ކުޑަކުދިންނަށް އަނިޔާކޮށްގެން މިިދިޔަ މަހު އެކަނިވެސް 128 މައްސަލައެއް ޖެންޑަރ މިނިސްޓްރީއަށް ހުށަހަޅައިފިއެވެ.
ޖެންޑަރ މިނިސްޓްރީން ޢާއްމުކުރި މިދިޔަ މަހުގެ ތަފާސް ހިސާބުތައް ދައްކާ ގޮތުގައި އެ މިނިސްޓްރީއަށް ޖުމްލަ 274 މައްސަލައެއް ހުށަހެޅުނުއިރު އެންމެ ގިނައިން ހުށަހަޅާފައިވަނީ ވެސް ކުޑަކުދިންނަށް އަނިޔާކުރާ މައްސަލައެވެ. އެ މިނިސްޓްރީން ބުނީ އެއީ އެ މިނިސްޓްރީއަށް ހުށަހަޅާފައިވާ މައްސަލަތަކުގެ 47 އިންސައްތަ ކަމަށެވެ.
ޖެންޑަރ މިނިސްޓްރީން ބުނީ އެ މިނިސްޓްރީއަށް ހުށަހެޅުނު މައްސަލަތަކުގައި އިހުމާލުވުމުގެ 48 މައްސަލައަކާއި، ޖިންސީ ހާނީއްކައިގެ 28 މައްސަލައާ ޖިސްމާނީ ހާނީއްކައިގެ 21 މައްސަލައެއް ހުށަހަޅާފައިވާ ކަމަށެވެ. އެ މިނިސްޓްރީން ބުނީ ނަފްސާނީ ހާނީއްކައިގެ 11 މައްސަލައެއް އެ މިނިސްޓްރީއަށް ހުށަހަޅާފައިވާއިރު ގެވެށި އަނިޔާ ކުރާތަން ދެއްކުން ނުވަތަ ފެނުމުގެ 10 މައްސަލައާ ސައިބަރ ބުލީއިންގެ 7 މައްސަލައާ ފުރައްސާރައިގެ ޝިކާރައަކަށްވުމުގެ 1 މައްސަލަ އަދި ނަހަމަ ގޮތުގައި ވިޔަފާރި ފައިދާއަށް ބޭނުންކުރުމުގެ 1 މައްސަލަ ހުށަހަޅާފައިވާ ކަމަށެވެ.
މިދިޔަ ޖަނަވަރީމަހު ޖެންޑަރ މިނިސްޓްރީއަށް ޙައްޤުތަކުން ކުޑަކުދިން މަޙްރޫމުކުރުމާ ގުޅޭ 14 މައްސައެއް ވަނީ ހުށަހަޅާފައެވެ. އެފަދަ މައްސަލަތަކުގެ ތެރޭގައި ތަޢުލީމަށް ހުރަސް އެޅުމުގެ 12 މައްސަލަ އަދި އުފަންވުން ރަޖިސްޓްރީނުކުރުމާ ބެހޭ 2 މައްސަލަ ހިމެނެއެވެ.
ޖެންޑަރ މިނިސްޓްރީގެ ތަފާސްހިސާބުތަށް ދައްކާގޮތުން ޢާއިލީ 47 މައްސަލައެއް ވަނީ ހުށަހަޅާފައެވެ. އެފަދަ މައްސަލަތަކުގެ ތެރޭގައި ޙަޟާނާ ނުވަތަ ކުދިންނާއި ބައްދަލުނުކުރެވޭ 27 މައްސަލައާއި ކުދިން ބެލުމުގައި ދިމާވާ 12 މައްސަލަ އަދި ދަރިންގެ ޚަރަދު ދިނުމުގައި ދިމާވާ 3 މައްސަލަ ހިމެނެއެވެ.
މީގެ އިތުރުން ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 47 މައްސަލަ މިދިޔަ މަހު ޖެންޑަރ މިނިސްޓްރީއަށް ވަނީ ހުށަހަޅައިފައެވެ. އަދި ކުޑަކުދިންގެ އަޚުލާޤާ ގުޅުން ހުރި 19 މައްސަލަ، ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުނަށް އަޅައިލުމާއި އެހީތެރިކަން ބޭނުންވެގެން 15 މައްސަލަ އެ މިނިސްޓްރީއަށް ވަނީ ހުށަހަޅައިފައެވެ.
ޖަނަވަރީ މަހު ކުޑަކުދިންކުރާ ކުށުގެ ދަށުން މަސްތުވާތަކެތި ގެންގުޅުމުގެ 1 މައްސަލައަކާއި، އަމިއްލަ ނަފުސަށް ގެއްލުންދިނުމާ ގުޅޭ ތިން މައްސަލަ އެ މިނިސްޓްރީއަށް ރިޕޯޓުކޮށް އެޓެންޑްކޮށްފައިވެއެވެ.