އޭޝިއަން ގޭމްސްގައި އެންމެ ގިނަ ޤައުމީ ރިކޯޑް ހެދީ ޝޫޓިން ޓީމު

ޖަޕާނުގައި ކުރިއަށްދިޔަ އޭޝިއަން ގޭމްސްގައި އެންމެ ގިނަ ޤައުމީ ރިކޯޑް ހެދި ޓީމުގެ ޝަރަފު ޤައުމީ ޝޫޓިން ޓީމުން ހޯދައިފިއެވެ.

އައިޗީ ނަގޯޔާއަށް ދިޔަ ޝޫޓިން ކޮންޓިންޖެންޓަކީ މިހާތަނަށް އޭޝިއަން ގޭމްސްގައި ވާދަކުރި ޝޫޓިންގެ އެންމެ ބޮޑު ކޮންޓިންޖެންޓެވެ. އެގޮތުން ދެ ޖިންސުގެ ޝޫޓަރުން ހިމެނޭހެން ޖުމްލަ 12 ޝޫޓަރަކުވަނީ ޖަޕާނުގައި ޤައުމު ތަމްސީލުކޮށްފައެވެ. އަދި 9 ޤައުމީ ރިކޯޑެއް މުބާރާތުގައި ހަދާފައެވެ.

މުބާރާތުގައި ޤައުމީ ޓީމުން ހަދާފައިވާ ރިކޯޑްތަކަށް ބަލާއިރު، 10 އިވެންޓެއްގައި ވާދަކޮށް 5 ޤައުމީ ރިކޯޑެއް އައު ކުރުމުގެ އިތުރުން 4 ޤައުމީ ޓީމު އިވެންޓްގެ ރިކޯޑެއް މުޅިން އަލަށް މުބާރާތުގެ ތެރެއިންވަނީ ހަދާފައެވެ. ޖުމްލަ 9 ރިކޯޑެއް އޭޝިއަން ގޭމްސްގެ ތެރެއިން ހަދާފައިވާއިރު، މުބާރާތުގައި ވާދަކުރި އިވެންޓްތަކުގެ ތެރެއިން ޤައުމީ ރިކޯޑް އައުކުރެވިފައިނުވަނީ 10 މީޓަރު އެއާ ޕިސްޓަލް މެންސް އިންޑިވިޖުއަލް އިވެންޓުން އެކަނިކަމަށް ޝޫޓިން އެސޯސިއޭޝަނުން ވަނީ މައުލޫމާތުދީފައެވެ.

އޭޝިއަން ގޭމްސްގައި ޤައުމީ ޝޫޓިން ޓީމުން އައުކޮށްފައިވާ ރިކޯޑުތަކަކީ 10 މީޓަރު އެއާ ރައިފަލް ވިމެންސް ކެޓަގަރީއިން 609.6 ގެ ސްކޯއަކާއެކު އާއިޝަތު އީން އަސްލަމް ހެދި ރިކޯޑެވެ. މި ރިކޯޑު ހަމަ މި އިވެންޓުގައި ވާދަކޮށް 624.1 ގެ ސްކޯއަކައެކު އާއިޝަތު އީޝާ ޝަހީދު ވަނީ މުގުރާލާފައެވެ.

މީގެ އިތުރުން 10 މީޓަރު އެއާ ރައިފަލް މެން ކެޓަގަރީއިން މިމުބާރާތުގައި 610.2 ސްކޯއަކުން އުމަރު މުހައްމަދު ނަޝީދު ރިކޯޑު ހަދާފައިވަނިކޮށް، މި އިވެންޓުގެ ތެރެއިން 614.5 ގެ ސްކޯއަކުން އަހުމަދު މާއިދު މުހައްމަދު ވަނީ ރިކޯޑު އައުކޮށްފައެވެ.

2025 ވަނަ އަހަރު ތައިލޭންޑްގައި ކުރިއަށްދިޔަ އޭޝިއަން ކަޕް ރައިފަލް އެންޑް ޕިސްޓަލް ކަޕްގައި ރާއްޖޭގެ ޝޫޓިން ޓީމުން ހެދި ރިކޯޑްވެސްވަނީ، އޭޝިއަން ގޭމްސްގައި ވާދަކުރި ޤައުމީ ޓީމުން މުގުރާލާފައެވެ. ޝިފާން އަދި ޔޫހާ ދަމަހައްޓަމުން އައި ޓީމް ރިކޯޑް އޭޝިއަން ގޭމްސްގެ ތެރެއިން މާއިދު އަދި އީޝާ މުގުރާލީ 16 ޕޮއިންޓްގެ ކުރިއެރުމަކާއެކު، 617.6 ގެ ސްކޯއަކުންނެވެ.

އަދި 2019 ވަނަ އަހަރު ނޭޕާލުގައި ކުރިއަށްދިޔަ އޭޝިއަން ގޭމްސްގައި 10 މީޓަރު އެއާ ޕިސްޓަލް ވިމެންސް ކެޓަގަރީއިން ރިއުޝާ ހަދާފައިވާ ރިކޯޑް އައިޗީ ނަގޯޔާ 2026 ގައި މަރްޔަމް އީޝަލް މިސްބާހުވަނީ 558 ގެ ސްކޯއަކުން މުގުރާލާފައެވެ. މީގެ އިތުރުން 10 މީޓަރު އެއާ ޕިސްޓަލް މިކްސްޑް ޓީމު އިވެންޓުންވެސް އީޝަލްއާއި ޒިޔާންގެ ޕެއާވަނީ 557 ސްކޯކޮށް، މީގެ ކުރިން ޒިޔާން އާއި ރިއުޝާގެ ޕެއާ ދަމަހައްޓަމުން އައި ރިކޯޑްގެ މައްޗަށް ކުރި ހޯދާފައެވެ.

މުޅިން އަލަށް މުބާރާތުގައި ހަދާފައިވާ ޓީމު ރިކޯޑްތަކަށް ބަލާއިރު، 10 މީޓަރު އެއާ ރައިފަލް ވިމެން ޓީމު އިވެންޓުން، އީޝާ، އީން އަދި އައިނާވަނީ 1833 ސްކޯކޮށް މުޅިން އައު ޤައުމީ ރިކޯޑެއް ހަދާފައެވެ. އަދި 10 މީޓަރު އެއާ ރައިފަލް އިވެންޓުން މާއިދު، އުމަރު އަދި ޝިފާންވަނީ 1822.0 ގެ ސްކޯއަކުން ރިކޯޑް ހަދާފައެވެ. 10 މީޓަރު އެއާ ޕިސްޓަލް ވިމެންއިން އީޝަލް، ފައިހާ އަދި މަލަކްވަނީ 1584 ގެ ސްކޯއަކުން ރިކޯޑް ހަދާފައެވެ. މީގެ އިތުރުން 10 މީޓަރު އެއާ ޕިސްޓަލް މެން ޓީމު އިވެންޓުން ޒިޔާން، މާދު އަދި ސުބްހާތުވަނީ 1652 ގެ ސްކޯއަކުން މުޅިން އައު ރިކޯޑެއް ހަދާފައެވެ.

އޭޝިއަން ގޭމްސްގައި ޤައުމީ ޝޫޓިން ޓީމުން މިހޯދި ކާމިޔާބީއަކީ މިމުބާރާތުން ޤައުމީ ޝޫޓިން ޓީމުން މިހާތަނަށް ހޯދި އެންމެ ފުރިހަމަ ކާމިޔާބީއެވެ. އަދި މިއީ ޝޫޓިން ސްޕޯޓްއިން ރާއްޖޭގެ އެތުލީޓުން ކުރިއަރަމުން އަންނަކަމުގެ އަލިގަދަ ހެއްކަކަށްވާއިރު އެސޯސިއޭޝަނުގެ އަމާޒަކީ ކުރިއަށް އޮތް ސައުތު އޭޝިއަން ގޭމްސްގައި ވާދަކޮށް ޤައުމަށް ރަންވަނަތަކެއް ހޯދައިދިނުންކަމަށް އެސޯސިއޭޝަނުންވަނީ ބުނެފައެވެ.