ޖުމްހޫރީ ޕާޓީގެ ލީޑަރ އަދި މާމިގިލި ދާއިރާގެ ރައްޔިތުން މަޖިލީހުގެ މެމްބަރު ޤާސިމް އިބްރާހީމްގެ ވިލާ ޝިޕިން އިން ދައުލަތަށް 18 މިލިއަން ޑޮލަރު ދެއްކުމަށް އިންލެންޑް ރެވެނިއު އޮތޯރިޓީ، މީރާއިން އެންގުމުން މީރާއާ ދެކޮޅަށް ވިލާ ކުންފުނިން ސިވިލް ކޯޓަށް ހުށަހެޅުއްވި މައްސަލަ އެ ކޯޓުން ބޭރުކޮށްލައިފިއެވެ.
ސިވިލް ކޯޓުން އިއްޔެ ކުރި ޙުކުމެއްގައި ވިދާޅުވީ އެ މައްސަލަ ބޭރުކޮށްލަން ޖެހުނީ އެ މައްސަލާގައި ދަޢުވާކުރި ވިލާ ކުންފުނިން ޝަރީޢަތަށް ޙާޟިރުނުވުމުން ކަމަށެވެ. އަދި އެ ކުންފުނިން ޝަރީޢަތަށް ޙާޟިރުނުވީ މަޤްބޫލު އުޒުރެއް ނެތިކަން ސިވިލް ކޯޓުގެ ހުކުމްގައި ފަހަގަކޮށްފައިވެއެވެ. ވިލާ ޝިޕިންގެ އެކައުންޓުތައް ފްރީޒްކޮށް އެ ކުންފުނިން ދަޢުލަތަށް 18 މިލިއަން ޑޮލަރު ދެއްކުމަށް ބުނެ މީރާއިން އެކުންފުންޏަށް އަންގާފައިވަނީ މިދިޔަ މާޗް މަހުގެ 22 ވަނަ ދުވަހުއެވެ.
ސިވިލް ކޯޓަށް ވިލާ ޝިޕިން އިން އެ މައްސަލަ ވެއްދީ އެއީ އެކުންފުނިން ދައްކަން ނުޖެހޭ ފައިސާތަކެއް ކަމަށްބުނެއެވެ. މި މައްސަލައަކީ ކުރީގެ ރައީސް މުޙައްމަދު ނަޝީދުގެ ވެރިކަމުގައި ތ. އެލާ ވިލާ ޝިޕިންއަށް ކުއްޔަށް ދިން މައްސަލައެކެވެ. ވިލާ ޝިޕިންއަށް ކުރީގެ ރައީސް ނަޝީދުގެ ސަރުކާރުގައި ތ. އެލާ ކުއްޔަށް ދިނީ ރިސޯޓު ހުޅުވާ ތާރީހުން ފެށިގެން ކުލި ދައްކަން ޖެހޭ ގޮތަށެވެ. ނަމަވެސް ކުރީގެ ޓޫރިޒަމް މިނިސްޓަރ އަޙްމަދު އަދީބުގެ މިނިސްޓަރ ކަމުގެ ދަށުން ވަނީ އެ އެގްރީމަންޓް ބާތިލްކޮށްފައެވެ.
އެގްރީމަންޓް ބާތިލް ކުރެއްވި ސަބަބެއް ކަމަށް ވިދާޅުވީ ގުޑް ވިލް ނުވަތަ އިޚްލާސްތެރިކަން ދައްކާފައިނުވާތީ ކަމަށެވެ. އޭރު މީރާ އިން ވިލާ ޝިޕިންގްއަށް އަންގާފައި ވަނީ ކުލި މެދުކެނޑިފައި އޮތް ތާރީޚުން ފެށިގެން އެގްރީމެންޓް ބާތިލްކުރި ދުވަހާ ހަމައަށް ކުއްޔާއި ޖޫރިމަނާގެ ފައިސާ ދެއްކުމަށެވެ. އެ އެގްރީމަންޓް ބާތިލް ކުރެއްވި މައްސަލަ ވިލާ ޝިޕިން އިން ވަނީ ސިވިލް ކޯޓަށް ހުށަހަޅާފައި. އަދި ސިވިލް ކޯޓުން ހުކުމް ކުރެއްވީ އެގޮތަށް އެގްރީމަންޓް ބާތިލް ނުވާނެ ކަމަށެވެ. ނަމަވެސް ސިވިލް ކޯޓުން ދަޢުލަތުން ކުރެއްވި ޙުކުމް ހައިކޯޓުގައި އިސްތިއުނާފް ކުރެއްވުމުން ހައިކޯޓުންވަނީ ސިވިލް ކޯޓުގެ ޙުކުމް ބާތިލް ކުރައްވާފައެވެ.