ކުޑަކުދިންގެ ޙައްޤުތަށް ހިމާޔަތްކުރުމުގައި 2018 ވަނަ އަހަރަކީ ވަރަށް ކާމިޔާބު އަހަރެއްކަމަށް ރާއްޖޭގައި ކުޑަކުދިންގެ ޙައްޤުތަކަށް ހިމާޔަތްކުރުމަށް މަސައްކަތްކުރާ ޖަމިއްޔާ، އެޑްވޮކޭޓިންގ ދަ ރައިޓްސް އޮފް ޗިލްޑްރަން، އަރކްއިން ބުނެފިއެވެ.
ކުޑަކުދިންގެ ޙައްޤުތައް ހިމާޔަތްކުރުމަށް މަސައްކަތްކުރާ ޖަމިއްޔާ، އެޑްވޮކޭޓިންގ ދަ ރައިޓްސް އޮފް ޗިލްޑްރަން، އަރކްގެ 2019 ވަނަ އަހަރުގެ ޕާޓްނަރުންނާއެކު ސޮއިކުރުމަށް ކުރުނބާ މޯލްޑިވްސްގައި ބޭއްވި ރަސްމިއްޔާތުގައި ވާހަކަދައްކަވަމުން އާރކްގެ އެގްޒެކެޓިވް ޑިރެކްޓަރ ޒީނާ ޒާހިދު ވިދާޅުވީ، ޒަމާނަށް އަންނަ ބަދަލުތަކާއެކު ކުޑަކުދިންނަށް ދިމާވާ މައްސަލަތަކާއި، ކުޑަކުދިންގެ ޙައްޤުތައް ހިމާޔަތް ކުރުމަށް ދިމާވާ ގޮންޖެހުންތައް ބަދަލުވަމުންދާކަމަށެވެ. އެގޮތުން 2000 ވަނަ އަހަރުން ފެށިގެން ކުޑަކުދިންގެ ޙައްޤުތައް ހިމާޔަތްކުރުމަށް އޮންނަ ގަވައިދުގެ އޮނިގަނޑު ވަރުގަދަކޮށް މިދިޔަ އަހަރު މިކަމާ ގުޅޭ ބިލެއް ރައްޔިތުންގެ މަޖިލީހަށް ހުށަހަޅާފައިވާކަން އޭނާ ފާހަގަކުރެއްވިއެވެ.
ކުޑަކުދިންގެ ޙައްޤުތައް ހިމާޔަތް ކުރުމުގެ ދާއިރާއަށް ބަލާއިރު 2018 ވަނަ އަހަރަކީ ކާމިޔާބު އަހަރެއްކަމަށް އާރކްގެ އެގްޒެކެޓިވް ޑިރެކްޓަރ ޒީނާ ޒާހިދު ވިދާޅުވިއެވެ.
""އަޅުގަނޑުމެންނަށް 2018 ވަނަ އަހަރަކީ ވަރަށްވެސް ކާމިޔާބު އަހަރެއް. އެގޮތުން ނިމިދިޔަ އަހަރާ ހަމައަށް އަޅުގަނޑުމެން ރާއްޖޭގެ 16 އަތޮޅަކުން 69 ރަށެއްގައި ތަމްރީން ޕްރޮގްރާމްތައް ހިންގާފައިވާއިރު، ހޭލުންތެރިކުރުމުގެ ޕްރޮގްރާމްތަކުގައި ހަތަރު ހާސް ފައްސަތޭކަ ބެލެނިވެރިންނާއި، ސަތާރަ ސަތޭކަ ޓީޗަރުން ތަމްރީންކޮށްފައިވާނެ. އަދި ކުޑަކުދިންގެ ޙައްޤުތަށް ހިމާޔަތްކުރުމަށް އޮންނަ ގަވައިދުގެ އޮނިގަނޑު ވަރުގަދަކޮށް މިދިޔަ އަހަރު މިކަމުގެ ބިލް ރައްޔިތުންގެ މަޖިލީހަށް ހުށަހަޅާފައިވުމަކީވެސް ވަރަށް ފާހަގަކޮށްލެވޭކަމެއް."ޒީނާ ޒާހިދު ވިދާޅުވިއެވެ.
އާރކްގެ 2019 ވަނަ އަހަރުގެ ޕާޓްނަރުންނާއިއެކު ސޮއިކުރުމަށް ބޭއްވި މި ރަސްމިއްޔާތުގައި އާރްކްއިން ކޯޕަރޭޓް އެމްބެސެޑަރުންގެ ގޮތުގައި ކަނޑައަޅާ 4 ފަންތީގެ ތެރެއިން 3 ފަންތިއެއްގައި އެމްބެސެޑަރުންނާއެކު ވަނީ ސޮއިކޮށްފައެވެ. އެގޮތުން ޗެމްޕިއަންސް އޮފް ޗިލްރަންސް ރައިޓްސް އިން މޯލްޑިވްސްގެ ލެވެލްގައި ޕްރެކްސިސް ލޯ ފާމް އަދި އިވެންޓް މޯލްޑިވްސް އާއިއެކު ސޮއިކޮށްފައިވާއިރު، އެޑްވޮކޭޓްސް އޮފް ޗިލްރަންސް ރައިޓްސް އިން މޯލްޑިވްސްގެ ލެވެލްގައި ޓިމްބަރ ހައުސްއާއި ތިންކް އެޑްވަޓައިސިންގް އާއިއެކު ވަނީ ސޮއިކޮށްފައެވެ.
މީގެ އިތުރުން ސަޕޯޓަރ އޮފް ޗިލްރަންސް ރައިޓްސް އިން މޯލްޑިވްސްގެ ލެވެލްގައި އެމް-7 ޕްރިންޓާއި، ޕްރިންޓް ލެބް، ޑީޖީ ހޯލްޑިންގްސް އަދި އޮފިޝަލް ފޮޓޯގްރާފަރުންގެ ގޮތުގައި އަޙްމަދު ނިޝާން އާއި އަލީ މަސްރަޙާއެކު ވަނީ ސޮއިކޮށްފައެވެ.
މީގެ އިތުރުން މި ޖަލްސާގައި 2018 ވަނަ އަހަރު އެ ޖަމިއްޔާއާއެކު ސޮއިކޮށް އެމްބެސެޑަރުންގެ ގޮތުގައި މަސައްކަތްކުރި ފަރާތްތަކަށްވަނީ އެކަމުގެ ޝުކުރުއަދާކޮށް ހަނދާނީ ލިޔުން އަރުވާފައެވެ. ރާއްޖޭގައި ކުޑަކުދިންގެ ޙައްޤުތައް ޙިމާޔަތްކުރުމަށް ފުޅާދާއިރާއެއްގައި މަސައްކަތްކުރާ ޖަމިއްޔާ އާކްއިން މިހާރުވެސް ކުޑަކުދިންގެ ޙިއްޤުތަށް ހިމާޔަތްކުރުމަށް ތަފާތު 6 ޕްރޮގްރާމެއް ކުރިއަށްގެންދެއެވެ.