ހއ.ދިއްދޫގެ ކުލަބް ޖަމިއްޔާއެއް ކަމައްވާ ބާރާލާ ސްޕޯރޓްސްއިން ދިއްދޫގެ ޒުވާނުންނަށް ބާއްވާ ބާރާލާކަޕްގެ ފަސްވަނަ ފުޓްބޯޅަ މުބާރާތް ދިއްދޫގައި ފަށައިފިއެވެ.
ޒުވާނުންގެ މެދުގައި ފުޓްބޯޅައަށް އޮންނަ ޝައުޤުވެރިކަން އިތުރުކުރުމާއި ހުނަރުވެރި ކުޅުންތެރިންތަކެއް އުފެއްދުމުގެ މަޤުސަދުގައި ކޮންމެ އަހަރަކުވެސް ކުރިއަށްގެންދާ މުބާރާތުގެ ފުރަތަމަ މެޗުގައި ވާދަކުރީ ބްލެކް ޒީނޯ އަދި ލައިކަންއެވެ. މި މެޗު ނުވައެއް ސުމެއްގެ ބޮޑު ތަފާތަކުން ކާމިޔާބުކުރީ ބްލެކް ޒީނޯއެވެ.
19 އަހަރުން ދަށުގެ ޒުވާނުންނަށް ޙާއްސަކުރެވިގެން ބައްވާ ފުޓްބޯޅަ މުބާރާތުގައި މިއަހަރު ވާދަކުރަނީ ހަތަރު ޓީމެވެ. އެއީ ބްލެކް ޒީނޯ، ލައިކަން، ރިއަލް ޓީ ސްޕޯޓްސް ކުލަބު އަދި އައްސޭރި އެފްސީއެވެ.
މިއަހަރުގެ މުބާރާތް ކުރިއަށްދަނީ ކޮންމެ ޓީމެއް ކޮންމެ ޓީމަކާއި ވާދަކޮށް ލީގު ބުރުގެ އެއްވަނަ އަދި ދެވަނައަށްދާ ޓީމް ފައިނަލްގައި ވަދަކުރާ ގޮތަށެވެ.
މިއީ ބާރަލާ ސްޕޯޓްސް ކުލަބުން މި މުބާރާތް ބާއްވާ ފަސްވަނަ އަހަރުކަން ފާހަގަކޮށްލެވެއެވެ.