ފަތުރުވެރިކަމުގެ ދާއިރާއިން ކުރިއަށްދާން ޝައުޤުވެރިވާ ޒުވާނުންނަށް ޚާއްޞަކުރައްވައިގެން ސަރުކާރުން ހިންގަވާ ސްޓެޕް އެޕްރެންޓިސްޝިޕް ޕްރޮގްރާމްގައި ޢާންމުކޮށް ބައިވެރިވުމުގެ ފުރުޞަތު ޔޫތް މިނިސްޓްރީން ހުޅުއްވާލައްވައިފިއެވެ.
މި ޕްރޮގްރާމް ކުރިއަށް ގެންދަވަނީ މިނިސްޓްރީ އޮފް ޔޫތް އެންޑް ސްޕޯޓްސްގެ ދަށުން ހިންގަވާ ނޭޝަނަލް ކެރިއަރ ގައިޑެންސް ސެންޓަރުން އިސްނަންގަވައިގެންނެވެ. މި ޕްރޮގްރާމަކީ ސްކޫލް މަރުޙަލާގައި ދަށް ނަތީޖާ ލިބޭ ކުދިންގެ ތެރެއިން ފަތުރުވެރިކަމުގެ ދާއިރާއިން ކުރިއަށް ދިއުމަށް ބޭނުންވާ ކުދިންނަށް، އެފުރުޞަތު ފަހިކޮށްދެއްވާ ޕްރޮގްރާމެކެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ނޭޝަނަލް ކެރިއަރ ގައިޑެންސްގެ އެސިސްޓެންޓް ޑިރެކްޓަރ މަރިޔަމް ސާދާ ވިދާޅުވީ، ސްޓެޕް އެޕްރެންޓިސްޝިޕް ޕްރޮގްރާމްގައި ގްރޭޑް ހަތެއް ފުރިހަމަކޮށްފައިވުމާއެކު އިނގިރޭސިބަހުން މުޢާމަލާތުކުރަން އެނގޭ ކޮންމެ ޒުވާނަކަށް ބައިވެރިވެވޭނެ ކަމަށެވެ.
މި ޕްރޮގްރާމްގެ ތެރެއިން ރިސޯޓްތަކުގައި އެއް އަހަރާ ހަމަސްދުވަހުގެ މުއްދަތަކަށް ޒުވާނުން މަސައްކަތުގެ ތަޖުރިބާއާއި ހުނަރު ދަސްކުރާނެކަމަށް އޭނާ ވިދާޅުވިއެވެ. އަދި ފުޑް އެންޑް ބެވަރޭޖާއި، ހައުސް ކީޕިންގއާއި، ރެކްރިއޭޝަން ފަދަ ދާއިރާތަކުން ރިސޯޓްތަކުގައި ތިބެގެން ޒުވާނުންނަށް ހުނަރު ދަސްކޮށްދެވޭނެ ކަމަށެވެ.
މި ޕްރޮގްރާމްގައި ބައިވެރިވުމުގެ ސުންގަޑިއަކީ ސެޕްޓެމްބަރު މަހުގެ އެއްވަނަ ދުވަހެވެ. ސްޓެޕް ޕްރޮގްރާމްގެ ބައިވެރިން ހުނަރު ދަސްކުރުމަށް ރާއްޖޭގެ 7 ރިސޯޓެއްގައި ޙަރަކާތްތެރިވާނެއެވެ. ޕްރޮގްރާމްގެ ބައިވެރިން އެއްއަހަރުގެ ތަމްރީނު ފުރިހަމަކުރުމުން ރިސޯޓުތަކުން އެމީހުންނަށް ވަޒީފާގެ ފުރުޞަތު ލިބޭކަމަށް ނޭޝަނަލް ކެރިއަރ ގައިޑެންސްއިން ވިދާޅުވެއެވެ.
މިއީ މި ޕްރޮގްރާމްގެ 4 ވަނަ ބުރެވެ. 2013 ވަނަ އަހަރުން ފެށިގެން ކުރިއަށް ގެންދަވާ ސްޓެޕް ޕްރޮގްރާމްގެ ތެރެއިން މިހާތަނަށް ފަތުރުވެރިކަމުގެ ދާއިރާއަށް ބޭނުންވާ ގިނަ ޢަދަދެއްގެ ޒުވާނުން ތަމްރީނުކުރައްވައި ވަޒީފާގެ ބާޒާރަށް ނެރުއްވާފައިވެއެވެ.