ޙައްޖު: މުސްލިމެއްގެ ޙަޔާތުގައި އެންމެ މާތް ދަތުރު!

ކޮންމެ މުސްލިމެއްގެ ހިތުގައިވެސް އެންމެ ބޮޑު އެއް ހުވަފެނަކީ މައްކާގެ މާތް ބިމަށް ފައިތިލަ ބީއްސާލައި، ޙައްޖުގެ މަތިވެރި އަޅުކަން އަދާކުރުމެވެ. އިސްލާމްދީނުގެ ފަސް ރުކުނުގެ ތެރެއިން ފަސްވަނަ ރުކުން ކަމުގައިވާ ޙައްޖަކީ ކެރިކުޅަދާނަވެގެންވާ ކޮންމެ މުސްލިމެއްގެ މައްޗަށް ޢުމުރުން އެއް ފަހަރު ފަރުޟު ކުރައްވާފައިވާ އަޅުކަމެކެވެ.

ޙައްޖުގެ މާތްކަމާ ބެހޭ ގޮތުން ކީރިތި ރަސޫލާ ( صلى الله عليه وسلم) ޙަދީޘް ކުރައްވާފައިވާ ގޮތުގައި، މަބްރޫރު ޙައްޖެއްގެ ޖަޒާއަކީ ސުވަރުގެއެވެ. އެއީ އެ ޙައްޖެއްގައި ފާފައެއް ނުކޮށް، ﷲ ގެ ރުއްސެވުން ހޯދުމަށް ކުރެވޭ ޙައްޖެވެ. ޙައްޖުގެ އެންމެ ބޮޑު އެއް ނިޢުމަތަކީ ފާފަ ފުއްސެވުމެވެ.

ޤަބޫލުވެވިގެންވާ ޙައްޖަކުން އެނބުރި އައިސް، މީހާ ވާހުށީ މައިމީހާގެ ބަނޑުން އުފަންވީ ދުވަހެކޭ އެއް ފަދައިން ފާފައިން ޠާހިރުވެގެންނެވެ.

ޙައްޖުގެ އެންމެ ފުރަތަމަ ބޭނުމަކީ ﷲއާ ކުއްތަންވުމެވެ. ދުނިޔެވީ ހުރިހާ ޒީނަތެއް ދޫކޮށް، އެއް ކުލައެއްގެ ދެ ފޮތިގަނޑެއް އޮޅާލައިގެން ޢަރަފާތު ބިމުގައި ހުންނައިރު، ތިބާ އާއި ﷲ އާ ދެމެދު އެއްވެސް ހުރަހެއް ނެތެވެ. އެ ވަގުތަކީ ތައުބާވެ، ދުޢާ ކުރުމުގެ އެންމެ ބޮޑު ފުރުޞަތެވެ.

ދެވަނަ ކަމަކީ ހަމަހަމަކަން ދެނެގަތުމެވެ. ރަސްކަލެއް، ފަޤީރެއް، ކަޅެއް، ދޮނެއް ތަފާތެއް ނެތި އެންމެން ތިބެނީ އެއް ހެދުމެއްގައެވެ. މި މަންޒަރުން ދަސްކޮށްދެނީ ﷲ ގެ ޙަޟްރަތުގައި ތަފާތެއް ނެތް ކަމެވެ.

ތިންވަނައީ ކެތްތެރިކަމާއި ޤުރުބާނީއެވެ. ޙައްޖުގެ ދަތި އުނދަގޫ ތެރޭގައި ކެތްތެރިވުމަކީ ދިރިއުޅުމުގެ އެހެން ގޮންޖެހުންތަކާ ކުރިމަތިލާން ލިބޭ ތަމްރީނެކެވެ. ހަތަރުވަނައީ އުންމަތުގެ އެއްބައިވަންތަކަމެ. ދުނިޔޭގެ ކޮންމެ ކަންކޮޅަކުން އައިސް، އެއް ބަހުން ތަލްބިޔާ ކިޔައި، އެއް ޤިބުލައަކަށް ކުރިމަތިލާ މި އެއްވުމަކީ މުސްލިމު އުންމަތުގެ އެއްބައިވަންތަކަމުގެ އެންމެ ބޮޑު ރަމްޒެވެ

ޙައްޖަކީ ހަމައެކަނި ދަތުރެއް ނޫނެވެ. އެއީ ރޫޙާނީ އިންޤިލާބެކެވެ ތިބާ ބަދަލުކޮށްލައި، އައު ފެށުމެއް ގެނެސްދޭ ބަދަލެކެވެ.