މިދިޔަ ހަފްތާ ބަންދުގައި އިންޑިއާގެ ދެކުނުގެ ސްޓޭޓްތަކަށް ކުރި ބޯވިއްސާރައާއެކު ފެންބޮޑުވުމުގެ ޙާދިސާތަކުގައި ކެރަލާއިން 11 މީހުން އަދި ކަރްނާޓަކާއިން 3 މީހުން މަރުވެ، ބޮޑެތި ގެއްލުންތަކެއްވެ، އެތަކެއް ހާސް ބަޔަކު ހާލުގައި ޖެހިއްޖެއެވެ.
ރިޕޯޓުތައް ބުނާގޮތުން، ވިއްސާރައާ ގުޅުންހުރި އެކި ޙާދިސާތަކުގައި މަރުވި މީހުންގެ ޢަދަދު މިދިޔަ އާދީއްތަ ދުވަހާ ހަމައަށް 11 އަށް އަރާފައިވާއިރު، ކެރަލާގެ އެކި ސަރަޙައްދުތަކުގައި ޤާއިމުކޮށްފައިވާ 275 ވަގުތީ ހިޔާތަކަށް ގާތްގަނޑަކަށް 7,700 މީހުން ވަނީ ބަދަލުކޮށްފައެވެ.
މިކަމާ ގުޅޭގޮތުން ކެރަލާގެ ސްޓޭޓް ސަރުކާރުގެ ވަޒީރަކު ވިދާޅުވީ، ޙާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ހަލުވިކަމާއެކު ކުރިއަށްދާ ކަމަށެވެ.
ކެރަލާގެ ޗީފް މިނިސްޓަރު ވީޑީ ސަތީޝަން މިއަދު ވިދާޅުވި ގޮތުގައި، ވަގުތީ ހިޔާތަކުގެ އިންތިޒާމުތައް ބަލައި، ޙާލަތު ވަޒަންކުރުމަށްޓަކައި ސަރަޙައްދީ އޮފިޝަލުންނާ ބައްދަލުކުރައްވާނެއެވެ.
އަދި ފެންބޮޑުވެފައިވާ ސަރަޙައްދުތައް ސާފުކުރުމުގެ އޮޕަރޭޝަނެއް އިއްޔެއިން ފެށިގެން ކުރިއަށްދާކަންވެސް އޭނާ ފާހަގަކުރެއްވިއެވެ.
އެ ސްޓޭޓްގެ ޑިޒާސްޓާ މެނޭޖްމަންޓް އޮތޯރިޓީން ލަފާކުރާ ގޮތުގައި، މިއަދުވެސް ބައެއް ސަރަޙައްދުތަކަށް ގަދަވަޔާއެކު މެދު މިންވަރަކަށް ވާރޭވެހޭނެއެވެ. ވިއްސާރައިގެ ސަބަބުން އެ ސްޓޭޓްގެ ގިނަ ސްކޫލްތަކެއް ބަންދުކުރަން ޖެހިފައިވާއިރު، މުދައްރިސުން އައްޔަނުކުރުމަށް ބާއްވަން އުޅުނު ސްޓޭޓް ފެންވަރުގެ މުހިންމު އިމްތިޚާނެއްވެސް ވަނީ ފަސްކޮށްފައެވެ.
ކެރަލާގެ އިތުރުން އަވަށްޓެރި ކަރްނާޓަކާއަށްވެސް ވަނީ ވިއްސާރައިގެ ނުރައްކާ ކުރިމަތިވެފައެވެ.
އެގޮތުން ބޯކޮށް ވާރޭވެހި ބިންގަނޑު ކަނޑައިގެން ދިއުމުގެ ސަބަބުން، މިދިޔަ ހޮނިހިރު ދުވަހު އެއް އާއިލާއަކަށް ނިސްބަތްވާ ތިން މީހަކު މަރުވެފައިވާ ކަމަށް "ދަ ހިންދޫ" ނޫހުން ރިޕޯޓުކޮށްފައިވެއެވެ.