އިސްލާމިކް މިނިސްޓްރީން އިންތިޒާމުކޮށްގެން ކުރިޔަށް ގެންދިޔަ "ދަރުމަ ކަމާކެމި" ޙަރަކާތުގައި ބެހެއްޓި ފަންޑު ފޮށިތަކަށް 835993.13 (އަށް ސަތޭކަ ތިރީސް ފަސް ހާސް ނުވަ ސަތޭކަ ނުވަދިހަ ތިން ރުފިޔާ ތޭރަ ލާރި) ލިބެއްޖެއެވެ.
ދެދުވަހުގެ މުއްދަތަކަށް ކުރިއަށް ގެންދިޔަ މިޙަރަކާތުގައި ބަހައްޓާފައިވާ މިސްކިތު ފަންޑަށް 709458.54 (ހަތް ސަތޭކަ ނުވަ ހާސް ހަތަރު ސަތޭކަ ފަންސާސް އަށް ރުފިޔާ ފަންސާސް ހަތަރު ލާރި) ވަނީ ލިބިފައެވެ. އަދި މި ފަންޑަށް ބޭރު ފައިސާގެގޮތުގައި 668.29 (ހަ ސަތޭކަ ފަސްދޮޅަސް އަށެއް ޕޮއިންޓް ދޭއް ނުވައެއް) ޑޮލަރުވަނީ ލިބިފައެވެ.
މީގެ އިތުރުން ދީނީ ފަންޑަށް 126534.59 (ސަތޭކަ ސައްބީސް ހާސް ފަސް ސަތޭކަ ތިރީސް ހަތަރު ރުފިޔާ ފަންސާސް ނުވަ ލާރި) ވަނީ ލިބިފައެވެ. އަދި ބޭރުފައިސާގެ ގޮތުގައި މިފަންޑަށް 276.77 (ދުއިސައްތަ ހަތްދިހަ ހައެއް ޕޮއިންޓް ހަތެއް ހަތެއް) ޑޮލަރު ލިބިފައިވާކަމަށް އިސްލާމިކް މިނިސްޓްރީން ވިދާޅުވެއެވެ.
މި ފަންޑަށް ބީއެމްއެލްގެ ރުފިޔާއާއި ޑޮލަރު އެކައުންޓް މެދުވެރިކޮށް ފައިސާ ޖަމާކުރުމުގެ ފުރުސަތު އަންނަ މަހުގެ 6ވަނަ ދުވަހާ ހަމަޔަށް ވަނީ ހުޅުވާލާފައެވެ. އަދި ދިރާގު ޕޭ އާއި އުރީދޫ އެމްފައިސާ މެދުވެރިކޮށްވެސް ފައިސާގެ އެހީ ފޯރުކޮށްދިނުމުގެ ފުރުސަތުވެސް އަންނަ މަހުގެ 6ގެ ނިޔަލަށް ހުޅުވާލާފައިވާކަމަށް އިސްލާމިކް މިނިސްޓްރީން ވިދާޅުވެއެވެ.
"ދަރުމަ ކަމާކެމި" ހަރަކާތަކީ މިސްކިތްތަކަށް އެހީވާން ބޭނުންވާ ފަރާތްތަކަށް އެފުރުޞަތު ހޯދައިދިނުމަށް އިސްލާމިކް މިނިސްޓްރީން ކުރިއަށްގެންދިޔަ ހަރަކާތެކެވެ. މިޙަރަކާތުގެ ތެރެއިން ޒަކާތް ބަލައިގަންނަ ގޮތާއި ޒަކާތުގެ ފައިސާ ޚަރަދުކުރާގޮތާއި ފާއިތުވި އަހަރު ޒަކާތުގެގޮތުގައި ފައިސާ ލިބުނު ޢަދަދުވަނީ ހާމަކޮށްފައެވެ. މީގެ އިތުރުން މިޙަރަކާތުގެ ތެރެއިން މުދަލުޒަކާތް ބަލައިގަތުމާއި، ޒަކާތާމެދު މީހުން ހޭލުންތެރިކުރުމުގެ މަސައްކަތްވެސް ކޮށްފައިވާކަމަށް އިސްލާމިކް މިނިސްޓްރީން ވިދާޅުވެއެވެ.
އިސްލާމިކް މިނިސްޓްރީން ކުރިއަށްގެންދިޔަ މިޙަރަކާތުގައި މިސްކިތްތައް ޢިމާރާތްކުރުމަށް ބޭނުންވާ ރަށްތައްވެސް ފާހަގަކޮށް އެ މަޢުލޫމާތުތައްވެސް ހިއްސާކޮށްފައިވެއެވެ. އެގޮތުން މިސްކިތްތަކަށް ޚާއްސަކޮށްފައިވާ ސްޓޯލަކުން މިސްކިތްތަކަށް ބޭނުންވާ މަރާމާތާއި، މަރާމާތު ކުރުމަށްބޭނުންވާ މިސްކިތްތަކާއި، އެކަންކަމަށް ޚަރަދުވާ މިންވަރުވަނީ ޙިއްސާކޮށްފައެވެ.