ދުނިޔޭގެ ބާޒާރުގައި ތެލުގެ އަގުތައް ތިރިކުރުމަށް އިޤްތިޞާދީ ގޮތުން ކުރިއަރާފައިވާ ޤައުމުތަށް ކަމަށްވާ ޖީ7ގެ ޤައުމުތަކުން ރޭވުންތެރިކަމާއެކު މަސައްކަތް ކުރުމަށް އެއްބަސްވެއްޖެއެވެ.
ޖީ7ގެ ޤައުމުތަކުގެ އިސްވެރިން ވަނީ ތެޔޮ އުފެއްދުމަށް ފުރުޞަތުތައް ފަހިކުރުމުގެ އިތުރުން، އެ ޤައުމުތަކުން ރިޒާވްގެ ގޮތުގައި ރައްކާކޮށްފައި ހުރި ތެލުގެ ތެރެއިން 100 މިލިޔަން ފީފާގެ ތެޔޮ ކުރިއަށް އޮތް ހަތަރު މަސް ދުވަހުގެ ތެރޭގައި ދޫކުރުމަށް އެއްބަސްވެފައެވެ. އަދި ޖީ7ގެ ޤައުމުތަކުގެ މެދުގައި ހަކަތަ އެކްސްޕޯޓު ކުރުމުގެ ދާއިރާއިން ފުރުޞަތުތައް ހަނި ނުކުރުމަށް ވަނީ އެއްބަސްވެފައެވެ.
100 މިލިޔަން ފީފާގެ ތެޔޮ ބާޒާރަށް ނެރުމަށް ހަމަޖެހިފައި ވަނީ 4 މަސް ދުވަހުގެ މަތިން ކަމަށް ވި ނަމަވެސް ފުރަތަމަ 20 ދުވަހުގެ ތެރޭގައި އޭގެ ތެރެއިން ގިނަ ޢަދަދެއް ފޯރުކޮށްދޭނެ ކަމަށް އެ ޤަުމުތަކުން ބުނެއެވެ. އެ މަސައްކަތް ވިލަރެސް ކުރާނީ ބައިނަލްއަޤްވާމީ ހަކަތައާބެހޭ އިދާރާ، އައިއީއޭއިންނެވެ.
ޖީ7ގެ އިސްވެރިން ބައްދަލުކުރައްވާފައި މި ވަނީ އެމެރިކާގައި ތެލުގެ އަގު މަތިވުމާ ގުޅިގެން، އަގުތައް ކޮންޓްރޯލް ކުރުމަށް ޑީސެލް އެކްސްޕޯޓުކުރުން މަނާ ކުރާނެ ކަމުގެ އިންޒާރު، އެ ޤައުމުގެ ރައީސް ޑޮނަލްޑް ޓްރަމްޕް ދެއްވާފައި ވަނިކޮށެވެ. ވިލާތުގެ ޤައުމުތަކުން ރައްކާކޮށްފައި ހުރި ރިޒާވް ސްޓޮކް ދޫނުކުރާ ނަމަ އެ ގޮތަށް ޢަމަލުކުރައްވާނެ ކަމަށް ޓްރަމްޕް ވަނީ ވިދާޅުވެފައެވެ.
އިނގިރޭސިވިލާތުގައި ޑީސެލްގެ އަގު ވަނީ ރެކޯޑު މިންވަރަކަށް އުފުލިފައެވެ. އެ ޤައުމުގައި ޑީސެލް ލީޓަރެއްގެ އަގު މި ވަގުތު ހުރީ 2 ޕައުންޑު ނުވަތަ 47 ރުފިޔާއަށެވެ. ނަމަވެސް އިނގިރޭސިވިލާތުގެ ދަތުރުފަތުރާބެހޭ ވަޒީރު ވިދާޅުވަނީ ތެލުގެ ސަޕްލައި ތިޔާގި ކަމަށާއި، ގިނަ ޢަދަދެއްގެ ވަސީލަތްތައް އެ ޤައުމަށް ލިބިގެންވާ ކަމަށެވެ.
ޖީ7ގެ ޤައުމުތަކުން ވަނީ ބޭނުން ޖެހިއްޖެ ނަމަ އެ ޤައުމުތަކުން އިތުރު ޑީސެލް ބާޒާރަށް ނެރުމާ މެދު ވިސްނާނެ ކަމަށް ވެސް ބުނެފައެވެ.