މިހާރު ކުރިއަށްދާ އޮސްޓްރޭލިއަން އޯޕަން ޓެނިސް މުބާރާތުގެ ކުއާޓަރ ފައިނަލުގެ ޖާގައެއް ޔަނިކް ސިނާ އާއި އިގާ ސްވިއަޓެކްގެ އިތުރުން އަރީނާ ސަބަލެންކާ ހޯދައިފި އެވެ.
ދުނިޔޭގެ ރޭންކިންގެ ދެވަނައިގައި މިވަގުތު ހުރި އިޓަލީ އަށް އުފަން ސިނާ މި މުބާރާތުގެ ކުއާޓަރ ފައިނަލުގެ ޖާގައެއް ހޯދާފައިވަނީ އިޓަލީގެ ލޫސިއާނޯ ޑާޑެރީ އާއި ދެކޮޅަށް ކުޅުނު މެޗު ސީދާ ތިން ސެޓުން ކާމިޔާބުކޮށްގެންނެވެ. ޖުމްލަ ދެ ގަޑި އިރާއި ނުވަ މިނިޓު ހޭދަވެގެންދިޔަ މި މެޗުގެ ސެޓުތައް ސިނާ ކާމިޔާބު ކޮށްފައިވަނީ ހައެއް އެކެއް, ހައެއް ތިނެއް އަދި ހަތެއް ހައެއްގެ ނަތީޖާ އިންނެވެ.
މި މުބާރާތުގެ ކުއާޓަރ ފައިނަލުގައި ސިނާ އާއި ދެކޮޅަށް ކުޅޭނީ ބެން ޝެލްޑަން އެވެ. އޭނާ މި މުބާރާތުގެ ކުއާޓަރ ފައިނަލުގެ ޖާގައެއް ހޯދާފައިވަނީ ކެސްޕަރ ރޫޑް ތިންވަނަ ބުރުގައި ބަލިކުރުމަށްފަހުގަ އެވެ.
މި މުބާރާތުގެ އަންހެން އިވެންޓުގެ ކުއާޓަރ ފައިނަލުން އިގާ ސްވިއަޓެކް ޖާގަ ހޯދާފައިވަނީ މެޑިސަން އިންގްލިސް އާއި ދެކޮޅަށް ކުޅުނު މެޗު ވަރަށް ފަސޭހަ ކަމާއެކު ހައެއް ސުމެއް އަދި ހައެއް ތިނެއްގެ ނަތީޖާއަކުން މެޗު ކާމިޔާބުކޮށްގެންނެވެ.
ފުރަތަމަ ފަހަރަށް އޮސްޓްރޭލިއަން އޯޕަން ޓެނިސް މުބާރާތް ކާމިޔާބު ކުރުމަށް މަސައްކަތް ކުރަމުންދާ ސްވިއަޓެކް އާއި ދެކޮޅަށް ކުއާޓަރ ފައިނަލުގައި ނިކުންނާނީ އެލޭކާ ރައިބަކީނާ އެވެ.
ދުނިޔޭގެ އެއްވަނަ އަންހެން ޓެނިސް ކުޅުންތެރިޔާގެ ގޮތުގައި ހުރި އެރީނާ ސަބަލެންކާ މި މުބާރާތުގެ ކުއާޓަރ ފައިނަލުގެ ޖާގައެއް ހޯދާފައިވަނީ ކެނެޑާގެ ޒުވާން ކުޅުންތެރިޔާ ވިކްޓޯރިއާ އެމްބޯކޯ އާއި ދެކޮޅަށް ކުޅުނު މެޗު ފަސޭހަކަމާއެކު ހައެއް އެކެއް އަދި ހަތެއް ހައެއްގެ ނަތީޖާއަކުން ކާމިޔާބުކޮށްގެންނެވެ.
ދެ ފަހަރު މަތިން އޮސްޓްރޭލިއަން އޯޕަން ޓެނިސް މުބާރާތް ކާމިޔާބުކޮށްފައިވާ ސަބަލެންކާ އާއި ދެކޮޅަށް ކުއާޓަރ ފައިނަލުގައި ނިކުންނާނީ އެމެރިކާގެ އުމުރުން 18 އަހަރުގެ އިވާ ޖޮވިޗް އެވެ.