ބޮޑެތި ކުށްތައް ކޮށްފައިވާ 16 މީހެއްގެ ފައިގައި ޓެގް އެޅުވުމަށް ކަމާބެހޭ ފަރާތްތަކުގައި އެދިފައިވާނެ ކަމަށް ފުލުހުން ބުނެފިއެވެ.
އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފުލުހުންގެ ސްޕޯކްސް ޕާސަން ސުޕްރިޑެންޓެންޓް އޮފް ޕޮލިސް އަހްމަދު ޝިފާން ވިދާޅުވީ މޮނިކޮމް އަމުރުގެ ދަށުން 16 މީހެއްގެ ފައިގައި ޓެގް އެޅުވުމަށް އެދިފައިވާއިރު މާދަމާއިން ފެށިގެން ޓެގް އަޅުވަން ފަށާނެ ކަމުގެ މަޢުލޫމާތު ލިބިފައިވާ ކަމަށެވެ. ނަމަވެސް ޓެގް އެޅުވުމަށް ނިންމާފައިވާ މީހުންގެ ތަފްސީލް ފުލުހުން ހާމަކޮށްފައެއް ނުވެއެވެ.
މާލޭގައި، ފަހަކަށް އައިސް މާރާމާރީ އިތުރުވެފައިވާއިރު ކުށް ކުރާ ބައެއް ފަރާތްތަކުގެ ފައިގައި ޓެގް އަޅުވަން އަލުން ފަށްޓަވާނެ ކަމަށް ހޯމް މިނިސްޓަރ އަޒްލީން އަޙްމަދު ވަނީ ދާދިފަހުން ވިދާޅުވެފައެވެ. ޝިފާން ވިދާޅުވީ ކުށް ކުރުން އިތުރުވެފައިވާ މިފަދަ ދަނޑިވަޅެއްގައި ޓެގް އެޅުވުމަކީ ފުލުހުންނަށް ލިބޭ އިތުރު ހިތްވަރެއް ކަމަށެވެ. ޓެރަރިޒަމް މަނާ ކުރުމުގެ ޤާނޫނުގެ ދަށުން ނެރޭ މޮނިކޮން އަމުރަކީ ބޮޑެތި ކުށްތަކުގެ ތުހުމަތު ކުރެވޭ މީހުންގެ ފައިގައި ޓެގް އަޅުވައި، އެ މީހުން މޮނީޓަރ ކުރަން ނެރޭ އަމުރެކެވެ.