ކަލްނަރީ ޗެލެންޖް ހޮފެކްސް 2017 ގައި ވާދަކޮށް ދިވެހި ދެ ޝެފުން ރިހި މެޑަލް ހޯދައިފިއެވެ.
މި މުބާރާތުގައި ރާއްޖޭގެ ފަރާތުން ބައިވެރިވި 3 ބައިވެރިންގެ ތެރެއިން ރިހި މެޑަލް ހޯދާފައިވަނީ ބަނޑޮސް އައިލެންޑް ރިސޯޓްގެ ޝެފް އަހުމަދު ފަތީން އާއި ހުޅުލެ އައިލެންޑް ހޮޓެލްގެޝެފް އިސްމާއިލް ނާސިރުއެވެ. މި މަހުގެ އަށަކުން އެގާރައަށް ހޮންކޮންގ ގައި ކުރިއަށްދިޔަ މި މުބާރާތުގައި ދުނިޔޭގެ އެކި ޤައުމުތަކުން އަށްސަތޭކައަށް ވުރެ ގިނަ ޝެފުން ވާދަކޮށްފައިވެއެވެ. ރާއްޖޭގެ ބައިވެރިން ހޮސްޓްކޮށްފައިވަނީ ބެސްޓް ބައި މޯލްޑިވްސް އާއި މޯލްޑިވްސް އެގްޒިބިޝަން އެންޑް ކޮންފަރެންސް، "މެކްސް"އެވެ.
ބެސްޓް ބައި މޯލްޑިވްސްގެ މާރކެޓިންގ މެނޭޖަރ އަލީ އަފްރާހް ބުނީ ހޮޓަލް އިންޑަސްޓްރީ ދާއިރާ ކުރިއަރުވައި މި ދާއިރާގައި މަސައްކަތްކުރާ ފަރާތްތަކަށް ފަހި ފުރުޞަތުތަކެއް ހޯދައި ދިނުމަށް އެ ކުންފުނިން އަބަދުވެސް މަސައްކަތް ކުރަމުންދާކަމަށެވެ.
ހޮފެކްސް ކަލްނަރީ ޗެލެންޖްގައި ބައިވެރިވި ދިވެހި ޝެފުން ބުނީ މީގެ ކުރިން ވެސް ބައިނަލް އަޤްވާމީ ކެއްކުމުގެ އެކި މިބާރާތްތަކުގައި ބައިވެރިވި ނަމަވެސް މީ މުޅިން ތަފާތު ތަޖުރިބާތަކެއް ލިބިގެންދިޔަ މުބާރާތެއްކަމަށެވެ. ކަލްނަރީ ޗެލެންޖް ހޮފެކްސް 2017 ގައި ރާއްޖޭގެ ފަރާތުން ބައިވެރިވި ތިން ޝެފުން ވަނީ މީގެކުރިންވެސް މިފަދަ ބައެއް މުބާރާތްތަކުގައި ވާދަކޮށް ވަނަތައް ހާސިލްކޮށްފައެވެ.