ހއ. އިހަވަންދޫގައި ހިންގާ އައިސް ޕްލާންޓްގެ ތެރޭގައި މަރާލާފައި އޮއްވައި ފެނުނު އިސްމާޢީލް ޢުމަރުގެ މަރާ ގުޅިގެން 3 ބިދޭސީއެއްގެ މައްޗަށް ދަޢުވާކުރުމަށް ޕީޖީ އޮފީހުން ކުރިމިނަލް ކޯޓަށް ފޮނުވައިފިއެވެ
މިދިޔަ ޖޫންމަހުގެ ތެރޭގައި މަރާލާފައި އޮއްވައި ފެނުނު އިސްމާޢީލްގެ މަރުގެ މައްސަލައިގެ ތަޙްޤީގު ނިންމާ ފަސް މީހެއްގެ މައްޗަށް ދަޢުވާކޮށްދިނުމަށް އެދި ފުލުހުން ޕީޖީ އޮފީހަށް ފޮނުވާފައިވެއެވެ.
ޕްރޮސެކިއުޓަރ ޖެނަރަލް ޢާއިޝަތު ބިޝާމް ވިދާޅުވީ އިސްމާޢީލް އުމަރުގެ މަރުގެ މައްސަލާގައި ދަޢުވާކުރަން ފޮނުވީ ތިން މީހެއްގެ މައްޗަށްކަމަށް.
ޅ. ހިންނަވަރަށް އުފަން ޢުމުރުން 54 އަހަރުގެ އިސްމާޢީލް ޢުމަރު މަރާލާފައި އޮއްވައި ފެނުނީ އޭނާ މަސައްކަތްކުރާ އައިސް ޕްލާންޓްގެ އެކޮމަޑޭޝަން ރޫމެއްގެ ތެރެއިންނެވެ.
މި މައްސަލާގައި ފުލުހުން ފުރަތަމަ ހައްޔަރުކޮށްފައިވަނީ އިސްމާޢީލާއެކު މަސައްކަތްކުރަމުންދިޔަ ބިދޭސީއެކެވެ. އެނާ އިސްމާޢީލް ޢުމަރު މަރާލިކަމަށް އިޢުތިރާފްވެ އެކަން ކުރި ގޮތް ކިޔައިދީފައިވާކަމަށް ފުލުހުން ބުނެފައިވެއެވެ.
އިސްމާޢީލް ޢުމަރުގެ މަރުގެ މައްސަލައިގައި ދަޢުވާކުރަން ފޮނުވާފައިވާއިރު ލ. ފޮނަދޫގައި މަރާލާފައި އޮއްވައި ފެނުނު ބަންގްލަދޭޝް މީހާގެ މަރާ ގުޅިގެންވެސް 8 މީހެއްގެ މައްޗަށް ދަޢުވާކުރަން ފޮނުވާފައިވާކަމަށްވެސް ޕީޖީ އޮފީހުން ބުނެއެވެ.