ގެސްޓް އިންފޮމޭޝަން ސިސްޓަމާއެކު ފަތުރުވެރިންގެ މައުލޫމާތު އެއް ނިޒާމަކަށް

މީރާގެ ގެސްޓް އިންފޮމޭޝަން ސިސްޓަމާއެކު ފަތުރުވެރިންގެ މައުލޫމާތު ދައުލަތުގެ އިދާރާތަކުގެ މެދުގައި އެއް ނިޒާމެއްގެ ތެރެއިން ބެލެހެއްޓުމަށް ލުއި ލިބިގެންދާނެ ކަމަށް މަލީ ކަންކަމާއި ސަރުކާރުގެ ކުންފުނިތަކާއި ބެހޭ ވަޒީރު ޙަސަން ޒަރީރު ވިދާޅުވެއްޖެއެވެ.

ރާއްޖެއަށް އަންނަ ފަތުރުވެރިންގެ މައުލޫމާތު އެއް ނިޒާމަކުން ލިބޭނެ "މޯލްޑިވްސް ގެސްޓް އިންފޮމޭޝަން ސިސްޓަމް" އިފްތިތާޙްކޮށްފައިވަނީ އެކަމަށްޓަކައި ބޭއްވި ޚާއްސަ ރަސްމިއްޔާތުގައި މާލީ ކަންކަމާއި ސަރުކާރުގެ ކުންފުނިތަކާ ބެހޭ ވަޒީރު ޙަސަން ޒަރީރެވެ. މި ރަސްމިއްޔާތުގައި ކޮމިޝަނަރ ޖެނެރަލް އޮފް ޓެކްސޭޝަން ފާތިމަތު އަމީޒާ، މާލީ ވުޒާރާއި މީރާގެ އިސްވެރިން ބައިވެރިވެވަވަޑައިގެންފައިވެއެވެ.

މިރަސްމީޔާތުގައި ވާހަކަފުޅުދައްކަވަމުން މާލީ ވަޒީރު ޙަސަން ޒަރީރު ވަނީ މީރާގެ ގެސްޓް އިންފޮމޭޝަން ސިސްޓަމްގެ މުހިންމުކަން ފާހަހަގަކުރައްވައި އެކަމަށް އަލިއަޅުވާލައްވާފައެވެ. ވަޒީރު ޙަސަން ޒަރީރު ވިދާޅުވީ، މި ނިޒާމަކީ ރާއްޖެއަށް ޒިޔާރަތްކުރާ ފަތުރުވެރިންގެ މަޢުލޫމާތު އެއްވިއުގައަކުން ގުޅާލާ، ދައުލަތުގެ މާލީ އިދާރާތަކާ ސީދާ ގުޅުވައިދޭ މަރުކަޒީ ނިޒާމެއް ކަމަށެވެ.

ފަތުރުވެރިކަމަކީ ރާއްޖޭގެ އިޤްތިޞާދުގެ މައި ސިނާއަތަށްވުމާއެކު، މި ދާއިރާގެ މަޢުލޫމާތަކީ ސަރުކާރާއި ދައުލަތުގެ ގިނަ އިދާރާތަކަކުން ބޭނުންކުރާ މަޢުލޫމާތެކެވެ. އަދި މިސިސްޓަމްގެ ސަބަބުން މި މައުލޫމާތުތައް ބަލަހައްޓާ ދައުލަތުގެ ކަމާބެހޭ މުއައްސަސާތަކުން ކުރާ މަސައްކަތްތަކަށް ބޮޑު ލުޔެއް ލިބިގެންދާނެ ކަމަށް ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، މި ސިސްޓަމް ތަޢާރަފުކުރުމަކީ ޒަމާނީ ޓެކްނޮލޮޖީގެ އެހީގައި ދައުލަތް ހިންގުން ހަރުދަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ މޯލްޑިވްސް 2.0 ގެ ތަޞައްވުރުގެ ދަށުން ހާސިލުކުރެވުނު މުހިންމު ލަނޑުދަނޑިއެއް ކަމަށެވެ. އަދި މީރާގެ ޑިޖިޓަލް ޓްރާންސްފޯމޭޝަން ރޯޑްމެޕްގައި ހިމެނޭ ރިޕޯޓިންގ އޮޓޮމޭޓްކުރުމުގެ ލަނޑުދަނޑި ހާސިލުކުރުމަށް މި ނިޒާމަކީ، ލިބުނު ބޮޑު ކުރިއެރުމެއްކަން ވަޒީރު ވިދާޅުވިއެވެ.

މާލީ ވަޒީރު ވިދާޅުވީ މި ނިޒާމުގެ ސަބަބުން މީރާގެ މަސައްކަތްތަކަށްވެސް ކުރިއެރުންތައް އަންނަތަން ފެނިގެންދާނެކަމަށެވެ. އަދި މީރާއިން ލުއިފަސޭހަ ޓެކްސް ނިޒާމެއް ޤާއިމް ކުރުމަށް ކުރަމުންދާ މަސައްކަތުގައި ދެމިތިބެ ޑިޖިޓަލައިޒޭޝަން މަސައްކަތުގައި އެންމެ ކުރީގައި މަސައްކަތް ކުރާ މުޢައްސަސާއެއްގެ މަސައްކަތް ކުރުމަށް މާލީ ވަޒީރު އިލްތިމާސް ކުރެއްވިއެވެ.

The Maldives Guest Information System (MGIS) was officially launched by Mr. Hassan Zareer, Minister of Finance and Public Enterprises. In his remarks, the Minister spoke about the role of MGIS in supporting the Maldives' digital transformation journey towards a more streamlined… pic.twitter.com/HfqWk5Us0c

— Maldives Inland Revenue Authority (@MIRAmaldives) October 1, 2026

މި ސިސްޓަމް ތަޢާރަފުކުރުމާއެކު، ގްރީން ޓެކުހަށް ރަޖިސްޓަރީކޮށްފައިވާ ހުރިހާ ފަރާތްތަކަށް ވެސް ފަތުރުވެރިކަމުގެ އެސްޓެބްލިޝްމަންޓްތަކަށް އަންނަ ފަތުރުވެރިންގެ މަޢުލޫމާތު މި ސިސްޓަމް މެދުވެރިކޮށް ހުށަހެޅޭނެއެވެ. މިނިޒާމު މެދުވެރިކޮށް ހުށަހަޅާ މައުލޫމާތު އަދާހަމަކުރުމުން ފަތުރުވެރިކަމާއި ބެހޭ ވުޒާރާއިއާއި މައުލޫމާތު ހިއްސާކުރެވުނީ ކަމަށް ބެލެވޭނެއެވެ. މީގެ އިތުރުން މި ނިޒާމު މިހާރު ފަތުވެރިކަމުގެ ޚިދުމަތްދޭ އެސްޓެބްލިޝްމަންޓްތަކުގެ ގެސްޓް މެނޭޖްމެންޓް ނިޒާމާއި އިންޓަގްރޭޓްކުރުމުން، މަޢުލޫމާތު ހުށަހެޅުމަށް މެނުއަލްކޮށް ކުރަންޖެހޭ މަސައްކަތް ނިމުމަކަށް އަންނާނެ ކަމަށް މީރާއިން ވިދާޅުވިއެވެ.

މި ސިސްޓަމަކީ ހުރިހާ ފަރާތްތަކަށް ހުޅުވާލެވިފައިވާ ސިސްޓަމެއް ކަމުގައި ވިޔަސް، ޓެކްސްދައްކާ ފަރާތްތައް އޮންބޯޑް ކުރުމުގައި މީރާއިން އިސްކަންދޭނީ ޓެކްސް ދައްކާ ފަރާތްތައް ދެބަޔަކަށް ބަހާލައިގެންނެވެ. އެގޮތުން ރިސޯޓްތަކާއި، ހޮޓާތަކާއި، އަދި 50 އެނދަށްވުރެ މަތީގެ ގެސްޓްހައުސްތަކުން، 1 ނޮވެމްބަރ 2026 އިން ފެށިގެން މި ސިސްޓަމް މެދުވެރިކޮށް ރިޕޯޓް ކުރަން ފަށަން ޖެހޭއިރު، ގްރީން ޓެކުހަށް ރަޖިސްޓަރީކޮށްފައިވާ އެހެނިހެން ފަރާތްތަކުން، 1 ޖެނުއަރީ 2027 އިން ފެށިގެން ހިނގާ މުއްދަތުތަކުގެ މައުލޫމާތު މި ސިސްޓަމް މެދުވެރިކޮށް ރިޕޯޓް ކުރަން ޖެހޭނެ ކަމަށް މީރާއިން ވިދާޅުވިއެވެ.

މި އައު ސިސްޓަމް ތަޢާރަފުކުރި ނަމަވެސް، ގްރީން ޓެކްސް ބަޔާން ހުށަހެޅުމަށާއި ފައިސާ ދެއްކުމަށް ކަނޑައެޅިފައިވާ ސުންގަޑިތަކަށް އެއްވެސް ބަދަލެއް ނާންނާނެއެވެ. އަދި ކުރިއެކޭ އެއްފަދައިން ގްރީން ޓެކްސް ރިޓާން ހުށަހެޅުމާއި ފައިސާ ދެއްކުން ކުރިއަށް ދާނީ "މީރާކަނެކްޓް" މެދުވެރިކޮށް ކަމަށް މީރާއިން ވިދާޅުވިއެވެ. ނަމަވެސް، މި ސިސްޓަމަށް މައުލޫމާތު ރިޕޯޓް ކުރުމުން، އެ މުއްދަތުގެ ގްރީން ޓެކްސް ބަޔާނާއެކު އިތުރު އިންފޮމޭޝަން ޝީޓެއް އަޕްލޯޑްކުރާކަށް ނުޖެހޭނެއެވެ. އޭގެ ބަދަލުގައި ބަޔާން ހުށަހަޅާއިރު އެ މަޢުލޫމާތު ގްރީން ޓެކްސް ބަޔާނަށް އަމިއްލައަށް އެކުލެވޭނެ ކޮށްދޭނެ ކަމަށްވެސް މީރާއިން މަޢުލޫމާތު ވިދާޅުވެއެވެ.

މި ނިޒާމާއެކު، ދައުލަތުގެ އިދާރާތަކުގެ މެދުގައި ފަތުރުވެރިންގެ މައުލޫމާތު އެއް ނިޒާމެއްގެ ތެރެއިން ހިއްސާ ކުރެއްވި އަދާހަމަކުރެވޭނެއެވެ. އަދި ފަތުރުވެރިން ރާއްޖެއައުމަށް ފަހު މަޑުކުރާ ތަންތަނުގެ މައުލޫމާތު ފުރުމާއި ހަމައަށް އެއް ނިޒާމެއްގެ ތެރެއިން އަދާހަމަކުރެވޭނެއެވެ. މީރާއިން ވަނީ ކުރިމަގުގައި މި ނިޒާމު އިމުގަ ނިޒާމާއިވެސް ގުޅި ލާމެހިގެންދާނެ ކަމަށް ވިދާޅުވެފައެވެ.