ކޮޕާ ޑެލްރޭގެ ފައިނަލުގެ ޖާގައެއް އެތްލެޓިކޯ މެޑްރިޑް އިން ހޯދައިފި އެވެ.
އެތްލެޓިކޯ މެޑްރިޑް އިން މި މުބާރާތުގެ ފައިނަލުގެ ޖާގައެއް ހޯދާފައިވަނީ ބާސެލޯނާ އާއި ދެކޮޅަށް ސެމީ ފައިނަލުގައި ކުޅުނު ދެ މެޗު 4-3 އެގްރިގޭޓް ނަތީޖާ އަކުން ކާމިޔާބުކޮށްގެންނެވެ. މި ދެ ޓީމުގެ ފުރަތަމަ ކުރިމަތިލުން 4-0 ގެ ނަތީޖާއަކުން އެތްލެޓިކޯ މެޑްރިޑް ކާމިޔާބު ކުރި ނަމަވެސް ދެވަނަ ލެގުގައި ރޭ ކުޅުނު މެޗުން ބާސެލޯނާ ވަނީ 3-0 ގެ ނަތީޖާއަކުން މޮޅުވެފަ އެވެ.
ހެންސީ ފްލިކްގެ އިރުޝާދުގެ ދަށުން ބާސެލޯނާ ރޭގެ މެޗަށް ނިކުމެފައިވަނީ އެޓޭކަށް ވަރަށް ބޮޑަށް އިސްކަން ދީގެންނެވެ.
މި މެޗުގެ ގިނައިރު ބާސެލޯނާ އިން ޑޮމިނޭޓް ކޮށްގެން ކުޅެފައިވާއިރު އެ ޓީމުން ވަނީ ޖުމްލަ 21 ފުރުސަތު ތަނަވަސްކޮށްފަ އެވެ.
ބާސެލޯނާ އިން މި މެޗުގައި ކުރި ހޯދާފައިވަނީ މެޗުގެ 29 ވަނަ މިނިޓުގައި ލަމީން ޔަމާލް ދިން ޕާހަކުން މާކް ބާރނަލް ކާމިޔާބުކޮށްދިން ލަނޑުންނެވެ.
އަދި ފުރަތަމަ ހާފުގެ އިންޖަރީ ވަގުތުގައި ރަފީނިއާ ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
ބާސެލޯނާ އިން މި މެޗުގައި ޖެހި ތިންވަނަ ލަނޑަކީ މެޗުގެ 72 ވަނަ މިނިޓުގައި މާކް ބާރނަލް ކާމިޔާބުކޮށްދީފައިވާ ލަނޑެކެވެ.
މި މުބާރާތުގެ ފައިނަލުގައި އެތްލެޓިކޯ މެޑްރިޑް އާއި ދެކޮޅަށް ކުޅޭނެ ޓީމެއް އެނގިގެންދާނީ ސެމީ ފައިނަލުގެ ދެވަނަ މެޗުގައި އެލްޓިކް ކްލަބާއި ރެއާލް ސޮސިއެޑާޑް މިރޭ ކުޅޭ ދެވަނަ ލެގުގެ މެޗަށްފަހުގަ އެވެ. ފުރަތަމަ ލަގު 1-0 ގެ ނަތީޖާއަކުން ކާމިޔާބުކޮށްފައިވަނީ ރެއާލް ސޮސިއެޑާޑް އެވެ.