އާދިއްތަ ދުވަހު ސައުދީ ޢަރަބިއްޔާގައި ބޭއްވުމަށް ހަމަޖެހިފައިވާ އަރަބި ސަމިޓުގައި އިސްރާއީލުން ފަލަސްޠީނާ ދެކޮޅަށް ހިންގަމުންދާ ޖަރީމާތަކާ ބެހޭ ފުރިހަމަ މަޝްވަރާތައް ކުރިއަށްގެންދާނެ ކަމަށް އުއްމީދުކުރައްވާކަމަށް ފަލަސްޠީނުގެ ރައީސް މަހްމޫދު އައްބާސް ވިދާޅުވެއްޖެއެވެ.
ފަލަސްޠީނުގެ ރާމަﷲގައި ބޭއްވި ބައްދަލުވުމަކަށްފަހު ވާހަކަދައްކަވަމުން އައްބާސް ވިދާޅުވީ، ސައުދީ ޢަރަބިއްޔާގައި ބާއްވާ ޢަރަބި ސަމިޓް ދިމާވެފައި މިވަނީ، އިސްރާޢީލުގެ ސަބަބުން ޤުދުސަށް ނުރައްކާތަކާ ކުރިމަތިވެފައިވާ ދަނޑިވަޅެއްގައި ކަމަށާއި މިކަމުގެ ސަބަބުން ސަމިޓްގެ ނާރެހަކަށް ޤުދުސްގެ މިލްކުވެރިކަމުގެ މައްސަލަ ވުން މުހިއްމުކަމަށެވެ. އިސްރާއީލުގެ އަނިޔާވެރިކަމުގެ މައްސަލަތަކުގެ އިތުރުން އެމެރިކާއިން ޤުދުސާ ބެހޭގޮތުން ނިންމާފައިވާ ނިންމުމުގެ ސަބަބުން ފަލަސްޠީނު ރައްޔިތުންގެ ހައްޤުތައް ރައްކާތެރިކުރުމަށް ކުރިމަތިވާ މައްސަލަތަކަށް އެކަށީގެންވާ ހައްލެއް ހޯދުމަށް މި ސަމިޓުގެ ތެރެއިން މަސައްކަތްތައް ކުރިއަށްދާނެކަމަށް އުއްމީދުކުރައްވާ ކަމަށް އައްބާސް ވިދާޅުވިއެވެ.
އެހެން ނަމަވެސް، މިކަމުގައި ފަލަސްޠީނުން ބަލައިގަންނާނެ ހަމައެކަނި ހައްލަކަކީ ފަލަސްޠީނާ އިސްރާއީލުގެ މިނިވަން ދެ ދައުލަތް އުފެދިގެންދާނެ ހައްލެއް ކަމަށާއި، މި ހައްލުގެ ދަށުން އިރުމަތީ ޤުދުސަކީ ފަލަސްޠީނުގެ ވެރިރަށަށް ވާން ޖެހޭނެކަން ޢައްބާސް ފާހަގަކުރެއްވިއެވެ.
ހުސްވި އަހަރުގެ ޑިސެމްބަރު މަހު އެމެރިކާއިން ވަނީ، ޤުދުސަކީ އިސްރާއީލުގެ ވެރިރަށް ކަމަށް އެ ޤައުމުން ބަލައިގަންނަކަން އިޢުލާންކޮށް، ޓެލްއަވީވުގައި ހުންނަ އެމެރިކާގެ އެމްބަސީ ޤުދުސަށް ބަދަލުކުރުމަށް ނިންމާފައެވެ.