އިންޑިޔާއިން ހިންގާ މަޝްރޫޢޫތައް ދިވެހިން ބަލައިގެންފި: ސަފީރު

އިންޑިޔާގެ އެހީގައި ރާއްޖޭގައި ކުރިއަށް ގެންދަ ތަރައްޤީގެ މަޝްރޫޢުތައް ރައްޔިތުން ބަލައިގެންފައިވާ ކަމަށް އިންޑިޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖ. ބާލަސުބްރަމަނިއަމް ވިދާޅުވެއްޖެއެވެ.

ޕީއެސްއެމް ނިއުސަށް ދެއްވި ޚާއްސަ ބަސްތީގަތުމުގައި އިންޑިޔާއިން ރާއްޖެ ކަނޑައަޅުއްވާފައި ހުންނަވާ ސަފީރު ވަނީ ދެ ޤައުމުގެ ގުޅުމުގެ މައްޗަށް އަލިއަޅުވާ ވާހަކަ ދައްކަވާފައެވެ. ސަފީރު ވިދާޅުވީ އިންޑީޔާއިން އަބަދުވެސް ރާއްޖެ ދެކެނީ ގާތް ބައިވެރިއެއްގެ ގޮތުގައި ކަމަށާއި އެޤައުމުން ގެންގުޅޭ އަވައްޓެރިން އިސްކުރުމުގެ ސިޔާސަތުގެ ތެރެއިން ރާއްޖެއަށް އެހީވަމުންދާ ކަމަށެވެ. މީގެތެރެއިން ޢުމްރާނީ ތަރައްޤީގެ މަސައްކަތްތައް ފާހަގަކުރައްވާ އެދާއިރާގެ ކުރެވިފައިވާ މުހިންމު މަސައްކަތްތައް ސަފީރު ފާހަގަކޮށްދެއްވިއެވެ.

ސަފީރު ވިދާޅުވީ އިންޑީޔާގެ އެހީގައި ރާއްޖޭގެ ކުރިއަށް ގެންދެވޭ ތަރައްޤީގެ މަޝްރޫޢުތައް ދެބަޔަކަށް ބަހާލެވިދާނެ ކަމަށެވެ. އެއީ ޢުމްރާނީ ތަރައްޤީގެ ބިޔަ މަޝްރޫޢުތަކާއި ކުދި މަޝްރޫޢުތައް ކަމަށް ވިދާޅުވިއެވެ. މިހާރު ކުރިއަށްދާ ތިލަމާލެ ބްރިޖުގެ މަޝްރޫޢުއާއި، ނިމފައިވާ ހަނިމާދޫ އެއަރޕޯޓު މަޝްރޫޢުގެ އިތުރުން ގަން އެއާޕޯޓު ތަރައްޤީކުރުމާއި އައްޑޫ މަގުތައް ތަރައްޤީކުރުން ފަދަ ބިޔަ މަޝްރޫޢުތަކަކީ ރައްޔިތުންގެ ދިރިއުޅުމާއި ސީދާ ގުޅިފައިވާ މަޝްރޫޢުތައް ކަމަށް ވިދާޅުވިއެވެ. މީގެ އިތުރުންވެސް ހިލޭ އެހީގެ ދަށުން ކުދި އެހެން މަޝްރޫޢުތައް ކުރިއަށް ގެންދެވޭ ކަމަށް އިންޑިއާ ސަފީރު ވިދާޅުވިއެވެ.

"މިހުރިހާ ކަމަކީ ރާއްޖޭގެ ރައްޔިތުންގެ ސީދާ ދިރިއުޅުމަށް ފައިދާ ކުރާނެ ކަންކަން. އަޅުގަނޑު ފާހަގަކޮށްލާނަން، 78 މަޝްރޫއު ކުރިއަށް އެބަދޭ. ގާތްގަނޑަކަށް 455 މިލިޔަން ރުފިޔާ އެހީތެރިކަން ފޯރުކޮށްދެވިއްޖެ މިގޮތުންވެސް. މި މަޝްރޫޢުތަކުގެ ތެރޭގައި އެބަހިމެނޭ ވަރަށް ކުދި ކަންކަންވެސް. ސޯލާ ބައްތިތަކެއް ހަރުކުރުން، އައުޓްޑޯ ޖިމެއް ޤާއިމްކުރުން ނުވަތަ ސްކޫލެއްގެ ވަސީލަތް ފުރިހަމަ ކުރުންވެސް ހިމެނޭ. އެންމެ ފަހުން މި ސޮއިކުރެވުނީ އާރްޓީއެލް ޚިދުމަތަށް 12 ފެރީ ބަނުމުގެ މަސައްކަތް." ސަފީރު ވިދާޅުވިއެވެ.

ސަފީރުގެ ވާހަކަފުޅުގައި ރައްޔިތުންނަށް ފައިދާވާ މަޝްރޫޢުތަކަށް އިސްކަން ދީގެން މަސައްކަތް ކުރަމުންދާކަން ވިދާޅުވިއެވެ. އިންޑީޔާ ސަރުކާރުގެ އެހީގައި ކުރިއަށް ގެންދާ ހައި އިމްޕެކްޓް ކޮމިއުނިޓީ ޑިވެލޮޕްމެންޓް މަޝްރުޢޫތަކަށް އިޝާރާތް ކުރައްވާ އިންޑީޔާގެ ސަފީރު ވިދާޅުވީ މީފަދަ މަޝްރޫޢުތަކަށް އެކަނިވެސް 100 މިލިޔަން ރުފިޔާ ޚަރަދު ކުރެވިފައިވާ ކަމާށެވެ. މިހާތަނަށް 4 ފިޔަވައްސަކަށް ބަހާލައިގެން މަޝްރުޢޫތައް ކުރިއަށް ގެންދިވަފިައވާއިރު މިމަަސައްކަތްތަށް ރައްޔިތުން ބަލައިގެންފައިވާކަން ސަފީރު ވަނީ ފާހަގަކުރައްވާފައެވެ.

"އަޅުގަނޑު ބައެއް ރަށްތަކަށް މިފަދަ މަޝްރޫޢުތައް ކުރިއަށްގެންދެވޭ މިހާރު ޒިޔާރަތްކޮށްފިން. ފެނުގެ ޚިދުމަތުގެ މަޝްރޫޢުތަކާއި ނަރުދަމާ މަޝްރުޢުތަކާއި އައުޓް ޑޯ ޖިމް ފަދަ މަޝްރޫޢުތައް ކުރިއަށް ގެންދެވޭ އިރު މިމަޝްރުޢޫތަކުން ރައްޔިތުންނަށް ވަރަށް ބޮޑު ލުޔެއް ލިބިގެން ގޮސްފި. އަޅުގަނޑުމެން ކޮންމެ މަޝްރޫޢުއެއް ނިންމާފައިވާ ހަދަން އެ މަޝްރޫޢުއަކުން ރައްޔިތުންނަށް ކިހާވަރެއްގެ މަންފާއެއް ލިބިފައިވޭތޯ ބެލުމަށް. މިކަން ކުރަނީ ސަރުކާރާއި ގުޅިގެން. އަޅުގަނޑުމެންނަށް މިހާތަނަށްވެސް ލިބިފައިވަނީ ވަރަށް ރަނގަޅު ފީޑްބެކްތަކެއް މި މަޝްރޫޢުތަކަށް." އިންޑިޔާ ސަފީރު ވިދާޅުވިއެވެ.

އިންޑިޔާ ސަރުކާރުގެ އެހީގައި ކުރިއަށް ގެންދެވޭ މަޝްރޫޢުތަކަކީ ރައްޔިތުންނަށް ފައިދާވާނެހެން ކުރިއަށްގެންދެވޭ މަޝްރޫޢުތަކަށްވާއިރު، ދެ ޤައުމުގެ ސަރުކާރުން މި ގުޅުން އިތުރަށް ވަރުގަދަކުރަން މަސައްކަތް ކުރަމުންދާކަމަށް ސަފީރު ވިދާޅުވިއެވެ. މިކަމުގެ އެންމެ އަލިގަދަ އެއް ހެކީގެ ގޮތުގައި ސަފީރު ދެއްކެވީ ރައީސުލްޖުމްހޫރިއްޔާ ޑރ. މުޙައްމަދު 2024 ވަނަ އަހަރު އިންޑިޔާއަށް ކުރެއްވި ދަތުރުފުޅެވެ. މި ދަތުރުފުޅުގެ ތެރެއިން ދެ ޤައުމުގެ ގުޅުން ވަރުގަދަވެ ދެ ޤައުމުގެ ވެރިންގެ ތަޞައްވުރާއި އެއްގޮތަށް ކުރިއަށްދާން ފަށާފައިވާ ކަމަށް އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވިދާޅުވިއެވެ.