ހުޅުމާލޭ ދެވަނަ ފިޔަވަހިން ބީލަމުގެ އުޞޫލުން ވިއްކުމަށް ހަމަޖެހިފައިވާ ބިން ގަންނަން ބޭނުންވާ ފަރާތްތަކަށް ބީލަން ހުށައެޅުމަށް ރަޖިސްޓްރީވުމުގެ ފުރުޞަތު މާދަމާ ހުޅުވާލާނެކަމަށް ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީއިން ބުނެފިއެވެ.
ހުޅުމާލޭ ދެވަނަ ފިޔަވަހިން ވިއްކުމަށް ހަމަޖެހިފައިވަނީ 101،954.33 އަކަފޫޓު ބޮޑުމިނުގެ ބިމެކެވެ. ބިން ގަންނަން ބޭނުންވާ ފަރާތްތަކަށް ބީލަން ހުށައެޅުމަށް ރަޖިސްޓްރީވުމުގެ ކަންކަން ކުރިއަށްދާނީ މާދަމާ ހެނދުނު 9 ން މެންދުރުފަހު 3 ޖެހުމާ ހަމައަށް، ހޮޓެލް ޖެންގެ ދެވަނަ ފަންގިފިލާގެ ބޯލްރޫމްގައިކަމަށް އެޗް.ޑީ.ސީއިން ބުނެއެވެ. 18 އަހަރުން މަތީގެ ކޮންމެ ދިވެހި ރައްޔިތަކަށްވެސް މި ބީލަމުގައި ބައިވެރިވުމުގެ ފުރުޞަތު އެކުންފުނިން ވަނީ ހުޅުވާލާފައެވެ.
އެޗް.ޑީ.ސީއިން ބުނީ، ހުޅުމާލޭ ދެވަނަ ފިޔަވަހިން ބިން ގަންނަން ބޭނުންވާ ފަރާތްތަކަށް ގަންނަން ހުށައެޅޭ ބިމުގެ ބޮޑުމިނަކީ 2،000 އަކަފޫޓާއި، 6،000 އަކަފޫޓާ ދެމެދު ބިމެއްކަމުގައެވެ. ބީލަން ފެށޭ އަގަކީ އަކަފޫޓަކަށް 3،000 ރުފިޔާކަމަށާއި، ބިޑް ސެކިއުރިޓީގެ ގޮތުގައި 2،000 އަކަފޫޓަށް 300،000 ރުފިޔާ އަދި އިތުރުވާ ކޮންމެ 1،000 އަކަފޫޓަކަށް 100،000 ރުފިޔާ ދަންކަންޖެހޭނެކަމަށް އެކުންފުނިން ބުނެއެވެ. އަދި އިކުއިޒިޝަން ފީއެއްގެ ގޮތުގައި ބިމުގެ ޖުމްލަ އަގުގެ 5 އިންސައްތަ ދަންކަންޖެހޭނެއެވެ.
img:http://s4.psmnews.mv/images/660x400/14636741202673.jpg|ހުޅުމާލެ ދެވަނަ ފިޔަވަހީގެ ދަށުން ހިއްކި ބިން /
ހުޅުމާލޭ ދެވަނަ ފިޔަވަހިން ބިން ވިއްކުމަށް ހަމަޖެހިފައިވަނީ އެންމެ މަތިން އަގު ހުށައަޅާ ފަރާތްތަކަށްކަމަށާއި، އެއްފަހަރާ އަގު އަދާކުރާ ފަރާތްތަކަށް އިސްކަންދެވޭނެ ކަމަށްވެސް އެޗް.ޑީ.ސީއިން ބުނެއެވެ. ބިން ގަންނަން ބޭނުންވާ ފަރާތްތަކުގެ ތެރެއިން، އެއްފަހަރާ އަގު އަދާކުރާ ފަރާތްތަކަށް 3 ހަފްތާ އަދި ތާރޑް ޕާޓީ ފައިނޭންސް އުޞޫލުން ފައިސާ ދައްކަން ބޭނުންވާ ފަރާތްތަކަށް 3 މަސް ދުވަހުގެ މުއްދަތެއް އެކުންފުނިން ދީފައިވެއެވެ.
ހުޅުމާލޭ ދެވަނަ ފިޔަވަހިން ބިން ގަންނަން ބޭނުންވާ ފަރާތްތަކަށް ބީލަން ހުށައެޅުން އޮންނާނީ މިފެށޭ ފެބްރުއަރީމަހުގެ 6 ވަނަ ދުވަހުގެ މެންދުރު ބާރައިގެ ކުރިންނެވެ. އަދި ބީލަން ހުޅުވުން އޮންނާނީ ހަމަ އެދުވަހުގެ މެންދުރު އެކަކުން ފެށިގެން ތިނެއް ޖެހުމާ ހަމައަށްކަމަށްވެސް އެޗް.ޑީ.ސީއިން ބުނެއެވެ.