ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ސަރުކާރު ކޯލިޝަންގައި ހިމެނޭ ޢަދާލަތު ޕާޓީން 8 ދާއިރާއަކަށް ވާދަކުރާ ކެނޑިޑޭޓުންނަށް ޓިކެޓް ހަވާލުކޮށްފިއެވެ.
ޢަދާލަތު ޕާޓިން ކުރިންވަނީ ތޭރަ ދާއިރާއަކަށް ވާދަކުރާނެކަން އިޢުލާންކޮށްފައެވެ. ނަމަވެސް މިރޭ ޓިކެޓް ޙަވާލުކޮށްފައިނީ އަށް ދާއިރާއަކަށް ވާދަކުރާ ކެނޑިޑޭޓުންނަށެވެ. ކުރިން ވާދަކުރަން ނިންމި ފަސް ދާއިރާއަކަށް ވާދަނުކުރުމަށް ޢަދާލަތު ޕާޓިން މިހާރު ވަނީ ނިންމާފައެވެ.
ޢަދާލަތު ޕާޓީގެ ޓިކެޓްގައި ވާދަކުރުމަށް ޓިކެޓް ދީފައިވަނީ، ކެލާ ދާއިރާއަށް ތޫބާ ރަޝީދު، މަކުނުދޫ ދާއިރާއަށް އަނާރާ ނައީމް، ވައިކަރަދޫ ދާއިރާއަށް ހުސެއިން ޝަގީފް، އިނގުރައިދޫ ދާއިރާއަށް އަޙްމަދު ހުސެއިން، ކާށިދޫ ދާއިރާއަށް އަޙްމަދު ޢަދީލް، މަހިބަދޫ ދާއިރާއަށް ޢަލީ ޢާޒިމް، މުލަކު ދާއިރާއަށް ޢާއިޝަތު ރިޔާސާ އަދި ނިލަންދޫ ދާއިރާއަށް މުސްޢަބް މުހައްމަދެވެ. އަށް ކެނޑިޑޭޓުންނަށް ޓިކެޓް ހަވާލުކޮށްދެއްވީ ޢަދާލަތު ޕާޓީގެ ރައީސް އަދި ހޯމް މިނިސްޓަރ އިމްރާން ޢަބްދުﷲއެވެ.
މި ރަސްމިއްޔާތުގައި ވާހަކަ ދައްކަވަމުން އަދާލަތު ޕަޓީގެ ރައީސް ޝައިޚް އިމްރާން ޢަބްދުﷲ ވިދާޅުވީ، ކުރިން ތޭރަ ދާއިރާއަށް ވާދަކުރަން އިޢުލާނު ކުރިނަމަވެސް ފަސް ދާއިރާއަކަށް ވާދަ ނުކުރުމަށް ނިންމުމުން ސަރުކާރަށް މަޖިލީހުގެ އަޣްލަބިއްޔަތު ލިބޭނެކަމަށް ޤަބޫލުކުރައްވާކަމަށެވެ. އިމްރާން ވަނީ ސަރުކާރަށް އަޣްލަބިއްޔަތު ހޯދައި ދިނުމަށް އެޕާޓީން މަސައްކަތް ކުރައްވާނެކަމަށް ވިދާޅުވެފައެވެ.
އިމްރާން ވިދާޅުވީ، ވޭތުވެދިޔަ ފަސް އަހަރު ދުވަހު އެޕާޓިގެ ފަރާތުން މަސައްކަތްކުރީ ރައްޔިތުންގެ މަސްލަހަތަށާއި، އަނިޔާވެރި ވެރިކަމަކުން ސަލާމަތްކޮށް ޢަދުލުވެރި ވެރިކަމެއް ޤާއިމްކޮށްދެއްވުމަށްކަމަށެވެ. އިމްރާން ވަނީ މިހާރު ހިނގަމުން މިދާ ސަރުކާރު ދެމެހެއްޓުމަށް އެޕާޓީގެ ފަރާތުން ކޮންމެ ޤުރުބާނީއެއްވެސް ވާނެކަމަށް ވިދާޅުވެފައެވެ.
"ޢަދާލަތު ޕާޓީގެ ވަރަށް ބޯޑު ޤުރުބާނީއަކާއެކު ﷲ ގެ ރަޙްމަތްފުޅުން އަދުލުވެރި ވެރިކަމެއް ޤާއިމުކުރެވިފައި. މި ވެރިކަން ދެމެހެއްޓުމަށްޓަކައި ވާންޖެހުނު ކޮންމެ ޤުރުބާނީއެއް އަދާލަތު ޕާޓީން މިދަނީ ވަމުން." ޝައިޚް އިމްރާން ވިދާޅުވިއެވެ.
ޢަދާލަތު ޕާޓީން ވާދަކުރާނެކަމަށް އިޢުލާންކުރި 13 ދާއިރާގެ ތެރެއިން ވާދަނުކުރުމަށް ޓިކެޓް ދޫކޯށްލި ފަސް ދާއިރާގެ ކެނޑިޑޭޓުންނަށް އިމްރާން ޝުކުރު އަދާކުރެއްވިއެވެ. އެއީ ސަރުކާރާއި ރައްޔިތުންގެ މަސްލަޙަތު ދެމެހެއްޓުމަށް ނިންމި ނިންމުމެއްކަމަށެވެ.