ފުލުހުން ހިންގި ޚާއްޞަ އޮޕަރޭޝަންތަކެއްގައި ގިނަ ޢަދަދެއްގެ މަސްތުވާތަކެއްޗާއިއެކު ބަޔަކު ހައްޔަރުކޮށްފިއެވެ.
އިސްކަންދަރުކޮށީގައި މިއަދު މެންދުރު ބޭއްވި ނޫސްވެރިންގެ ބައްދަލުވުމެއްގައި ފުލުހުންގެ ޑްރަގް އެންފޯސްމަންޓް ޑިޕާޓްމަންޓުގެ އެކްޓިން ހެޑް ރަޖްނީ ޝުއައިބު ވިދާޅުވީ މިދިޔަ މަހުގެ 27 ވަނަ ދުވަހާއި 31ވަނަ ދުވަހާއި އަދި މި މަހުގެ 7 ވަނަ ދުވަހު ފުލުހުންގެ ޑްރަގް އެންފޯސްމަންޓް ޑިޕާޓްމަންޓާއި ފުލުހުންގެ ޑްރަގް އިންޓަލިޖެންސް ޑިޕާޓްމަންޓް ގުޅިގެން ޚާއްޞަ އޮޕަރޭޝަންތަކެއް ހިންގާފައިވާ ކަމަށެވެ. އަދި މި އޮޕަރޭޝަންތަކުގައި މަސްތުވާތަކެތީގެ ވިޔަފާރިކޮށް އެތަކެތި ބޭނުންކޮށްފައިވާ ބަޔަކު ހައްޔަރުކޮށްފައިވާ ކަމަށް ފުލުހުން ބުނެއެވެ. ފުލުހުން ވިދާޅުވީ މިދިޔަ މަހުގެ 27 ވަނަ ދުވަހު ފުލުހުން ގ. ވެގާ ބަލައި ފާސްކުރިއިރު ފޮށިގަނޑެއްގެ ތެރެއިން ތިން ކިލޯއަށްވުރެ ގިނަ މަސްތުވާތަކެއްޗާއި ގިނަ އަދަދެއްގެ ފައިސާ ފެނިފައިވާ ކަމަށެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ފުލުހުން ވަނީ އޮޕަރޭޝަންތަކުގައި ހައްޔަރުކުރި މީހުންގެ ވަނަވަރާއި ފޮޓޯ ޢާއްމުކޮށްފައެވެ. ރަޖްނީ ވިދާޅުވީ ގ. ވެގާއިން ހައްޔަރުކުރި ދެ މީހުންވެސް މަސްތުވާތަކެތީގެ ބާވަތެއް ކަމަށްވާ ޓީއެޗްސީއަށް ޕޮޒިޓިވް ކަމަށެވެ. މިމައްސަލާގައި ހައްޔަރުކޮށްފައި ވަނީ ގދ. ފަރެސްމާތޮޑާ ސަމަން، ސަދޫހް ސާމިއު އާއި ގދ. ފަރެސްމާތޮޑާ މީނާޒް، ބިސާމް ސަމީރުއެވެ.
މިދިޔަ މަހުގެ 31 ވަނަ ދުވަހު މަސްތުވާތަކެތި އަތުލައިގަތީ ހުޅުމާލެ ފެރީ ޓާމިނަލް ކައިރީގައި ފުލުހުން ހިންގި އޮޕަރޭޝަނެއްގައެވެ. މިމައްސަލައިގަ ހައްޔަރުކޮށްފައިވަނީ ވީޓީވީގެ ނޫސްވެރިއެއްކަމަށްވާ ސ. ފޭދޫ ހަޒާރުމާގޭ، ލީވާން ޢަލީ ނާޞީރާއި ކުރިން ނޫސްވެރިއަކަށް އުޅުނު ސ. ހިތަދޫ ލީޒަލް، އާލާ އިބްރާހިމް ރަޝީދުގެ އިތުރުން ޏ. ފުވައްމުލަކު ހޯދަނޑު ބޯގަންވިލާ، ސާމީ އަބްދުލް ހަމީދުއެވެ. މީގެ ތެރެއިން ލީވާން ލައިގެން ހުރި ޖީންސްގެ ޖީބުން 246 ގްރާމްގެ މަސްތުވާތަކެތި ފެނިފައިވާ ކަމަށް ފުލުހުން ބުނެއެވެ. އަދި ހުޅުމާލެ ފެރީ ޓާރމިނަލް ކައިރިން ހައްޔަރުކުރި މި ތިން މީހުންވެސް މަސްތުވާތަކެއްޗަށް ޕޮޒިޓިވް ވެފައިވާކަން ފުލުހުން ވަނީ ފާހަގަކޮށްފައެވެ.
ފުލުހުން ރޭވެސް ވަނީ މަސްތުވާތަކެތީގެ ޚާއްޞަ އޮޕަރޭޝަނެއް ހިންގާ ދެ މީހަކު ހައްޔަރުކޮށްފައެވެ. މި އޮޕަރޭޝަނުގައި މއ. އަނޫމާގެ ބަލާ ފަސްކުރުމުގެ ތެރޭގައި މަސްތުވާތަކެތީގެ ބާވަތެއް ކަމަށްވާ، ކެނަބިސް ކަމަށް ޝައްކުކުރެވޭ 530 ގުރާމާއި ހެރޮއިންކަމަށް ޝައްކުކުރެވޭ 9.9 ގްރާމް މަސްތުވާތަކެތި ފެނިފައިވާ ކަމަށް ފުލުހުންގެ ޑްރަގް އެންފޯސްމަންޓް ޑިޕާޓްމަންޓުން ބުނެއެވެ. މިމައްސަލައިގަ ހައްޔަރު ކޮށްފައި ވަނީ މއ. އަނޫމާ ރާމިޒް އިބްރާހިމް އާއި އެ ގޭ ފައިސަލް އިބްރާހިމް އެވެ.
މިދެމީހުންނަކީ ކުށުގެ ރެކޯޑު އޮތް މީހުން ކަމަށް ފުލުހުން ބުނެއެވެ. މީގެ ތެރޭގައި މާލެތެރޭގެ އަމާންކަން ނަގާލުމަށް މަސައްކަތް ކޮށްފައިވާ ކަމުގެ ރެކޯޑާއި މަސްތުވާތަކެތީގެ ވިޔަފާރިކޮށް، މަސްތުވާތަކެތި ބޭނުން ކުރުމުގެ ރިކޯޑާއި ފިނިފެންމާ ލޯންޗުގައި އެއްޗެއް ގޮއްވާލި ހާދިސާގައި ފުލުހުން ހިންގި ތަޙްޤީޤަށް ހުރަސް އެޅި ކަމުގެ ރެކޯޑްހިމެނެއެވެ.
މަސްތުވާތަކެތީގެ އޮޕަރޭޝަންތަކުގައި ހައްޔަރުކުރި އެންމެންގެ ބަންދުގެ މުއްދަތު އިތުރުކޮށްފައިވާ ކަމަށާއި މައްސަލާއިގެ ތަހްޤީޤު ނިންމާ ވަރަށް އަވަހަށް ޕްރޮސިކިއުޓަރ ޖެނެރަލް، ޕީޖީ އޮފީހަށް ފޮނުވާނެ ކަމަށްވެސް ފުލުހުން ބުނެއެވެ.