ބޭޒްވޯޓާ ޓެނިސް: ޖޫނިއާ ޗެމްޕިއަންކަން ކިޔާރާއަށް

ބޭޒްވޯޓާ މޯލްޑިވްސް ޓެނިސް ޗެމްޕިއަންޝިޕްގެ ޖޫނިއާ އޯޕަން ސިންގަލްސްގެ އަންހެން ޗެމްޕިއަންކަން ކިޔާރާ އުސާމާ އަލީ ހޯދައިފިއެވެ.

އޯޕަން ބައިގެ އަންހެން ޗެމްޕިއަންކަން ކިޔާރާ ހޯދީ ފައިނަލުގައި އާއިޝަތު ކަރިން ސައިޒަން ސީދާ ދެ ސެޓުން ބަލިކޮށްގެންނެވެ. މިމެޗުގެ ސެޓުތައް ކިޔާރާ ފަސޭހަކަމާއެކު ކާމިޔާބުކުރީ، 06-02 އަދި 06-01 އިންނެވެ.

މާލޭ ޓެނިސް ކޯޓުގައި ބުދަ ދުވަހު ކުޅުނު އެހެން މެޗުތަކަށް ބަލާއިރު، މެންސް އޯޕަން ސިންގަލްސް ބައިގެ ފައިނަލުން ޢަބްދުﷲ ފާއިހް ފަޒީލްއާއި ލޫޠް އަޤްލީމް އަހްމަދުވަނީ ޖާގަ ކަށަވަރުކޮށްފައެވެ.

މިބައިގެ ފައިނަލުން ފާއިހް ޖާގަ ހޯދީ އުނދަގޫކަމެއް ނެތި 06-03 އަދި 06-02 އިން އާދަމް އާލް ނިޔާޒްގެ މައްޗަށް ކުރި ހޯދައިގެންނެވެ.

މެންސް އޯޕަން ސިންގަލްސް ފައިނަލުގެ ޖާގަ ލޫޠު ހޯދީ ދެ ސެޓު އެއް ސެޓުން މުހައްމަދު ނޫޙް ނާޒިހް ބަލިކޮށްގެންނެވެ. މިމެޗުގެ ފުރަތަމަ ސެޓު ނޫހު 06-04 އިން ކާމިޔާބުކުރި ނަމަވެސް ލޫޠުވަނީ ފަހަތުން އަރާ 06-04 އަދި 06-03 އިން ފަހު ދެ ސެޓު ކާމިޔާބުކޮށް ފައިނަލުގެ ފަހު ޖާގަ ކަށަވަރުކޮށްފައެވެ.

ބޭޒްވޯޓާ މޯލްޑިވްސް ޓެނިސް ޗެމްޕިއަންޝިޕްގެ ފައިނަލުގެ މެޗުތައް ބުރާސްފަތި ދުވަހަށް ތާވަލުކޮށްފަވާއިރު، މުޅިން އަލަށް ބޭއްވި މިމުބާރާތުގައި 11 ކެޓަގަރީއަކުން 110 ކުޅުންތެރިން ބައިވެރިވިކަމަށް ޓެނިސް އެސޯސިއޭޝަން އޮފް މޯލްޑިވްސްއިންވަނީ މައުލޫމާތުދީފައެވެ.