އަޑުއިވުމުން މަޙުރޫމްވެފައިވާ މީހުންނަށް ދިމާވާ އެކި މައްސަލަތަކާ ކުރިމަތިލާނެ ގޮތް ދަސްކޮށްދިނުމަށް ޚާއްސަ މަސައްކަތު ބައްދަލުވުމެއް ބާއްވައިފިއެވެ.
މިނިސްޓްރީ އޮން ޖެންޑަރ އެން ފެމިލީން އިންތިޒާމްކޮށްގެން ބޭއްވި މި މަސައްކަތު ބައްދަލުވުމުގެ މަޤްސަދަކީ ނުކުޅެދުންތެރިކަން ހުން ފަރާތްތަކަށް ކުރިމަތިވާ އެކި ބާވަތުގެ އަނިޔާއާއި ދެކޮޅަށް އަޑު އުފުލައި އެފަދަ ކަމެއް ދިމާވެއްޖެނަމަ ޢަމަލުކުރާނެ ގޮތް ބުނެދީ އެފަދަ ކަންކަމާ ގުޅޭގޮތުން ހޭލުންތެރިކަން އިތުރުކުރުންކަމަށް އެމިނިސްޓްރީން މައުލޫމާތުދެއެވެ. މި ބައްދަލުވުމުގެ ތެރެއިން ޖިންސީ ފުރައްސާރައާއި ގެވެށި އަނިޔާއާއި ބައެއް ޤާނޫނުތަކާ ގުޅޭ މަޢުލޫމާތު ބައިވެރިންނަށް ދީފައިވާކަމަށް ޖެންޑަރ މިނިސްޓްރީން ބުނެއެވެ. ނުވަ ދުވަހަށް ކުރިއަސްގެންދިޔަ މި ވޯކްޝޮޕްގައި 22 މީހުން ބައިވެރިވެފައިވެއެވެ.
އަޑުއިވުމުން މަޙުރޫމްވެފައިވާ މީހުންނަށް އަމާޒުކޮށް ފެމިލީ ޕްރޮޓެކްޝަން އޮތޯރިޓީއާ ގުޅިގެން ކުރިއަށް ގެންދިޔަ މިއީ މިފަދަ ފުރަތަމަ މަސައްކަތު ބައްދަލުވުން ކަމަށް ޖެންޑަރ މިނިސްޓްރީން ބުނެއެވެ. މި ބައްދަލުވުމުގެ ސެޝަންތައް ކުރިއަށް ގެންގޮސްފައިވަނީ ސޮސައިޓީ ފޮރ ހެލްތް އެޑިއުކޭޝަނާއި، ފެމިލީ ލީގަލް ކްލިނިކް އަދި މޯލްޑިވްސް ޕޮލިސް ސަރވިސްއިންކަމަށް އެމިނިސްޓްރީން މައުލޫމާތުދެއެވެ.