ޔޫއެފާ ނޭޝަންސް ލީގުގެ ގްރޫޕް 1 ގައި ރޭ ފްރާންސް އާއި ދެކޮޅަށް އިޓަލީ ކުޅުނު މެޗު 1-1 ގެ ނަތީޖާއަކުން ދެ ޓީމު އެއްވަރުވެއްޖެއެވެ.
ޕެރިހުގެ ސްޓޭޑް ޑި ފްރާންސްގައި 77 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗު އެއްވަރުވިއިރު ފްރާންސް އަށް ވަނީ ގްރޫޕްގައި މިހާތަނަށް ކުޅުނު ތިން މެޗުން ލިބިފައިވާ 7 ޕޮއިންޓާއެކު އެއްވަނަ މަގާމް ލިބިފައެވެ. އިޓަލީއަށް ލިބިފައިވާ ހަތަރު ޕޮއިންޓާއެކު އެ ޓީމު އޮތީ ތިންވަނައިގައެވެ.
ފްރާންސްގެ ކޯޗު ކަމާއި ޒިނެޑީން ޒިދާން ހަވާލުވުމަށްފަހު އަމިއްލަ ގައުމުގައި ކުޅުނު ފުރަތަމަ މެޗުގައި ފްރާންސް އިން ވަނީ ރަގަޅު ކުޅުމެއް ދައްކާފައެވެ.
މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ޖެހިފައިނުވި ނަމަވެސް ދެވަނަ ހާފުގެ ކުޅުން ފެށުނުތާ 10 ވަނަ މިނިޓުގައި ފްރާންސް އިން ވަނީ ލަނޑެއް ޖަހާ ކުރި ހޯދާފައެވެ. މި ލަނޑަކީ އެ ޓީމަށް ލިބުނު ހިލޭ ޖެހުމެއް ރަޔާން ޗާކީ ނަގައިދިން ވަގުތު މައިކަލް އޮލިސޭ ފޮނުވާލި ބޯޅަ ގޯލުގެ ހުރަސް ދަނޑީގައި ޖެހިފައި ގޯލުގެ ތެރެއަށް ވަދެގެން ކާމިޔާބުކޮށްފައިވާ ލަނޑެކެވެ.
މި މެޗުގައި އޮލިސޭ ޖެހި ލަނޑާއެކު މި އަހަރުގެ ތެރޭގައި އޭނާ ވަނީ ފްރާންސް އަށް ކުޅުނު 15 މެޗުގައި 14 ލަނޑު ޖެހުމުގައި ބައިވެރިވެފައެވެ.
އިޓަލީ އިން މެޗުގެ ނަތީޖާ އެއްވަރުކޮށްފައިވަނީ މެޗުގެ 68 ވަނަ މިނިޓުގައި އަލެސަންދްރޯ ބަސްޓޯނީ ކާމިޔާބުކޮށްދިން ލަނޑުންނެވެ.
މެޗުގެ ފުރިހަމަ ވަގުތު ހަމަވާން 5 މިނިޓަށް ވެފައިވަނިކޮށް ފްރާންސްގެ ޑަޔޮޓް އުޕަމެކާނޯ އަށް ރެފްރީ ވަނީ ދެވަނަ ރީނދޫ ކާޑަކާއިއެކު ރަތް ކާޑެއް ދައްކާ ދަނޑުން ފޮނުވާލާފައެވެ.
މި ގްރޫޕްގެ ދެވަނައިގައި އޮތް ބެލްޖިއަމް އަށް 6 ޕޮއިންޓް ލިބިފައިވާއިރު އެ ޓީމު ވަނީ ރޭ ތުރުކީ އާއި ދެކޮޅަށް މި ގްރޫޕްގައި ރޭ ކުޅުނު މެޗު 3-0 ގެ ނަތީޖާއަކުން ކާމިޔާބުކޮށްފައެވެ.
މި މެޗުގައި ބެލްޖިއަމް އިން ޖެހި ތިން ލަނޑުގެ ތެރެއިން ދެ ލަނޑު ކެވިން ޑެބްރޫނިޔާ ކާމިޔާބުކުރިއިރު އަނެއް ލަނޑަކީ ރޮމެލޫ ލުކާކޫ ކާމިޔާބުކޮށްދީފައިވާ ލަނޑެކެވެ.