ސްޕެނިޝް ލަލީގާގައި ރޭ އެތްލެޓިކް ކްލަބާއި ދެކޮޅަށް ބާސެލޯނާ ކުޅުނު މެޗު 1-0 ގެ ނަތީޖާއަކުން ކާމިޔާބުކޮށް ތާވަލުގެ ކުރީގައި ހަތަރު ޕޮއިންޓުގެ ލީޑެއް ހޯދައިފި އެވެ.
މި މެޗުން ބާސެލޯނާ މޮޅުވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 27 މެޗުން ޖުމްލަ 67 ޕޮއިންޓް ލިބިފަ އެވެ. ދެވަނައިގައި އޮތް ވާދަވެރި ރެއާލް މެޑްރިޑަށް ލިބިފައިވަނީ 63 ޕޮއިންޓެވެ.
އެތްލެޓިކްގެ ދަނޑުގައި ފަންސާސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގައި ދެ ޓީމުގެ ފަރާތުންވެސް ދާދި ހަމަހަމަ ކުޅުމެއް ފެނިގެން ގޮސްފައިވާއިރު, މެޗުގައި ފެނިގެންދިޔަ ހަމައެކަނި ލަނޑަކީ މެޗުގެ 68 ވަނަ މިނިޓުގައި ލަމީން ޔަމާލް ކާމިޔާބުކޮށްދިން ލަނޑެކެވެ.
އުމުރުން 18 އަހަރުގެ ލަމީން ޔަމާލް މި މެޗުގައި ޖެހި ލަނޑާއެކު އޭނާ މި ސީޒަނުގައި ޖެހި ލަނޑުގެ އަދަދު ވަނީ 19 އަށް އަރާފަ އެވެ.