ރ.މާކުރަތު ކައުންސިލްގެ އިދާރާއާއި، އެރަށު ސިއްޙީ މަރުކަޒާއި މެޖިސްޓްރޭޓް ކޯޓް ފަޅާލައިފިއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން މާކުރަތު ކައުންސިލުގެ ނާއިބް ރައީސް ހުސައިން އިމާދު ވިދާޅުވީ އެރަށު ކައުންސިލްގެ އިދާރާއާއި ސިއްޙީ މަރުކަޒާއި މެޖިސްޓްރޭޓް ކޯޓް ފަޅާލާފައިވާ ކަމަށާ އެހެންނަމަވެސް އެތަންތަނުން ފައިސާ ގެންދިޔަކަމުގެ ޞައްހަ މަޢުލޫމާތު އަދި ލިބިފައި ނުވާކަމަށެވެ.
އެތިން ތަންވެސް ފަޅާލާފައިވަނީ ރޭގެ ވަގުތެއްގައި ކަމަށާ އެހެންނަމަވެސް އެކަން އެނގުނީ މިއަދު ހެނދުނު ކަމަށް އޭނާ ވިދާޅުވިއެވެ. އަދި އެތަންތަނަކީ ޑިއުޓީ އުސޫލުން ސެކިއުރީ ބަލަހައްޓާ ތަންތަން ނަމަވެސް އެކަން ކުރި ވަގުތު އެތަންތަނުގައި ސެކިއުރިޓީން ގާޑުން ނޭނގޭކަމަށްވެސް އެނާ ވިދާޅުވިއެވެ.
އިމާދު ވިދާޅުވީ އެ ތިންތަންވެސް ފަޅާލާފައި ވަނީ އެ ތަންތަނުގެ ކުޑަދޮރު ހަލާކުކޮށްލައިގެން ކަމަށާ، އެކަން އެނގުމާއެކު ފުލުހުންނަށް ރިޕޯޓްކޮށްފައިވާނެކަމަށެވެ. އަދި ފުލުހުން މިހާރު އެ މައްސަލަ ތަހުގީގު ކުރަމުންދާ ކަމަށް އިމާދު ވިދާޅުވިއެވެ.
މާކުރަތު ބައެއް މީހުން ބުނީ ކައުންސިލް އިދާރާގެ ތިޖޫރިއަކީ އަބަދުވެސް ގިނަ ޢަދަދެއްގެ ފައިސާ ރައްކާކޮށްފައި ހުންނަ ތިޖޫރިއެއް ކަމަށެވެ. މި މައްސަލައާ ގުޅިގެން އަދި އެއްވެސް މީހަކު ހައްޔަރުކުރިކަމުގެ މަޢުލޫމާތެއް ލިބިފައިނުވާއިރު، މައްސަލަ ތަހުޤީގުކުރަމުންދާކަމަށް ފުލުހުން މަޢުލޫމާތުދެއެވެ.