އިނގިރޭސި އެފްއޭ ކަޕްގެ ފަސްވަނަ ބުރުގައި ރޭ ވްރެކްސްހެމް އާއި ދެކޮޅަށް ޗެލްސީ ކުޅުނު މެޗުގެ އިތުރު ވަގުތުގައި ޖެހި ދެ ލަނޑާއެކު 4-2 ގެ ނަތީޖާއަކުން ޗެލްސީ މޮޅުވެ މުބާރާތުގެ ކުއާޓަރ ފައިނަލުގެ ޖާގައެއް ހޯދައިފި އެވެ.
ވްރެކްސްހެމްގެ ފަރާތުން މޮޅު ކުޅުމެއް ފެނިގެން ގޮސްފައިވާ މި މެޗުގެ 18 ވަނަ މިނިޓުގައި އެ ޓީމުން ވަނީ ލަނޑެއް ޖަހާ ކުރި ހޯދާފަ އެވެ. މި ލަނޑު އެ ޓީމަށް ކާމިޔާބު ކޮށްދީފައިވަނީ ސޭމް ސްމިތް އެވެ.
ޗެމްޕިއަންސް ލީގުގައި މި ހަފްތާގައި މުހިންމު މެޗެއް ކުޅެން ޖެހޭތީ ޗެލްސީގެ ކޯޗު ލިއާމް ރޮޒޭނިއާ ވަނީ ޓީމަށް ބަދަލުތަކެއް ގެނެސްފަ އެވެ. އެގޮތުން ކެޕްޓަން ރީސް ޖޭމްސް އާއި ކޯލް ޕާމާ އާއި ޖޮއާއޯ ޕެޑްރޯ ފުރަތަމަ ޓީމުގައި ހިމަނާފައެއް ނުވެއެވެ.
ޗެލްސީ އިން މި މެޗުގެ ނަތީޖާ އެއްވަރުކޮށްފައިވަނީ މެޗުގެ ފުރަތަމަ ހާފުގެ ކުޅުން ނިމެން ފަސް މިނިޓަށް ވެފައިވަނިކޮށް އަލެހަންދްރޯ ގަރްނާޗޯ ފޮނުވާލި ބޯޅައެއް ވްރެކްސްހެމްގެ އާތޫް އޮކޮންކްވޯ އަތުން ބައިކޮޅަށް ވަން ލަނޑުންނެވެ.
މެޗުގެ ދެވަނަ ހާފުގައި ޗެލްސީ އިން ބަދަލުތަކެއް ގެނައި ނަމަވެސް ވްރެކްސްހެމް އިން ވަނީ މެޗުގެ 78 ވަނަ މިނިޓުގައި އިތުރު ލަނޑެއް ޖަހާ ދެވަނަ ފަހަރަށް ކުރި ހޯދާފަ އެވެ. މި ލަނޑު އެ ޓީމަށް ކާމިޔާބު ކޮށްދީފައިވަނި ކެލަމް ޑޯއިލް އެވެ.
ޗެލްސީ އިން މި މެޗުގެ ނަތީޖާ ދެވަނަ ފަހަރަށް އެއްވަރުކޮށްފައިވަނި މެޗުގެ ފުރިހަމަ ވަގުތު ހަމަވާން އަށް މިނިޓަށް ވެފައިވަނިކޮށް ޖޯޝް އަޗެއަމްޕޮންގް ކާމިޔާބުކޮށްދިން ލަނޑުންނެވެ.
ވްރެކްސްހެމް އަށް އިތުރު ދަތިތަކާއި ކުރިމަތިލާން ޖެހުނީ ފުރަތަމަ ހާފުގެ އިންޖަރީ ވަގުތުގައި ޖޯޖް ޑޮބްސަން ގަރްނާޗޯ އަށް ކުރި ފައުލަކާއި ގުޅިގެން ވީޑިއޯ ބެލުމަށްފަހު ރެފްރީ ސީދާ ރަތް ކާޑެއް ދައްކާ އޭނާ ދަނޑުން ފޮނުވާލުމާއި ގުޅިގެންނެވެ.
ޗެލްސީ އިން މި މެޗުގައި ފުރަތަމަ ފަހަރަށް ކުރި ހޯދާފައިވަނީ އިތުރު ވަގުތުގެ ހަވަނަ މިނިޓުގައި ގަރްނާޗޯ ކާމިޔާބުކޮށްދިން ލަނޑުންނެވެ.
އަދި އިތުރު ވަގުތުގެ 30 މިނިޓުގެ ކުޅުން ނިމުމުގެ ކުރިން ޖޮއާއޯ ޕެޑްރޯ ވަނީ އިތުރު ލަނޑެއް ޖަހާ މެޗުގެ ނަތީޖާ 4-2 އަށް ބަދަލުކޮށްފަ އެވެ. ޗެލްސީ އިން މި މެޗުގެ އިތުރު ވަގުތުގައި ޖެހި ދެ ލަނޑު ޖަހަންވެސް ފުރުސަތު ތަނަވަސްކޮށްދީފައިވަނީ ޑާރިއޯ އެސޫގޯ އެވެ.