެންޑިޑޭޓް މުހައްމަދު މުސްތަފާއާއި ވާދަކޮށް 52 ވޯޓުންނެވެ.
އިންތިޚާބުގެ ކެމްޕެއިންތެރޭގައި އޭނާގެ ކެމްޕެއިން ޓީމު ތިމަރަފުށްޓަށް
އެރިޔަނުދީ ވަރަށް ގިނަ ގޮންޖެހުންތަކާއި ކުރިމަތިލައްވަން ޖެހިވަޑައިގަތެވެ. 2011
ވަނަ އަހަރު އެމްޑީޕީގެ ސަޕޯޓަރުން އެންދެރިމާގެކައިރިއަށް އެއްވެ ހިގައިދިޔަ
ހަމަނުޖެހުންތަކެއްގައި ފުލުހުން އޭނާ ހައްޔަރުކޮށް ޕީޖީއަށް މައްސަލަ ފޮނުވިއެވެ.
ފުލުހުން އޭނާ ހައްޔަރުކުރީ ގާނޫން އަސާސީއާއި ޚިލާފަށްކަމަށް ފަހުން ކްރިމިނަލް
ކޯޓުން ނިންމާފައިވެއެވެ.
ޕީޕީއެމްގެ ރިޔާސީ ޕްރައިމަރީގައި ފާޅުގައި އޭނާވަނީ މިހާރުގެ
ރައީސް އަބްދުﷲ ޔާމީން އެންޑޯޒްކުރައްވާފައެވެ. އެކަން ހާމަކުރެއްވުމުގެގޮތުން
ވިދާޅުވެފައިވަނީ ޕްރައިމަރީގައި ވާދަކުރައްވާ ބޭފުޅުންނާ ރިޔާސީ ކެންޑިޑޭޓުންގެ ގޮތުގައި ތިއްބެވި
ބޭފުޅުން ބަލާއިރު ޔާމީނަށް ވުރެ ބޮޑަށް ރައީސް މައުމޫނަށް އިހުލާސްތެރިވާނެ
އިތުރު އެހެން ބޭފުޅެއް ނެތްކަމަށެވެ.
ރައީސް ޔާމީންގެ ސަރުކާރުގައި ޣައްސާންއާއި ހަވާލުކުރެއްވީ
ޔޫތު މިނިސްޓްރީގެ ޒިންމާއެކެވެ ޒުވާންޖީލެއް ބިނާކުރުމަކީ ރައީސް ޔާމީންގެ
ސަރުކާރުގެ އެންމެ މުހިއްމު އެއްސިޔާސަތެވެ. ޔޫތު މިނިސްޓްރީގެތެރޭގައި ހުންނެވި
ނަމަވެސް ޣާއްސާން އުޅުއްވަމުންގެންދެވީ ވަރަށް ލޯޕްރޮފައިލްކޮށެވެ. ސިޔާސީ
ހަރަކާތްތަކެއްގައި އެކްޓިވްކޮށް އުޅުއްވާތީއެއް ނުފެނެއެވެ. ފަހަރުގައި ސިޔާސީ
ކަންކަމުގައި ބައިވެރިވެވަޑައިގަންނަވަން ބޭނުންފުޅުނުވަނީކަމަށްވެސް ވެދާނެއެވެ.
ޕީޕީއެމްގެ ފުރަތަމަ ހަގީގީ ޓެސްޓް
އަބްދުއްރަހީމް ވިދާޅުވީ ދާއިރާއަށް ރައްޔިތުން ބޭނުންވަނީ
މާލޭގެ ބޭފުޅެއްތޯ ނުވަތަ ދާއިރާގެ ބޭފުޅެއްތޯ ބެލުން އެއީ ފަހަކައަށްއައިސް
ޕީޕީއެމުން އާއްމުކޮށް ކުރަމުން އަންނަ ކަމެއް ކަމަށެވެ. އެއީ ވަކި ބޭފުޅަކު
އެދާއިރާއަށް ނެރެން ޕީޕީއެމުން ވިސްނާފައި އޮވެގެން ކުރި ކަމެއްނޫންކަމަށެވެ.
މުއްދަތު ހަމަވާއިރު އެކަކަށްވުރެ ގިނަ ބޭފުޅުން ކުރިމަތިލައްވައިފިނަމަ
އެޕާޓީންދާނީ ޕްރައިމަރީއަކަށެވެ. ދިއްގަރު ދާއިރާގެ ގޮނޑިއަކީ ޕީޕީއެމަށް ވަރަށް
ޚާއްސަގޮނޑިއަކަށްވާނެއެވެ. ޕީޕީއެމްގެ ކެންޑިޑޭޓާއި ވާދަކުރަން އިދިކޮޅު
ޕާޓީތަކުން ގުޅިގެން ކެންޑިޑޭޓަކު ނެރުމަށް ވާހަކަދައްކަމުންދާކަމަށް އިވެއެވެ. ކައުންސިލްތަކެއްގެ
އެންމެފަހުން ބޭއްވުނު ފަސް ބައިއިލެކްޝަން
ވިދިވިދިގެން ޕީޕީއެމުން ކާމިޔާބުކޮށްފައިވީނަމަވެސް، ރައްޔިތުންގެ ތާއީދު
އޮތީ އިދިކޮޅު ފަރާތްތަކަށް އިދިކޮޅު ޕާޓީތަކުން ބުނަމުންދާއިރު މިއީ ރައީސް
ޔާމީންގެ ސަރުކާރަށް ހަގީގަތުގައި ކުރިމަތިވާނެ ސިޔާސީ ފުރަތަމަ ޓެސްޓެވެ.