ޗައިނާ މޯލްޑިވްސް ފްރެންޑްޝިޕް ބްރިޖް ގެ މަތީޑެކް ނުވަތަ ސްޕަރ ސްޓަރަކްޗާރގެ ބައިތަށް މިއަހަރުގެ ސެޕްޓެންބަރ މަހު ރާއްޖެ ގެނައުމަށް މަސައްކަތް ކުރައްވަމުން ގެންދަވާކަމަށް ހައުސިންގ މިނިސްޓަރ ޑރ މުހައްމަދު މުއީޒް ވިދާޅުވެއްޖެއެވެ.
މިނިސްޓަރ މިހެން ވިދާޅުވެފައިވާއިރު ބްރިޖްގެ ޑެކް ނުވަތަ ސްޕަރ ސްޓްރަކްޗަރ އެތުރުމަށް އެއްތަނބު އަނެއްތަނބާ ދެމެދު އަޅާ ބީމްތައް އެތުރުމުގެ މަސައްކަތް މިހާރުވަނީ ފަށާފައެވެ. ބްރިޖްގެ މާލެއާވީކޮޅުން އެޕްރޯޗް ބްރިޖުން މި މަސައްކަތް ފަށާފައިވާއިރު ބްރިޖްގައި ޖުމުލަ 240 އައިބީމް އަޅާނެއެވެ. އެޕްރޯޗް ބުރިޖްގެ ތަނބުތަކުގެ މަސައްކަތުގެ ބޮޑުބައި ނިމިފައިވާއިރު މެއިން ބްރިޖަށް ބޭނުންވާ މައި ތަނބުތަކުގެ މަސައްކަތުގެ ބޮޑުބައެއްވެެސް ވަނީ ނިމިފައެވެ.
ކަނޑަށް ޖަހާފައިވާ މައިތަނބުތަކުގައި މިހާރު ކުރިޔަށް ދަނީ ވީއަކުރުގެ ސިފަޔަށް ހުންނަ ކެޕްތަކުގެ މަސައްކަތްތަކެވެ. ތަނބުތަކުގެ މަސައްކަތް ނިމުމުން ބީމެއްގެ އެހީގައި އެއްތަނބު އަނެއްތަނބާ ގުޅާލެވޭނެއެވެ. އެއަށްފަހު ޗައިނާގައި ތައްޔާރުކުރަމުންގެންދާ ސްޕަރ ސްޓްރަކްޗަރ ނުވަތަ ޑެކްގެ ބައިތައް ބީމްތަކުގެ މަތީގައި އަތުރާލެވޭނެއެވެ.
ބްރިޖްގެ މަސައްކަތާގުޅޭގޮތުން ވާހަކަފުޅު ދައްކަވަމުން ހައުސިންގ މިނިސްޓަރ ޑރ.މުޙައްމަދު މުއިޒް ވިދާޅުވީ މިއަހަރު ނިމުމުގެ ކުރިން އެޕްރޯޗް ބްރިޖްގެ ބޮޑުބައެއް ނިންމާލެވޭނެކަމަށެވެ. އަދި ޗައިނާގައި ތައްޔާރު ކުރަމުންގެންދާ ސްޕާރ ސްޓަރަކްޗާރގެ ބައިތައްވެސް ލަސްތަކެއްނުވެ ރާއްޖެ ގެނެވޭނެކަމަށެވެ.
ތަފާސް ހިސާބުތަކަށް ބަލާއިރު ހުޅުމާލެއާއި ހުޅުލެއާ ދެމެދު ދުވާލެއްގެ މައްޗަށް 20،000 މީހުން ދަތުރުކުރެއެވެ. އަދި ހުޅުލެއާއި މާލެއާ ދެމެދު ތިރީހަކަށް ހާސްމީހުން ދަތުރުކުރެއެވެ. އެހެންކަމުން ނިސްބަތުން ބަލާއިރު ދުވާލެއްގެ މައްޗަށް ބްރިޖްގެ ބޭނުން ފަންސާހަކަށް ހާސް މީހުން ކުރާނެ ކަމަށް ލަފާކުރެވެއެވެ.
ބްރިޖަކީ ތަރައްޤީއަށް އެޅިގެންދާ ފާލަމެއްގެ ގޮތުގައި ސިފަކުރައްވަމުން ހައުސިންގ މިނިސްޓަރ ވިދާޅުވީ ބްރިޖްގެ ސަބަބުން އެތައް ގޮތަކުން ފައިދާވެގެންދާނެކަމަށެވެ. ހުޅުމާލޭގައި ދިރިއުޅޭފަރާތްތަކަށާއި ހުޅުލެއަށް ކަނޑުމަގުން ދަތުރުކުރާ ފަރާތްތަކަށް ބުރިޖްގެ ސަބަބުން ފަސޭހަތަކެއް ލިބިގެންދާއިރު އިންވެސްޓަރުންގެ ސައުގުވެރިކަން ބްރީޖްއާއިކު ބޮޑުވެގެންދާނެކަމަށް ހައުސިންގ މިނިސްޓަރ ވިދާޅުވިއެވެ.
ރާއްޖޭގައި ވޭތުވެދިޔަ ސަރުކާރުތަކުންވެސް ބްރިޖެއް އެޅުމާގުޅޭ ވާހަކަތަކެއް ދެކެވުނު ނަމަވެސް، އެ ހުވަފެން ދިވެހި ރައްޔިތުންނަށް ހަޤީޤަތަކަށް ހައްދަވައިދެއްވަނީ ރައީސް ޢަބްދުﷲ ޔާމީންކަން ހައުސިންގ މިނިސްޓަރ ފާހަގަކުރެއްވިއެވެ.
ބްރިޖްގެ މަސައްކަތް ހަލުވިކަމާއެކު ކުރިޔަށްދާއިރު މަސައްކަތުގެ ކޮލިޓީ ވަރަށް ފުރިހަމައަށް މޮނިޓަރކޮށް ބަލަމުން އަންނަ ކަމަށާއި ފުރިހަމަ ބުރިޖެއްގެ ގޮތުގައި އެންމެ ލަސްވެގެން އަންނަ އަހަރުގެ ސެޕްޓެމްބަރުގައި ބްރިޖް ފެނިގެންދާނެކަމަށް މިނިސްޓަރ ވިދާޅުވިއެވެ. އަދި މިހާރު މަސައްކަތް ދާ ސްޕީޑްގައި ދާނަމަ ޖުލައި 26 އަށް ނިންމާނެ ކަމަށާއި އެއީ ރާއްޖޭގެ މިނިވަން ދުވަހަށްވުމުން މިމަސައްކަތުގައި ޝާމިލުވެ އޮތް ފަރާތުން ވެސް އެކަމަށް ބޭނުންވާ ކަމަށް މިނިސްޓަރ މުއިޒް ވިދާޅުވިއެވެ.