ށ. ކަނޑިތީމުގެ ފުޓްސަލް ދަނޑު ތަރައްޤީކުރުމުގެ މަޝްރޫޢުގެ ފުރަތަމަ ފިޔަވަހީގެ މަސައްކަތް ނިމިފައިވާކަމަށް އެރަށު ކައުންސިލުން ވިދާޅުވެއްޖެއެވެ.
ސަރުކާރުގެ ކުޅިވަރުގެ މެނިފެސްޓޯގެ ދަށުން އަތޮޅުތެރޭގައި ކުރިއަށް ގެންދިޔުމަށް ރާއްވަވާފައިވާ ސްޕޯޓްސް އެރީނާ ޕްރޮޖެކްޓްގެ ދަށުން އެކި ރަށްރަށުގައި މިމަޝްރޫޢުގެ މަސައްކަތްތައް ކުރިއަށް އެބަދެއެވެ.
ރައީސުލްޖުމްހޫރިއްޔާ އަބްދުﷲ ޔާމީންގެ ސަރުކާރުގައި މިއަދާއި ހަމައަށް ޒުވާނުންގެ ތަރައްޤީއަށާއި، ކުރިއެރުމަށް 600 މިލިއަނަށްވުރެ ގިނަ ރުފިޔާ ޚަރަދުކޮށްފައިވެއެވެ. އަދި ރާއްޖޭގެ 67 ރަށެއްގައި ސްޕޯޓްސް އެރީނާ ފުޓްސަލް ދަނޑު އެޅުމަށް 50 މިލިޔަނަށްވުރެ ގިނަ ރުފިޔާގެ މަޝްރޫޢުއެއް މިހާރުވެސް ހިގަމުންދާކަން ފާހަގަކޮށްލެވެއެވެ.
img:http://s3.psmnews.mv/images/660x400/14788577660780.jpg|ކަނޑިތީމުގެ ފްޓްސަލް ދަނޑު-
އަތޮޅުތެރޭގެ ރަށްރަށުގައި ކުރިއަށްދާ ސްޕޯޓްސް އެރީނާ މަޝްރޫޢުތަކުގެ ތެރެއިން ށ.ކަނޑިތީމުގެ ސްޕޯޓްސް އެރީނާ މަޝްރޫޢުގެ ފުޓްސަލް ދަނޑުގެ މަސައްކަތުގެ ފުރަތަމަ ފިޔަވަހީގެ މަސައްކަތް ވަނީ ނިމިފައެވެ. ކަނޑިތީމު ފުޓްސަލް ދަނޑުގެ މަސައްކަތްތަކާއި ގުޅޭ މަޢުލޫމާތުދެއްވަމުން ކައުންސިލްގެ ރައީސް އަލީ ރިފާޒް ވިދާޅުވީ 3 ފިޔަވައްސަކަށް ބަހާލައިގެން ކުރިއަށްގެންދާ މިމަޝްރޫޢުގެ ދަށުން ފުރަތަމަ ފިޔަވަހީގެ މަސައްކަތްތައް ނިމިފައިވާކަމަށެވެ. ފުރަތަމަ ފިޔަވަހީގެ ދަށުން ފުޓްސަލް ދަނޑުގެ ވަށާފާރު ރޭނުމާއި ފެންސް ޖެހުމާއި ބިންގަޑު ލެވެލްކުރުމުގެ މަސައްކަތް ވަނީ ނިމިފައެވެ. ކައުންސިލް ރައީސް ވިދާޅުވީ ދެވަނަ ފިޔަވަހީގެ ދަށުން ބިންގަނޑު ކޮނުމާއި ފަސް އަޅާ ބިންގަޑު އެއްވަރުކޮށް، ފޭވްމަންޓް ގާ އެޅުމާއި ލައިޓް ޕޯސްޓްގެ މަސައްކަތްކުރުމަށް އެގްރިމެންޓްކޮށްފައިވާކަމަށެވެ.
ސްޕޯޓްސް އެރީނާ ޕްރޮޖެކްޓްގެ ދަށުން ތަރައްގީކުރުމަށް ހަމަޖެހިފައިވަނީ ފުޓްސަލް ގްރައުންޑާއި، ވޮލީ ބޯލް ކޯޓާއި، ބަށި ކޯޓް ހިމެނޭގޮތަށެވެ. މިމަސައްކަތްތައް ރާއްޖޭގެ އެކިކަންކޮޅުތަކުގައި އެކި މަރުޙަލާގައި ކުރިއަށްދާކަމަށް ޔޫތް މިނިސްޓްރީން ވިދާޅުވެއެވެ.
ރައީސުލްޖުމްހޫރިއްޔާ އަބްދުﷲ ޔާމީންގެ ސަރުކާރުގެ 3 އަހަރު ދުވަހުގެ ތެރޭގައި އެކަނިވެސް ކުޅިވަރުގެ ތަފާތު އެކި މަޝްރޫޢުތަކެއް ހިންގަވާފައިވާކަން ފާހަގަކޮށްލެވެއެވެ. އަދި މިހާރުވެސް ގިނަ މަޝްރޫޢުތަކެއް ކުރިއަށްދާކަން ފާހަގަކޮށްލެވެއެވެ. ރައީސް ޔާމީންގެ ވެރިކަމުގެ 5 އަހަރު ނިމިގެންދާއިރު ރާއްޖޭގައި މީހުން ދިރިއުޅޭ ހުރިހާ ރަށެއްގައި ސްޕޯޓްސް އެރީނާގެ މަޝްރޫޢު ހިންގިގެންދާނެކަމަށް ޔޫތް މިނިސްޓްރީން ވިދާޅުވެއެވެ.