މާލެ ހުޅުލެ ބްރިޖްގައި ދަތުރުކުރާ ވެހިކަލްތަކުން ފީ ނެގުމަށްޓަކައި ޤާއިމްކުރައްވާ އިލެކްޓްރޯނިކް ޓޯލް ނިޒާމްގެ ޑިޒައިނިންގ މަސައްކަތް ބަޔަކާއި ހަވާލުކުރައްވައިފިއެވެ.
ހައުސިންގ މިނިސްޓަރ ޑޮކްޓަރ މުޙައްމަދު މުޢިއްޒު ވިދާޅުވީ ބްރިޖްގެ މަޝްރޫއު ނިމެންވާއިރަށް ވެހިކަލްތަކާއި ބެހޭ ނިޒާމެއް ޤާއިމުކުރުމުގެ ގޮތުން އިލެކްޓްރޯނިކް ޓޯލް ނިޒާމެއް ޤާއިމުކުރުމަށް ޑިޒައިނިންގ މަސައްކަތް، ބްރިޖްގެ މަޝްރޫއު ހިންގަމުން އަންނަ ޗައިނާގެ ސީ.ސީ.ސީ.ސީ ސެކަންޑް ހާބަރ އިންޖިނިއަރިންގ އާއި ޙަވާލުކުރައްވާފައިވާކަމަށެވެ. މިނިސްޓަރ ވިދާޅުވީ ޒަމާނީ ފެންވަރެއްގައި މިކަން ޤާއިމުކުރުމުން ބްރިޖްގައި ދަތުރުކުރާ ވެހިކަލްތަކުން ދައްކަންޖެހޭ ޓޯލް ކެނޑިގެންދާނީ އޮޓެމެޓިކް ނިޒާމެއްގެ ތެރެއިންކަމަށެވެ. މިގޮތަށް ހަމަޖެއްސުމުން ޓްރެފިކަށްވެސް އިތުރު ލުޔެއް ލިބިގެންދާނެކަމަށް މިނިސްޓަރ ވިދާޅުވިއެވެ.
މީގެ އިތުރަށް މާލެ ހުޅުލެ ގުޅުވައިދޭ ބްރިޖްގެ މައި ތަނބުގައި ޖަހަންޖެހޭ ފައުންޑޭޝަން ޕައިލްގެ މަސައްކަތްތައްވެސް ކަނޑައަޅާފައިވާ މުއްދަތަށް ނިންމުމަށް މަސައްކަތް ކުރަމުންދާކަމަށްވެސް ހައުސިންގ މިނިސްޓަރ ވިދާޅުވިއެވެ.