ވިޔަފާރި

ސްރީލަންކަން އެއަރލައިންސްއިން އައްޑޫ ސިޓީއަށް ކުރާ ދަތުރުތައް ވަގުތީގޮތުން މެދުކަނޑާލަނީ


ސްރީލަންކަން އެއަރލައިންސްއިން އައްޑޫ ސިޓީއަށް ކުރަމުން އަންނަ ދަތުރުތައް އެޕްރީލްމަހުގެ އެއްވަނަ ދުވަހުން ފެށިގެން ވަގުތީގޮތުން މެދުކަނޑާލަން ނިންމައިފިއެވެ.

ޕީއެސްއެމް ނިއުސްއަށް މައުލޫމާތުދެއްވަމުން ސްރީލަންކަން އެއަރލައިންސްގެ ރާއްޖޭގެ ޖެނެރަލް ސޭލްސް އެޖެންޓު، އޭސް އޭވިއޭޝަންގެ މެނޭޖިން ޑިރެކްޓަރު މުހައްމަދު ފިރާގު ވިދާޅުވީ ސްރީލަންކަންގެ ދަތުރުތައް މެދުކަނޑާލަނީ އެއަރޕޯޓުން ލިބެންޖެހޭ ބައެއް ޙިދުމަތްތައް ނުލިބޭތީކަމަށެވެ. އެގޮތުން 2 އަހަރުވީއިރުވެސް އިމިގްރޭޝަން އާ ގުޅުން ހުރި ބައެއް ކަންތައްތައް ހައްލުވެފައިނުވާކަމަށް ސްރީލަންކަން އެއަރލައިންސްއިން ބުނެއެވެ. އަދި ސްރީލަންކަން އެއަރލައިންސްއަށް ދިމާވެފައިވާ މާލީ ގެއްލުމަކީވެސް މި ދަތުރުތައް ހުއްޓާލާ ސަބަބެއްކަމަށް ފިރާގު ވިދާޅުވިއެވެ.

މިހާރު ހަފްތާއަކު 3 ދަތުރު ނުވަތަ 4 ދަތުރު ސްރީލަންކަން އެއަރލައިންސްއިން އައްޑޫ ސިޓީއަށް އަންނަނީ ކުރަމުންނެވެ. އޭޕްރީލް މަހުގެ 1 ވަނަ ދުވަހުން ފެށިގެން ޝެޑިއުލް ދަތުރުތައް ހުއްޓާލަން ނިންމިނަމަވެސް އެއްކޮށް ދަތުރުތައް މެދުކަނޑާނުލައި ދަތުރުތައް ބޭއްވޭތޯ މަސައްކަތް ކުރަމުން އަންނަކަމަށް ފިރާގް ވިދާޅުވިއެވެ.

ސްރީލަންކަން އިން އައްޑޫ ސިޓީ ގަމަށް ދަތުރު ފެށީ 2016 ވަނަ އަހަރުގެ ޑިސެމްބަރުގައެވެ. 2 އަހަރުވީއިރު މިހާތަނަށް ސްރީލަންކަން އެއަރލައިންސްއިން އައްޑޫ ސިޓީއަށް ފަންސާސް ހާސް ފަތުރުވެރިން އައިސްފައިވާކަމަށް އޭސް އޭވިއޭޝަނުން ބުނެއެވެ. އަދި މި ދަތުރުތަކުގައި ފަސް ސަތޭކަ ހާސް ޓަނުގެ މުދާ ވަނީ ރާއްޖެ ގެނެސްފައެވެ.