ތިލަފުށިން އަލަށް ހިއްކާފައިވާ ސަރަޙައްދުން ބިން ކުއްޔަށް ހިފުމަށް ބޭނުންވާ ފަރާތްތަކަށް ޝައުޤުވެރިކަން ފާޅުކުރުމުގެ ފުރުޞަތު ހުޅުވާލައިފިއެވެ.
ތިލަފުށި ކޯޕަރޭޝަން ލިމިޓެޑުން ބުނީ ކ.ތިލަފުށީގެ އަލަށް ހިއްކާފައިވާ ތިލަފުށި އިންޑަސްޓްރިއަލް ޒޯން ސަރަހައްދުން، ގުދަންކުރުމަށާއި ޞިނާޢީ މަސައްކަތްތަކަށް ޓީ.އައި.ޒެޑް ސަރަޙައްދުން 1,300 އަކަފޫޓާއި 20,000 އަކަފޫޓާ ދެދުގެ ޖުމްލަ 40 ބިން ކުއްޔަށް ދޫކުރުމަށް ވަނީ ނިންމާފައިވާކަމަށެވެ.
ޒޯންތަކުގައި ކުރުމަށް ތިލަފުށި ކޯޕަރޭޝަނުން ބާރުއަޅާ މަސައްކަތްތަކުގެ ލިސްޓެއްވެސް އެ ކޯޕަރޭޝަނުންވަނީ އާއްމުކޮށްފައެވެ. އެ ލިސްޓުގައި ހިމެނޭ ކަންތައްތަކުގެ ތެރޭގައި، އަލިފާން ނުހިފާޒާތުގެ ތަކެތި، ކާނާގެ ބާވަތްތައް ނޫން ތަކެތި ގުދަންކުރުން، ފަރުނީޗަރު ގުދަންކުރުން، ކޯލްޑް ސްޓޯރޭޖް، މޮޓޯރ ވެހިކަލް ގުދަންކުރުން ފަދަ ކަންތައްތައް ހިމެނެއެވެ. ބިން ކުއްޔަށް ހިފަން ޝައުގުވެރިވާ ފަރާތްތަކުން ބިމުގައި ކުރަން ބޭނުންވާ މަސައްކަތް އަދި މަސައްކަތަށް އެކަށީގެންވާ ބިމުގެ ބޮޑުމިން ބަޔާންކޮށް ތިލަފުށި ކޯރޕަރޭޝަނަށް މި މަހުގެ 22 ވަނަދުވަހުގެ ކުރިން ހުށަހަޅަން ޖެހޭނެ ކަމަށް އެކޯރޕަރޭޝަނުން ހާމަކުރެއެވެ. އަދި، ބިން ކުއްޔަށް ހިފުމަށް ޝައުޤުވެރިކަން ފާޅުކުރައްވާ ފަރާތްތަކުން އެ ކޯރޕަރޭޝަނުން ބަޔާންކޮށްފައިވާ ލިސްޓުގައި ނުހިމެނޭ މަސައްކަތެއް ކުރުމަށް ޝައުޤުވެރިވެލައްވާނަމަ، އެކަމަކާ ގުޅޭގޮތުން ޚިޔާލު ހުށަހެޅުމުގެ ފުރުޞަތުވެސް ހުޅުވާލެވިފައިވާ ކަމަށް، ތިލަފުށި ކޯރޕަރޭޝަނުން މަޢުލޫމާތުދެއެވެ.