އެފްއޭއެމް އިން އިންތިޒާމުކޮށްގެން ބާއްވަމުން އަންނަ ޔޫތް ޗެމްޕިއަންޝިޕް، މިއަހަރުގެ މުބާރާތް އަންނަ ފެބްރުއަރީ މަހު ބާއްވަން ނިންމައިފިއެވެ.
މިދިޔަ އަހަރު 19އަހަރުން ދަށަށް ހުޅުވާލައިގެން މިމުބާރާތް ބޭއްވިނަމަވެސް މިއަހަރު މުބާރާތް ބާއްވާނީ 21 އަހަރުން ދަށަށް ހުޅުވާލައިގެނެވެ. އެފްއޭއެމުން މީގެ ކުރިން ބުނެފައިވަނީ މިގޮތަށް ނިންމީ، ފާއިތުވި އަހަރުވެސް މިމުބާރާތުގައި ކުޅުނު ގިނަ ކުޅުންތެރިންނަށް މިއަހަރުވެސް މުބާރާތުގައި ކުޅުމުގެ ފުރުސަތު ދިނުމުގެ ގޮތުން ކަމަށެވެ.
މީގެކުރިން އާންމުކޮށް މިމުބާރާތް ބާއްވަމުން އަންނަނީ އަހަރުގެ ފަހުކޮޅެވެ. ނަމަވެސް މިއަހަރުގެ ޔޫތް ޗެމްޕިއަންޝިޕް ވެގެންދާނީ ފުޓުބޯޅަ އެކްޓިވިޓީ ކަލަނޑަރުގެ އެންމެ ފުރަތަމަ މުބާރާތަށެވެ.
އެފްއޭއެމުން 2011ވަނަ އަހަރު ބާއްވަން ފެށި، މިމުބާރާތުގެ އެންމެ ފަހުގެ ޗެމްޕިއަނުންނަކީ ކްލަބް ގްރީން ސްޓްރީޓްސްއެވެ.