އައްޑޫސިޓީ ގަން އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢަކީ އައްޑޫސިޓީގެ އިތުރުން ކައިރި އަތޮޅުތަކުގެ ތަރައްޤީއަށް އެންމެ ބޮޑު ބާރެއް ލިބިގެންދާނޭ އެއް މަޝްރޫޢުއެވެ. ސަރުކާރުން ވިދާޅުވާ ގޮތުގައި ގަން އިންޓަރނޭޝަނަލް އެއަރޕޯޓް ތަރައްޤީގެ މަޝްރޫއު ނިމުމާއެކު، ދެކުނުގެ އަތޮޅުތަރައްޤީއަށް ކުރިމަތިވެފައިވާ ދަތިތަކަށް ބޮޑު ޙައްލެއް ލިބިގެންދާނެއެވެ.
އައްޑޫސިޓީގެ ޓޫރިޒަމް ތަރައްޤީއާ ބެހޭގޮތުން ޓޫރިޒަމް މިނިސްޓަރ މޫސާ ޒަމީރު ވިދާޅުވެފައިވަނީ، އައްޑޫ ސިޓީގައި މިހާރު ހިންގަމުން އަންނަ ރިސޯޓްތަކަށް ފަތުރުވެރިން ގެނައުމުގައި ދިމާވެފައިވާ އެންމެ ބޮޑު ދައްޗަކީ ޔޫޕަރަޕްގެ ޤައުމުތަކުން ސީދާ ފްލައިޓްތައް ގަމަށް ޖެއްސުމުގައި ހުރި ދަތިތައްކަމަށެވެ. މިނިސްޓަރ ވިދާޅުވެފައިވަނީ، ގަން އިންޓަރނޭޝަނަލް އެއަރޕޯޓްގެ ރަންވޭ ތަރައްޤީކުރުމަށް ކުރިއަށްގެންދާ މަޝްރޫޢުގެ މަސައްކަތް ނިމުމުން، އައްޑޫސިޓީ އާއި ދެކުނުގެ ޓޫރިޒަމް ވަރަށްބޮޑަށް ފުޅާވެގެންދާނޭކަމަށެވެ.
ރާއްޖޭގެ ފަތުރުވެރިކަމުގެ ސިނާޢަތުގައި ޙަރަކާތްތެރިވާ ފަރާތްތަކުން ހާމަކުރައްވާގޮތުގައި ގަން އިންޓަރނޭޝަނަލް އެއަރޕޯޓްގެ ތަރައްޤީގެ މަޝްރޫޢުގެ މަސައްކަތް ނިމި އެ އެއަރޕޯޓަށް ބައިނަލްއަޤްވާމީ އެކި ކަންކޮޅުތަކުން އަންނަ ބޮޑެތި ބޯޓްތައް ޖައްސަން ފެށިގެންދިއުމުން، ދެކުނުގެ އަތޮޅުތަކުގައި ރިސޯޓްތައް ތަރައްޤީކުރުމަށް އިންވެސްޓަރުންގެ ޝައުޤުވެރިކަން އިތުރުވެގެންދާނެއެވެ. އައްޑޫސިޓީއާއި ދެކުނުގެ އަތޮޅުތަކުގައި ގިނަ ރިސޯޓްތައް ތަރައްޤީކުރެވިއްޖެނަމަ، ގިނަ ޢަދަދެއްގެ ވަޒީފާ އުފެދި، އެކަމުގެ ސަބަބުން އެހިސާބުގެ ރަށްތަކުގައި ދިރިއުޅެމުންދާ ޢާއްމު ރައްޔިތުންގެ ދިރިއުޅުމަށް ބޮޑެތި ކުރިއެރުންތަކެއް ލިބިގެންދާނެއެވެ.
img:http://s3.psmnews.mv/images/660x400/14792258441307.jpg|އައްޑޫ ސިޓީ ގަމުގެ ސީޕްލޭން އެއިިރޯޑޯމްގައި ޓީއެމްއޭގެ ސީޕްލޭނެއް - ފޮޓޯ: މޯލްޑިވިއަން ޕްލޭން ސްޕޮޓަރސް
އައްޑޫ އިންޓަނޭޝަނަލް އެއަރޕޯޓް ހުޅުވުމުގެ އެންމެފަހުގެ ތައްޔާރީތައް ކުރިއަށްދާއިރު، އެއަރޕޯޓްގެ ރަންވޭ ވަނީ ތިންހާސް ހަތަރުސަތޭކަ ފޫޓަށް ދިގުކޮށް، ފަސްދޮޅަސް މީޓަރަށް ފުޅާކޮށްފައެވެ. ގަން އެއަރޕޯޓް ތަރައްޤީކޮށް ނިމުމުން ބޮއިން ހަތެއް ހަތެއް ހަތެއް މަރުކާގެ ބޮޑެތި ބޯޓްފަހަރަށް ޖެއްސޭނެއެވެ. އައްޑޫ އިންޓަނޭޝަނަލް އެއަރޕޯޓް ކުންފުނިން ވިދާޅުވާގޮތުގައި އެއަރޕޯޓް ތަރައްޤީކުރުމަށް ފަށާފައިވާ އިންވެސްޓްމަންޓްގެ ޖުމްލަ އަގު ސާޅީސް ފަސް މިލިއަން ޑޮލަރަށް އަރާކަމަށެވެ.
ގަން އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢުގެ ދަށުން މިހާރުވަނީ އައްޑޫސިޓީގައި ސީޕްލޭންގެ ޚިދުމަތް ރަސްމީކޮށް އިފްތިތާޙުކޮށްފައެވެ. އައްޑޫސިޓީއަށް ސީޕްލޭންގެ ޚިދުމަތް ރަސްމީކޮށް އިފްތިތާހުކޮށްފައިވަނީ، ލަންޑަނުގައި ކުރިއަށްދިޔަ ޑަބްލިޔު.ޓީ.އެމް ފެއަރގެ ތެރޭގައެވެ. ގަމުގައި ސީޕްލޭން އޮޕަރޭޓްކުރުމުގެ ޚިދުމަތްދޭ ޓްރާންސް މޯލްޑިވިއަން އެއަރވޭސްއިން ބުނީ އައްޑޫގައި އަލަށް ތަޢާރަފުކުރެވިގެންދާ ސީޕްލޭންގެ ޚިދުމަތާއެކު، އެ ސަރަޙައްދުގައި ފަތުރުވެރިކަން އިޝްތިހާރުކުރުމަށް ކުރަމުންދާ މަސައްކަތްތަކަށް އިތުރު ކުރިއެރުންތަކެއް ލިބިގެންދާނެކަމަށެވެ. އަދި ގަން އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢާއެކު، ކުރިއަށްއޮތްތާނގައި އެ ސަރަޙައްދަ ޒިޔާރާތްކުރާ ފަތުރުވެރިންގެ ނިސްބަތްގިނަވެ، ސީޕްލޭންގެ ޚިދުމަތަށް އޮންނަ ޑިމާންޑް އިތުރުވެގެންދާނެކަމަށް ޓީއެމްއޭއިން ބުނެއެވެ. އަދި އެ ސަރަޙައްދުގެ ޓްރެފިކް ޖާގަދިން މިންވަރަކުން ފުވައްމުލަކާއި، ހުވަދުއަތޮޅުގެ ރަށްތަކަށްވެސް ދަތުރުކުރުމަށް ހަމަޖެހިފައިވާ ކަމަށްވެސް ޓީ.އެމް.އޭއިން ވަނީ ހާމަކޮށްފައެވެ.
އެހެންކަމުން މިއީ އައްޑޫސިޓީއާއި ދެކުނުގެ އަތޮޅުތަކުގައި ދިރިއުޅެމުންދާ ރައްޔިތުންނަށްވެސް ލިބިގެންދާނޭ ވަރަށްބޮޑު ކުރިއެރުމެއްކަމަށް އެފަރާތްތަކުން ފާހަގަކުރެއެވެ.