ޒަކާތު ފަންޑުން އިންވެސްޓްކުރެވޭގޮތަށް ޤަވާއިދު އެކުލަވާލައިފި

ޒަކާތުގެ ގޮތުގައި ދައުލަތަށް ލިބޭ ފައިސާއިން ޒަކާތުގެ ބެހެނިވެރީންނަށާއި ބޭނުންތަކަށް ދޫކުރެވޭ މިންވަރު އިތުރުކުރުމަށް ޒަކާތު ފަންޑުގައިވާ ފައިސާ އިންވެސްޓްކުރެވޭނެކަމަށް ކަނޑައަޅާ ޒަކާތު ފަންޑު ހިންގުމާ ބެހޭ ޤަވާއިދު އެކުލަވާލައިފިއެވެ.

މިއީ މިއަހަރުގެ ޖެނުއަރީ މަހުގެ ފުރަތަމަ ދުވަހުން ފެށިގެން އަމަލުކުރަން ފަށާފައިވާ ޒަކާތުގެ ޤާނޫނުގެ ދަށުން އެކުލަވާލި ޤަވާއިދެކެވެ.

ޒަކާތު ފަންޑު ހިންގުމާ ބެހޭ ޤަވާއިދުގައި ވާގޮތުން އެ ފަންޑަށް ޖަމާކުރަނީ މުދަލު ޒަކާތާއި ފިޠުރު ޒަކާތުގެ ގޮތުގައި ލިބޭ ފައިސާގެ އިތުރުން ފަންޑުން ގާއިމްކުރާ އިންވެސްޓްމަންޓްތަކުން ލިބޭ ފައިސާއެވެ. އަދި މި ފަންޑު ހިންގުމުގެ ޒިންމާ މަތިކޮށްފައިވަނީ ޒަކާތުގެ ޤާނޫނުގެ ދަށުން ޒަކާތު ހައުސްއަށެވެ.

ޤަވާއިދުގައި ވާގޮތުން ޒަކާތު ފަންޑު ބަލަހައްޓަންޖެހެނީ މާލިއްޔަތާބެހޭ ވުޒާރާއިން ކަނޑައަޅާ ގޮތެއްގެ މަތިން ޕަބްލިކް ބޭންކް އެކައުންޓަ ވަކިން، މޯލްޑިވްސް މަނިޓަރީ އޮތޯރިޓީގައި ޤާއިމްކުރާ ވަކި އެކައުންޓެއްގައެވެ. ޒަކާތު ފަންޑުގެ ކަސްޓޯޑިއަންއެއްގެ ގޮތުގައި މަސައްކަތްކުރާނ،ީ މޯލްޑިވްސް މަނިޓަރީ އޮތޯރިޓީއެވެ. ކަސްޓޯޑިއަންގެ މައިގަނޑު މަސްއޫލިއްޔަތުތަކުގެ ތެރޭގައި ޒަކާތު ފަންޑުގެ އެކި އެކައުންޓުތައް އެ އޮތޯރިޓީގައި ހުޅުވައި، އެ އެކައުންޓުތައް ބެލެހެއްޓުން ހިމެނެއެވެ. އަދި ފަންޑުގެ އިންފްލޯއާއި އައުޓްފްލޯ ރިޕޯޓުތައް ޒަކާތު ހައުސްއިން ކަނޑައަޅާ ގޮތެއްގެ މަތީން ތައްޔާރުކުރުމާއި މޯލްޑިވްސް މަނިޓަރީ އޮތޯރިޓީގެ ހިސާބުތަކާއި ޒަކާތު ހައުސްގެހިސާބުތައް ރިކޮންސައިލް ކުރުން ހިމެނެއެވެ. އަދި ކަސްޓޯޑިއަން ސަރވިސްއަށް އެއްވެސް ފީއެއްނަގާ ނަމަ އެކަމަށް ޚަރަދުކުރާނީ ޒަކާތު ފަންޑުންކަމަށް ޤަވާއިދުގައިވެއެވެ.

ޒަކާތުގެ ގޮތުގައި ދައްކާ ފައިސާ ފަންޑަށް ބަލައިގަތުމުގެ އިންތިޒާމުތައް ހަމަޖެއްސުމަށް ޒަކާތު ހައުސްއިން މާލީ އިދާރާއެއް އައްޔަނުކުރާނަމަ އެ އިދާރާއާއެކު އެއްބަސްވުމެއް ހަދަންޖެހެއެވެ. މި އެއްބަސްވުމުގައި އިދާރާތަކާ ހަވާލުކުރެވޭ މަސްއޫލިއްޔަތުތަކުގެ ދާއިރާއާއި، އެ މަސްއޫލިއްޔަތުތައް ތަންފީޒުކުރުމަށް ބޭނުންވާ ވަސީލަތްތައް ހޯދާނެ ގޮތާއި، ޒަކާތު ހައުސްއާއި އިދާރާތަކާ ގުޅިގެން މަސައްކަތްކުރާނެ ގޮތާއި، މަސައްކަތްތައް ވިލަރެސްކުރާނެ އުސޫލުތައް ފަދަ ކަންކަން ބަޔާންކުރަންޖެހެއެވެ.

ޒަކާތު ފަންޑަށް ޖަމާކުރާ ފައިސާ ޚަރަދުކުރުމާ ގުޅޭގޮތުން ކަނޑައެޅޭ ބަޖެޓު އެކުލަވައިލައި، ޒަކާތު ކައުންސިލުން އެ ބަޖެޓު
ފާސްކުރަންޖެހޭކަމަށް ޤަވާއިދުގައިވެއެވެ. މި ޤަވާއިދުގައި ވާގޮތުން ޒަކާތު ފަންޑަށް ޖަމާކުރާ ފައިސާ ބޭނުންކުރެވޭނީ މުދަލު ޒަކާތުގެ ބެހެނިވެރީންނަށާއި ބޭނުންތަކަށް ފައިސާ ދޫކުރުމަށެވެ. އަދި ފިޠުރު ޒަކާތުގެ ބެހެނިވެރީންނަށާއި ބޭނުންތަކަށް ފައިސާ ދޫކުރުމަށާއި ފަންޑަށް ޖަމާކުރެވޭ ފައިސާ، އިސްލާމީ ޝަރީޢަތާއި ޤާނޫނު ހުއްދަކުރާ ގޮތުގެ މަތީން އިންވެސްޓްކުރުމަށެވެ.

މީގެ އިތުރުން ޒަކާތް ނެގުމާއި ޒަކާތް ބެހުމުގެ ކަންކަން ތަންފީޒުކުރުމަށްޓަކައި، ޒަކާތުގެ ޤާނޫނުގެ ދަށުން ޒަކާތު ހައުސްއިން ޚަރަދުކުރުމަށް ކަނޑައަޅާ ކަންކަމާއި "ޒަކާތް ނެރުމާއި ބެހުމުގައި ޢަމަލުކުރާނެ ގޮތުގެ ޝަރުޢީ އަސާސްތަކާއި މިންގަނޑުތައް" ގައި ބަޔާންކޮށްފައިވާ އެހެން ކަންކަން ހިމެނެއެވެ. ޤަވައިދުގައި ވާގޮތުން ފަންޑަށް ލިބޭ ފައިސާ ޝަރުޢީ މިންގަނޑާ އެއްގޮތަށް ހޭދަކުރަންވާނީ، ކީރިތި ޤުރްއާނުގައި ކަނޑައެޅިފައިވާ 8 ދާއިރާއަށެވެ. މި ނޫނަސް މި ޤަވާއިދުގައި ވަނީ ޒަކާތު ފަންޑަށް ޖަމާކުރާ ފައިސާ ބޭނުންކުރެވޭނެ ގޮތްތައް ތަފްސީލްކޮށްދެއްވާފައިވެއެވެ.

ޕީއެސްއެމް ނިއުސްއަށް ދެއްވި އިންޓަރވިއުއެއްގައި ޒަކާތު ހައުސްގެ ޑިރެކްޓަރ ޖެނެރަލް އައްޝައިޚް އިމްތިޠާއު ޢައްބާސް ވިދާޅުވީ ޒަކާތު ހައުސްގެ އަމާޒަކީ ކުރާ ކޮންމެ ކަމަކީވެސް ދެފުއްފެންނަ ސިޔާސަތަކުން ކަންކަން ކުރުންކަމަށެވެ. އޭނާ ވަނީ ޒާކާތު ހައުސްއިން ކުރާ ކޮންމެ މަސައްކަތެއްވެސް ރައްޔިތުންނަށް އެނގޭނެހެން އެކި ޕްލެޓްފޯމްތަކުން ހިއްސާކުރަމުންދާނެކަމަށް ވިދާޅުވެފައެވެ.

"މިހާރުވެސް އަޅުގަނޑުމެންގެ ޤަވާއިދުތަކާއި ޢުޞޫލްތައް ވެބްސައިޓުން ފެންނަން ހުންނާނެ. މަހުން މަހުން މަންޓްލީ ރިޕޯޓް އާންމުކުރަން. ކުރިއަށް އޮތްތަނުގައި މިއަށްވުރެއްވެސް ބޮޑަށް ޓްރާންސްޕޭރެންސީކޮށް، ޚާއްސަކޮށް ޓެކްނޮލޮޖިކަލީ ކުރިއަރާފައިވާ ޤައުމުތަކުން ބޭނުން ކުރާ ޓެކްނޮލަޖީތައްވެސް ބޭނުންކޮށްގެ ޒަކާތު ހައުސް ތަރައްޤީކުރުމުގެ ކަންކަން އެބައޮތް." ޒަކާތު ހައުސްގެ ޑިރެކްޓަރ ޖެނެރަލް އައްޝައިޚް އިމްތިޠާއު ޢައްބާސް ވިދާޅުވިއެވެ.

ޤަވައިދުގައި ވާގޮތުން ޒަކާތުގެ ގޮތުގައި ދައުލަތަށް ލިބޭ ފައިސާއިން ޒަކާތުގެ ބެހެނިވެރީންނަށާއި ބޭނުންތަކަށް ދޫކުރެވޭ މިންވަރު އިތުރުކުރުމުގެ މަގުސަދުގައި، ޒަކާތު ފަންޑުގައިވާ ފައިސާ އިންވެސްޓް ކުރެވިދާނެއެވެ. ނަމަވެސް އެކަން ކުރުމަށް އެޑްވައިޒަރީ ކޮމިޓީގެ ލަފާ ހޯދަންޖެހެއެވެ. އަދި ޒަކާތުގެ ފައިސާ އިންވެސްޓްކުރާނީ، މޯލްޑިވްސް ޒަކާތު ހައުސްއިންނެވެ. އެހެން ފަރާތަކާ ގުޅިގެން އިންވެސްޓްކުރާ ނަމަ އިންވެސްޓްކުރަންވާނީ، އިސްލާމީ ޝަރީޢަތާއެއްގޮތްވާ ގޮތުގެ މަތީން ހިންގާ، ހަމައެކަނި ސަރުކާރުގެ ފަންޑުތަކާއި ދައުލަތުގެ މުއައްސަސާތަކާ އެކުގައިކަމަށް ޤަވާއިދުގައިވެއެވެ. މީގެ އިތުރުން ފަންޑުގެ ދަށުން ހަދައިފައިވާ އިންވެސްޓްމަންޓްތަކުގެ ހާލަތު ދެނެގަނެ އެ އިންވެސްޓްމަންޓްތަކުގެ ކަންކަން ޒަކާތު ހައުސްއިން ގަވާއިދުން
މޮނިޓަރކުރަންޖެހެއެވެ.

މި ޤަވައިދުގައި ބަޔާންކޮށްފައިވާގޮތުން ކޮންމެ އަހަރަކު، ޒަކާތު ފަންޑު އޮޑިޓްކޮށް ރައްޔިތުންގެ މަޖިލީހަށް އޮޑިޓަރ ޖެނެރަލް ހުށަހަޅަންޖެހެއެވެ. އެގޮތުން މީލާދީ ކޮންމެ އަހަރެއް ނިމުމުން އެ އަހަރަކު ޒަކާތު ފަންޑު ހިންގި ގޮތުގެ އަހަރީ ރިޕޯޓު ތައްޔާރުކޮށް އެ އަހަރެއް ނިމޭތާ 3 މަސްދުވަހުގެ ތެރޭގައި ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށް ހުށަހަޅަންވެސް ޖެހެއެވެ.