ފުލުހުންގެ ސަފުތައް ފޫއަޅުވާލުމުގެ ތުހުމަތުގައި މަޖިލީހުގެ ބައެއް މެންބަރުން ފުލުހުންގެ އިދާރާއަށް ހާޒިރުކޮށްފިއެވެ.
އިއްޔެ ފުލުހުންގެ އިދާރާއަށް ހާޒިރުކޮށްފައިވަނީ ހެންވޭރު އުތުރު ދާއިރާގެ މެންބަރު ޢަބްދުﷲ ޝާހިދާއި، ހިތަދޫ އުތުރު ދާއިރާގެ މެންބަރު މުޙައްމަދު އަސްލަމްއެވެ. އަދި ހެންވޭރު ދެކުނު ދާއިރާގެ މެންބަރު މުޙައްމަދު ޢަބްދުލްކަރީމާއި ނޮޅިވަރަމް ދާއިރާގެ މެންބަރު ޙުސައިން ޢަރީފާއި ހިތަދޫ ދެކުނު ދާއިރާގެ މެންބަރު ޢަލީ ނިޒާރާއި ކެންދޫ ދާއިރާގެ މެންބަރު އަލީ ޙުސައިން މިއަދުގެ ވަގުތެއްގައި ފުލުހުންގެ އިދާރާއަށް ހާޒިރުވުމަށް ވަނީ އަންގާފައެވެ.
މީގެކުރިން ފުލުހުންގެ ސަފުތައް ފޫއަޅުވާލުމުގެ ތުހުމަތުގައި ހިންނަވަރު ދާއިރާގެ މެންބަރު އިބްރާހީމް މުޙައްމަދު ޞާލިޙާއި ކިނބިދޫ ދާއިރާގެ މެންބަރު ޢަބްދުﷲ ރިޔާޒާއި ތުލުސްދޫ ދާއިރާގެ މެންބަރު މުޙައްމަދު ވަޙީދު އިބްރާހީމް ވަނީ ފުލުހުންގެ އިދާރާއަށް ޙާޟިރުކޮށް ބަޔާންނަގާފައެވެ. މި މެމްބަރުންނަކީ މަޖިލީހުގެ ޖަލްސާއެއް އެޖެންޑާ ކުރައްވާފައި ނުވަނީސް މަޖިލީހުގެ ޖަލްސާ އޮންނާނެ ކަމަށް ބުނެ މިދިޔަ މަހުގެ 24ވަނަ ދުވަހު ގަދަ ކަމުން ފުލުހުންގެ ސަފުތައް ފޫ އަޅުވާ ރައްޔިތުންގެ މަޖިލިސް ތެރެއަށް ވަތް މެމްބަރުންނެވެ. މަޖިލީހަށް ވަތް މީހުންގެ ތެރޭގައި، ރައްޔިތުންގެ މަޖިލީހުގެ މެންބަރުންގެ އިތުރުން އާންމު މީހުންވެސް ހިމެނެއެވެ.