ތަރައްޤީގެ ދަތުރުގައި ޗައިނާއަކީ މުހިންމު އަދި ސާބިތު ބައިވެރިއެއް: ރައީސް

ރާއްޖޭގެ ތަރައްޤީގެ ދަތުރުގައި ޗައިނާއަކީ މުހިންމު އަދި ސާބިތު ބައިވެރިއެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޗައިނާގެ ޤައުމީ ދުވަހުގެ މުނާސަބަތުގައި ފޮނުއްވެވި ތަހުނިޔާގެ މެސެޖުގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސޯޝަލް މީޑިއާގައި ހިއްސާކުރެއްވި މެސެޖުގައި ވަނީ ޗައިނާގެ 77 ވަނަ ޤައުމީ ދުވަހުގެ މުނާސަބަތުގައި އެ ޤައުމުގެ ރައީސް ޝީ ޖިންޕިންގއަށާއި އެ ޤައުމުގެ ސަރުކާރާއި ރައްޔިތުންނަށް ހެޔޮ އެދުންތައް ފޮނުއްވާފައެވެ.

އެމަނިކުފާނު ވިދާޅުވީ ދިވެހިރާއްޖެއާއި ޗައިނާއާ ދެމެދު އޮތީ އެއް ޤައުމު އަނެއް ޤައުމަށް އޮތް އިޙްތިރާމާއި އިތުބާރުގެ މައްޗަށް ބިނާވެފައިވާ ބަދަހި ރަޙުމަތްތެރިކަމުގެ ގުޅުމެއް ކަމަށެވެ. އަދި ދެޤައުމުންވެސް ގެންގުޅެނީ ތަރައްޤީއާއި ފާގަތިކަމަށް އޮތް އެއްގޮތް ތަޞައްވުރެއްކަން އެމަނިކުފާނު ފާހަގަކުރެއްވިއެވެ.

ރާއްޖޭގެ ތަރައްޤީގެ ދަތުރުގައި ޗައިނާއަކީ މުހިންމު އަދި ސާބިތު ބައިވެރިއެއްކަން ފާހަގަކުރައްވައި ރައީސުލްޖުމްހޫރިއްޔާ ވިދާޅުވީ ދެޤައުމުގެ ގުޅުމުގެ ސަބަބުން ދެ ޤައުމުގެ ރައްޔިތުންނަށްވެސް މާނަހުރި، ގިނަ ފުރުޞަތުތަކެއް ފަހިވަމުންދާކަމަށެވެ.

On the 77th Anniversary of the Founding of the People’s Republic of China, I extend my warmest felicitations and best wishes to President Xi Jinping, the Government and the people of China.

The Maldives and China share a deep and enduring friendship, founded on mutual respect,…

— Dr Mohamed Muizzu (@MMuizzu) October 1, 2026

ރައީސުލްޖުމްހޫރިއްޔާ ވިދާޅުވީ ދެޤައުމުގެ ދެމެދުގައި ޤާއިމުކުރެވިފައިވާ އިސްތިރާޖީ ގުޅުން އިތުރަށް ބަދަހިކޮށް ދެ ޤައުމުގެ ގުޅުން އައު ހަރުފަތަކަށް ގެންދިއުމަށް ދިވެހި ސަރުކާރުން އަބަދުވެސް ސާބިތުކަމާއެކު އޮންނާނެ ކަމަށެވެ. އަދި ދެޤައުމުގެ ރައްޔިތުންގެ މެދުގައި އުފެދިފައިވާ ރަޙުމަތްތެރިކަމުގެ ގުޅުން ކުރިއަށް އޮތް ތަނުގައިވެސް އިތުރަށް ބަދަހިވެގެންދިއުމަށާއި، ޗައިނާއަށް މެދުކެނޑުމެއްނެތި ކުރިއެރުމާއި ފާގަތިކަން ލިބުމަށް އެދިވަޑައިގަންނަވާ ކަމަށްވެސް އެމަނިކުފާނުގެ މެސެޖުގައި ވިދާޅުވިއެވެ.

ޗައިނާގެ ޤައުމީ ދުވަހަކީ އޮކްޓޫބަރުމަހުގެ 1ވަނަ ދުވަހެވެ. މި ދުވަސް ފާހަގަކުރަނީ 1949 ވަނަ އަހަރު ޕީޕަލްސް ރިޕަބްލިކް އޮފް ޗައިނާ އުފެދުނު ދުވަހާ ގުޅުވައިގެންނެވެ. އެއީ 23 އަހަރަށް ދެމިގެންދިޔަ ޗައިނާގެ ދާޚިލީ ހަނގުރާމައިގައި، އެ ގައުމުގައި ކުރިން ވެރިކަން ކުރަމުން އައި ޗައިނީސް ނެޝަނަލިސްޓް ޕާޓީގެ މައްޗަށް ޗައިނީސް ކޮމިއުނިސްޓް ޕާޓީން ކާމިޔާބު ހޯދި ދުވަހުގެ ގޮތުގައެވެ.

ރާއްޖެއާއި ޗައިނާއާ ދެޤައުމުގެ ދެމެދު ސިޔާސީ ގުޅުން ޤާއިމްކޮށްފައިވަނީ 1972 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހުއެވެ. މިއަހަރު އެގުޅުމަށް 54 އަހަރު ފުރޭނެއެވެ.