ރާއްޖެއާއި ރަޝިޔާއާ، ޤާނޫނީ ގޮތުން ގުޅުންބަދަހިކުރުމުގެ އެއްބަސްވުމެއް

ރާއްޖެއާއި ރަޝިޔާއާ ދެމެދު ޤާނޫނީ ގޮތުން ގުޅުންބަދަހިކުރުމުގެ އެއްބަސްވުމެއްގައި ސޮއިކޮށްފިއެވެ.

ޕްރޮސިކިއުޓަރ ޖެނެރަލް، އަލްއުސްތާޛު އައްބާސް ޝަރީފާއި އެ އޮފީހުގެ ވަފުދެއް، ރަޝިޔާގެ ކަޒާންގައި މިހާރު ކުރިއަށްދާ "ޝަންހާއީ ކޯޕަރޭޝަން އޯގަނައިޒޭޝަން" އެސްސީއޯގެ މެންބަރު ޤައުމުތަކުގެ ޕްރޮސިކިއުޓަރ ޖެނެރަލުންގެ 24 ވަނަ ބައްދަލުވުމުގައި ބައިވެރިވެ ވަޑައިގަތުމަށް އެ ޤައުމަށް ވަނީ ވަޑައިގެންފައެވެ.

މި ބައްދަލުވުމުގެ ހަވާސާގައި ޕްރޮސިކިއުޓަރ ޖެނެރަލް އައްބާސް ޝަރީފް ވަނީ، ރަޝިޔާގެ ޕްރޮސިކިއުޓަރ ޖެނެރަލް އެލެގްޒެންޑަރ ގުޓްސާންއާ ބައްދަލުކުރައްވައި ރަސްމީ މަޝްވަރާތައް ބާއްވަވާފައެވެ. މި މަޝްވަރާތަކަށްފަހު، ދިވެހިރާއްޖޭގެ ޕްރޮސިކިއުޓަރ ޖެނެރަލްގެ އޮފީހާއި ރަޝިޔާގެ ޕްރޮސިކިއުޓަރ ޖެނެރަލްގެ އޮފީހާ ދެމެދު އެއްބާރުލުން އިތުރުކުރުމުގެ އެއްބަސްވުމެއްގައި ވަނީ ސޮއިކުރައްވާފައެވެ.

Prosecutor General Justice (Retired) Abbas Shareef and a delegation from PGO are in Kazan, Russia, to take part in the 24th Meeting of Prosecutors General of the Shanghai Cooperation Organisation (SCO) Member States.

On the sidelines of the meeting, PG met with the Prosecutor… pic.twitter.com/eCO1QvM0nW

— Prosecutor General’s Office (@PGO_MV) October 1, 2026

މި އެއްބަސްވުމުގެ ދަށުން ދެ އޮފީހުގެ މެދުގައި ފަންނީ ދިރާސާތައް ކުރުމާއި، ތަމްރީނު ދިނުމާއި، މަސައްކަތުގެ ތަޖުރިބާއާއި ޢިލްމު ހިއްސާކުރުމުގެ އޮނިގަނޑެއް އެކުލަވާލެވޭނެއެވެ. މީގެ އިތުރުން، ދެ ފަރާތުން އެއްބަސްވާ އެކި ދާއިރާތަކުން އެހީތެރިކަން ފޯރުކޮށްދިނުމާއި ގުޅިގެން މަސައްކަތް ކުރުމަށްވެސް މި އެއްބަސްވުމުގައި ވަނީ ހިމަނާފައެވެ.

ޕީޖީ އައްބާސް ވިދާޅުވީ، ދެ ޤައުމުގެ ދެމެދުގައި ބޭއްވި ރަސްމީ މަޝްވަރާތަކުގެ ތެރެއިން، ޕްރޮސިކިއުޓަރ ޖެނެރަލްގެ އޮފީހުގެ މަސައްކަތްތަކުގެ ހަލުވިމިން 60 އިންސައްތަ އަށްވުރެ އިތުރުކުރުމަށް އަމާޒުކޮށްގެން ކުރިއަށްގެންދާ "ޕީޖީއޯ 2.0" އިސްނެގުމާ ބެހޭ މައުލޫމާތު ޙިއްސާކުރައްވާފައިވާނެ ކަމަށެވެ.

މި ނިޒާމަކީ މަސައްކަތްތައް އަވަސްކުރުމަށް ފަރުމާކޮށްފައިވާ ނިޒާމެއް ނަމަވެސް، މީގެ މައިގަނޑު އަސާސަކީ ކަންކަމުގައި ގޮތް ނިންމުމުގެ ބާރު އިންސާނުންގެ އަތްމަތީގައި ބޭއްވުންކަމަށް ޕީޖީ ވިދާޅުވިއެވެ. އަދި ރަޝިއާގެ ޕްރޮސިކިއުޓަރ ޖެނެރަލް އެލެގްޒެންޑަރ ގުޓްސާން ދެއްވި ފުރިހަމަ މެހެމާންދާރީއަށްޓަކައި ޝުކުރު އަދާކުރައްވާފައިވެއެވެ. ކުރިއަށް އޮތްތަނުގައި ދެ އޮފީހުގެ މެދުގައި އޮންނަ ގުޅުން އިތުރަށް ބަދަހިވެގެންދާނެ ކަމަށް އުންމީދު ކުރައްވާ ކަމަށްވެސް ޕީޖީއިން ވިދާޅުވިއެވެ.

ޕީޖީއިން ކުރެއްވި ޕޯސްޓެއްގައި ވިދާޅުވީ ދިވެހިރާއްޖޭގެ ޕްރޮސިކިއުޓަރ ޖެނެރަލްގެ އޮފީހާއި ރަޝިއާގެ ޕްރޮސިކިއުޓަރ ޖެނެރަލްގެ އޮފީހާ ދެމެދު ޤާނޫނީގޮތުން ގުޅުން ބަދަހިކުރުމުގެ އެއްބަސްވުމެއްގައި ސޮއިކުރުމަށްޓަކައި، ރަޝިއާގެ ކަޒާންގައި އެ ގައުމުގެ ޕްރޮސިކިއުޓަރ ޖެނެރަލް އެލެގްޒެންޑަރ ގުޓްސާންއާ ބައްދަލުކުރުމުގެ ފުރުސަތު ލިބުމަކީ ލިބިވަޑައިގަތް ޝަރަފެއް ކަމަށެވެ. މި އެއްބަސްވުމުގެ ސަބަބުން ބޯޑަރު ހުރަސްކޮށް ހިންގާ ކުށްތަކާ ދެކޮޅަށް މަސައްކަތް ކުރުމުގައި ދެ އޮފީހުގެ މެދުގައި އޮންނަ ޤާނޫނީ ގުޅުން ވަރުގަދަވެ، އިތުރު ދާއިރާތަކުން ގުޅިގެން މަސައްކަތް ކުރުމަށް މަގުފަހިވެގެންދާނެއެވެ.