ދިރާގާއި އެމްޑަބްލިއުއެސްސީގެ ހިއްސާއިން ބޭރަށް ވިއްކާފައިވާ ޙިއްސާ އަނބުރާ ގަންނާނެކަމަށް ފިނޭންސް މިނިސްޓަރ އަޙްމަދު މުނައްވަރު ވިދާޅުވެއްޖެއެވެ.
ދިރާގާއި އެމްޑަބްލިއުއެސްސީ ހިއްސާ ބޭރުގެ ބަޔަކަށް ވިއްކާލާފައިވަނީ ކުރީގެ ރައީސް މުޙައްމަދު ނަޝީދުގެ ވެރިކަމުގައެވެ.
ސަރުކާރުގެ ފަރާތުން ރައްޔިތުންގެ މަޖިލީހަށް 493 މިލިއަން ރުފިޔާގެ ސަޕްލިމަންޓްރީ ބަޖެޓް ދިރާސާކުރާ ކޮމެޓީގައި މިއަދު ވާހަކަދައްކަވަމުން ފިނޭންސް މިނިސްޓަރ އަޙްމަދު މުނައްވަރު ވިދާޅުވީ މީގެ ކުރީގެ ސަރުކާރުތަކުން ޙިއްސާ ވިއްކާފައި ހުރިނަމަވެސް މިސަރުކާރުން އެކަން އެގޮތަށް ނުކުރާނެކަމަށެވެ. އަދި އެގޮތަށް ވިއްކާފައި ހުރި ހިއްސާ މި ސަރުކާރުން ގަންނާނެކަމަށާއި އެ ޙިއްސާތައް ގަނެގެން އޭގެ ފައިދާ ދައުލަތަށް ކުރާނެ ކަމަށްވެސް ފިނޭންސް މިނިސްޓަރ ވިދާޅުވިއެވެ.
ސަރުކާރު ކުންފުނިތަކުން މިދިޔަ އަހަރު 600 މިލިއަން ރުފިޔާ ދައުލަތަށް ލިބިފައިވާއިރު މިއަހަރު 900 މިލިއަން ރުފިޔާ ލިބޭނެ ކަމަށް ޤަބޫލުކުރައްވާކަމަށް ފިނޭންސް މިނިސްޓަރގެ އަޙްމަދު މުނައްވަރު ވިދާޅުވިއެވެ.