ރަސްމާލޭގެ މެރީނާ މަޝްރޫޢު: ތަނަވަސްކަމަށް އިންޤިލާބީ ބަދަލެއް އަންނާނެ

ރަސްމާލެ މަޝްރޫޢުއަކީ ރާއްޖޭގެ ރައްޔިތުންގެ ތަނަވަސްކަމަށް އަންނާނެ އިންޤިލާބީ ބަދަލެއް ކަމަށް ބިނާރާއި ގެދޮރުވެރިކަމާއި އުމްރާނީ ތަަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ. ރަސްމާލޭގެ އެއްފަޅީގައި ކުރިއަށް ގެންދަން ނިންމާފައިވާ މޯލްޑިވްސް ވޯޓަރ ފްރޮންޓް އެންޑް މެރީނާ މަޝްރޫޢުއަކީ ރާއްޖޭގައި މިހާތަނަށް ބޭރުގެ ފަރާތުން ކުރިއަށް ގެންދަން ހުށަހަޅާފައިވާ އެންމެ ބޮޑު މަޝްރޫޢުއެވެ.

ރަސްމާލޭގައި އަބޫދާބީގައި ހިންގަމުންދާ އީގަލް ހިލްސް ކުންފުނިން ރާވަމުންދާ މަޝްރޫޢު އަކީ ރާއްޖޭގެ އިޤްތިޞާދު ސިންދަފާތު ކުރުމަށް ކުރިއަށް ގެންދަން ރާވަފައިވާ މަޝްރޫޢު އަކީ 20 ބިލިޔަން ޑޮލަރު ބިޔަ މަޝްރޫޢުއެކެވެ. ސަރުކާރުން ވަނީ މިމަޝްރޫޢު ސަބަބުން ދިވެހިރާއްޖެއަށް ބޮޑު ފައިދާއެއްކުރާނެ ކަމަށް ވިދާޅުވެފައެވެ.

މިފަދަ ބިޔަ މަޝްރޫޢު ކުރިއަށް ގެންދާއިރު މިއީ އިޤްތިޞާދު ސިންދަފާތުކުރުމަށް ކުރިއަށް ގެންދެވޭ މަޝްރޫޢުއެއް ގޮތުގައި ބިނާރާއި ބެހޭ ވަޒީރު އަބްދުﷲ މުއްޠަލިބު ވަނީ ފާހަގަކުރައްވާފައެވެ. ޕީއެސްއެމްއިން އަށް މައުލޫމާތު ދެއްވަމުން ވަޒީރު ވަނީ ރާއްޖޭގެ އިޤްތިޞާދު ސިންދަފާތު ކުރާނަމަ، ރާއްޖޭގައި ހުރި ވަސީލަތްތައް ބޭނުން ކުރަންޖެހޭ ކަމަށެވެ. އެ މަގަށް ވިސްނާއިރު، މިހާރު ރައްޖޭގެ ފަތުރުވެރިކަމުގެ ސިނާޢަތް ކުރިއަރާފައިވާ ސަރުކާރުން މިމަޝްރޫޢޫ ކުރިއަށް ގެންދާނީ އެއާއި ގުޅޭނެ ގޮތަށް ކަމަށް ވަޒީރު ވިދާޅުވިއެވެ.

ވަޒީރު މުއްޠަލިބު ވިދާޅުވީ މި މަޝްރޫޢޫއަކީ 20 ބިލިޔަން ޑޮލަރުގެ މަޝްރޫޢުއެއް ނަމަވެސް މިއަދަދަކީ ހަމައެކަނި މަޝްރޫޢު ހިންގާ ކުންފުނީގެ އިންވެސްޓްމެންޓް އެކަނިކަން ފާހަގަކުރައްވާފައެވެ. އަދި މުޅި މަޝްރޫޢުއާއި ގުޅުންހުރި ހުރިހާ ކަމަކަށް ބަލާނަމަ މަދުވެގެން ރާއްޖެއަށް 31 ބިލިޔަން ޑޮލަރު އިންވެސްޓްމެންޓެއް އަންނާނެ ކަމަށް އެކުންފުނިން ލަފާކުރާ ކަމަށް ވަޒީރު ވިދާޅުވިއެވެ.

"ރާއްޖެއަށް މުހިންމީ އޭގެ ސަބަބުން ރާއްޖެއަށް އަންނާނެ ފޮރިން ޑައިރެކްޓް އިންވެސްޓްމެންޓަކީ ކިހާ އަދަދެއްތޯ. އޭތި އެންމެ މަދުވެގެން އެބޭފުޅުންގެ އެސެސްމެންޓް ދައްކާ ގޮތުން 31 ބިލިޔަން ޑޮލަރު އަންނާނެ، މިއީ ރާއްޖޭގެ ފަތުރުވެރިކަމުގެ ސިނާޢަތުގެ ހުރިހާ މަޝްރޫޢުުތަކެއް އެއްކޮށްލާފައި ބަލާލި ކަމަށްވިއަސް، ރާއްޖެއަށް އައިސްފައި ހުރި ފޮރިން ޑައިރެކްޓް އިންވެސްޓްމެންޓަށް ވުރެ ބޮޑު އިންވެސްޓްމެންޓެއް. އެހެންވީމަ އަޅުގަނޑުމެންނަށް މި މަޝްރޫޢު ކަމިޔާބު ކަމާއެކު ކުރިއަށް ގެންދެވިއްޖެ ނަމަ، އޭގެ ސަބަބުން، މުޅި ރާއްޖޭގެ އިޤްތިޞާދަށް ރާއްޖޭގެ ރައްޔިތުންގެ ތަނަވަސްކަމަށް، އަންނާނެ އިންޤިލާބީ ބަދަލެއް ގޮތުގައި އަޅުގަނޑު ފާހަގަކުރަނީ. " ވަޒީރު މުއްޠަލިބު ވިދާޅުވިއެވެ.

ރަސްމާލޭގައި ހިންގާ ވޯޓަރފޮރަންޓު އެންޑް މެރިނާ މަޝްރޫޢުއަކީ ރިއަލް އެސްޓޭޓް މަޝްރޫޢުއެކެވެ. މިމަޝްރޫޢު ދަށުން ކުއްޔަށްދޭ ތަންތަނުން ކުރާ ކޮންމެ މުޢާމަލާތަކަށް ދައުލަތަށް 4 އިންސައްތަ އާމްދަނީއެއް ލިބޭނެ ގޮތަށް ކޮމާޝަލް ޓާމްސް އެއްބަސްވުމުގައި މިހާރު ވަނީ ސޮއިކޮށްފަފައެވެ. ރާއްޖޭގެ ފަތުރުވެރިކަމުގެ ސިނާޢަތަށް ކުއްޔަށް ދޫކޮށްފައިވާ ރަށްރަށް ވިއްކާ ކުންފުނިތައް ބަދަލުވާއިރު މިގޮތަށް ދައުލަތަށް ކޮންމެ މުޢާމަލާތަކުން ދައްކަން ނުޖެހެއެވެ.

ފަތުރުވެރިކަމާއި ބެހޭ ވުޒާރާގެ ތަފާސް ހިސާބުތައް ދައްކާގޮތުން، ރާއްޖޭގައި 177 ރިސޯޓާއި، 16 ހޮޓަލާ، 814 ގެސްޓް ހައުސްގެ އިތުރުން 162 ސަފާރީ އުޅަނދު ރަޖިސްޓްރީކޮށް ހިންގައެވެ. ސަރުކާރުން ފާހަގަކުރާ ގޮތުގައި މިމަޝްރޫޢު ކަމިޔާބުވެއްޖެނަމަ ބޭރުގެ ފަރާތްތަކުން މި މުޅި ފަތުރުވެރިކަމުގެ ސިނާއަތަށް މިހާތަނަށް ކޮށްފައިވާ އިންވެސްޓްމެންޓުތަކާށް ވުރެ ރަސްމާލޭގެ އިންވެސްޓްމެންޓް ބޮޑުވެގެންދާނެއެވެ. އަދި މަޝްރޫޢު ނިމުމުން އަހަރެއްގެ މައްޗަށް 2 ބިލިޔަން ޑޮލަރުގެ ރާއްޖޭއަށް ލިބޭ އާމްދާނީ އިތުރުވެގެންދާނެ ކަމަށް ސަރުކާރުން ވިދާޅުވެފައެވެ.