ޕްރިމިއާ ލީގުގައި ރޭ ކްރިސްޓަލް ޕެލަސް އާއި ދެކޮޅަށް ޗެލްސީ ކުޅުނު މެޗު 3-1 ގެ ނަތީޖާއަކުން ޗެލްސީ ކާމިޔާބު ކޮށްފި އެވެ.
ރަށުން ބޭރުގައި ޗެލްސީ ކުޅުނު މި މެޗަށް އެ ޓީމު ނިކުތްއިރު އާނިޔާގެ ސަބަބުން ކޯލް ޕާމާއަށް ވަނީ ކުޅެވޭ ގޮތް ނުވެފަ އެވެ.
ޗެލްސީ އިން މި މެޗުގައި ލީޑު ނަގާފައިވަނީ މެޗުގެ 34 ވަނަ މިނިޓުގައި އެސްޓެވާއޯ ވިލިއަން ކާމިޔާބުކޮށްދިން ލަނޑުންނެވެ.
މެޗުގެ ފުރަތަމަ ހާފުގެ ކުޅުން ނިމުނުއިރު 1-0 ގެ ނަތީޖާއަކުން ޗެލްސީ ކުރީގައި އޮތް ނަމަވެސް މި މެޗުގައި ދެ ޓީމުގެ ފަރާތުންވެސް ފެނިގެންގޮސްފައިވަނީ ދާދި ހަމަހަމަކުޅުމެކެވެ.
ޗެލްސީ އިން މި މެޗުގައި ފަރަގު ބޮޑުކޮށްފައިވަނީ ދެވަނަ ހާފުގެ ކުޅުން ފެށުނުތާ ފަސްވަނަ މިނިޓުގައު ޖޮއާއޯ ޕެޑްރޯ ކާމިޔާބުކޮށްދިން ލަނޑުންނެވެ. އަދި މެޗުގެ 64 ވަނަ މިނިޓުގައި އެ ޓީމަށް ލިބުނު ޕެނަލްޓީ އަކުން އެންޒޯ ފެނާންޑޭޒް ވަނީ އިތުރު ލަނޑެއް ކާމިޔާބުކޮށްދީފަ އެވެ.
ކްރިސްޓަލް ޕެލަސް އަށް އިތުރު މައްސަލަތަކާއި ކުރިމަތިލާން ޖެހުނީ މެޗުގެ 72 ވަނަ މިނިޓުގައި ދެވަނަ ރީނދޫ ކާޑަކާއިއެކު ރަތް ކާޑެއް ދައްކާ އެޑަމް ވާރޓޮން ދަނޑުން ފޮނުވާލުމާއި ގުޅިގެންނެވެ.
ނަމަވެސް މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައިވަނިކޮށް ޕެލަސްގެ ކްރިސް ރިޗަޑްސް ވަނީ ލަނޑެއް ޖަހާ މެޗުގެ ނަތީޖާ 3-1 އަށް ބަދަލުކޮށްފަ އެވެ.
މި ނަތީޖާ އާއިއެކު ތާވަލުގެ ފަސްވަނައިގައި މިވަގުތު އޮތް ޗެލްސީ އަށް 23 މެޗުން ލިބިފައިވަނީ 37 ޕޮއިންޓެވެ. ކްރިސްޓަލް ޕެލަސް އަށް ލިބިފައިވާ 28 ޕޮއިންޓާއެކު އެ ޓީމު އޮތީ ތާވަލުގެ 15 ވަނައިގަ އެވެ.