މާފަރު އެއަރޕޯޓުގެ މަސައްކަތް ނިންމާ، ރަސްމީކޮށް ވައިޑް ބޮޑީގެ ޚިދުމަތް ފަށައިފި

މާފަރު އިންޓަރނޭޝަނަލް އެއަރޕޯޓު ތަރައްޤީކުރުމުގެ މަސައްކަތް ނިންމާ، ޚިދުމަތް ރަސްމީކޮށް އިފްތިތާޙިކޮށްފިއެވެ. މިކަމަށްޓަކާ މާފަރު އިންޓަރނޭޝަނަލް އެއަރޕޯޓްގައި ކުލަގަދަ ރަސްމިއްޔާތެއް ވަނީ ބާއްވާފައެވެ.

މަސައްކަތުގެ ނިމުން ފާހަގަކުރުމަށް، މާފަރު އެއަރޕޯޓުގައި ބޭއްވި ރަސްމިއްޔާތުގައި ޚިދުމަތް އިފްތިތާޙުކުރީ މޯލްޑިވިއަންގެ ވައިޑްބޮޑީ މަތިންދާބޯޓުގެ ދަތުރަކާއެކުއެވެ. މި ބޯޓަށް މަރުޚަބާ ކިއުމަށް ވޯޓަރ ސެލިއުޓްއެއްވަނީ ދީފައެވެ.

މާފަރު އިންޓަރނޭޝަނަލް އެއަރޕޯޓްގައި ބޭއްވި ޚާއްސަ ރަސްމިއްޔާތުގައި މި ޚިދުމަތް އިފްތިތާޙުކުރުމަށް ބޭއްވި ހަފްލާގައި އިޤްތިޞާދީ ތަރައްޤީއާ ވިޔަފާރިއާ ބެހޭ ވަޒީރު މުޙައްމަދު ސަޢީދާއި، ގެދޮރުވެރިކަމާ އިމާރާތްކުރުމާ ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބާއި، ޔޫއޭއިން ރާއްޖެއަށް ކަނޑައަޅުއްވާފައިހުންނަވާ ސަފީރު ސެއިޚް ރަހްމާ އަބްދުލްރަޙްމާން ރަހްމާ އަބްދުލްރަޙްމާން އަލް ޝަމްސީއާއި، ޑިރެކްޓަރ ޖެނެރަލް އޮފް ދި އަބޫދާބީ ފަންޑް ފޮރ ޑިވެލޮޕްމަންޓް ހިސް އެކްސެލެންސީ މުޙައްމަދު ސައިފް އަލް ސުވައިދީ، އަދި އައިލެންޑް އޭވިއޭޝަންގެ މެނޭޖިން ޑިރެކްޓަރ އިބްރާޙިމް އިޔާސް ބައިވެރިވެވަޑައިގެންނެވިއެވެ.

މާފަރު އިންޓަރނޭޝަނަލް އެއަރޕޯޓުގެ މަސައްކަތް ކުރިއަށްގެންދިޔައީ އަބޫދާބީ ފަންޑް ފޮރ ޑިވެލޮޕްމަންޓް މެދުވެރިކޮށް ޔުނިޓެޑް އަރަބް އެމިރެޓްގެ އެހީތެރިކަމާއެކުގައެވެ. މި މަސައްކަތަކީ ދެ ފިޔަވައްސަކަށް ބަހާލައިގެން ކުރިއަށްގެންދިޔަ މަސައްކަތެކެވެ.

މާފަރު އެއާޕޯޓުގައި ފުރަތަމަ ފިޔަވަހީގެ ދަށުން، 2200 މީޓަރުގެ ރަންވޭއަކާއި، ޕެސެންޖަރ ޓަރމިނަލް އިމާރާތާއި ވީއައިޕީ ލައުންޖް ވަނީ ތަރައްޤީކޮށްފައެވެ. މީގެ އިތުރުން ފަޔަރ އެންޑް ރެކްސިއު ސްޓޭޝަނާއި ކޮންޓްރޯލް ޓަވަރު އަދި ޕެސެންޖަރ ޖެޓީ ވަނީ ގާއިމުކޮށްފައެވެ. މާފަރު އެއަރޕޯޓްގެ މަސައްކަތް ފަށާފަވަނީ 23 ޖެނުއަރީ 2018ގައެވެ. މި އެއަރޕޯޓްގެ ފުރަތަމަ ފިޔަވަހީގެ މަސައްކަތް ނިންމާ ކޮމާޝަލް ދަތުރުތައް ފެށީ 2019ވަނަ އަހަރުގެ ޑިސެމްބަރުމަހުގެ 1 ވަނަ ދުވަހުއެވެ.

މި މަޝްރޫޢުގެ ދެވަނަ ފިޔަވަހީގެ ދަށުން ރަންވޭއަށް 650 މީޓަރު އިތުރުކޮށް ފުޅާކޮށް، ބޮއިންގ 777-އީއާރް300 ފްލައިޓް ޖެއްސޭގޮތަށް މިހާރު މިވަނީ ތަރައްޤީކޮށްފައެވެ. މީގެއިތުރުން ގޮނޑުދޮށް ޙިމާޔަތްކުރުމުގެ މަސައްކަތާ، ރަންވޭގެ އެއަރފީލްޑް ލައިޓް އަޕްގްރޭޑްކުރުމުގެ މަސައްކަތްވަނީ ކުރިއަށްގެންގޮސްފައެވެ.

ދެވަނަ ފިޔަވަހި ހިމެނޭހެން އެއަރޕޯޓްގެ ހުރިހާ މަސައްކަތްތައް ނިންމާފަވަނީ މިދިޔަ އަހަރުގެ ޑިސެމްބަރުމަހުއެވެ. މި މަޝްރޫޢުގެ ދެ ފިޔަވާހިގެ މަސައްކަތަށް އަބޫދާބީ ފަންޑުން 76 މިލިއަން ޑޮލަރަށްވުރެ ގިނަ ފައިސާގެ އެހީ ވަނީ ދީފައެވެ.

މާފަރު އިންޓަރނޭޝަނަލް އެއަރޕޯޓް ހިންގަނީ އައިލެންޑް އޭވިއޭޝަނުންނެވެ. އައިލެންޑް އޭވިއޭޝަނުން މި އެއަރޕޯޓު އިތުރު ހަރުފަތަކަށް ގެންދިއުމަށްޓަކައި، ޕެސެންޖަރ ޓަރމިނަލްގެ ޚިދުމަތްތައް ފުޅާކުރުމާއި، ސީޕްލޭން ހަބެއް ޤާއިމްކުރުމާއި، ފިއުލް ފާމްގެ ކެޕޭސިޓީ އިތުރުކުރުމާއި، ޑައިރެކްޓް ޕެސެންޖަރ ފްލައިޓް އޮޕަރޭޝަން ފެއްޓުމުގެ މަސައްކަތްތައް ދަނީ ކުރަމުންނެވެ.

ނ. އަތޮޅަކީ ރާއްޖޭގައި ހައިއެންޑް ރިސޯޓްތައް އެންމެ ގިނަ އަދަދަކަށް ހިންގާ އަތޮޅެވެ. އެގޮތުން މި އަތޮޅުގައި މިހާރުވެސް 8 ރިސޯޓް ހިންގަމުން އަންނައިރު، 14 ގެސްޓްހައުސް ހިންގަމުން އާދެއެވެ. މި މަޝްރޫޢުވެގެން މިދަނީ މުޅި އަތޮޅާ ސަރަޙައްދުގެ ރައްޔިތުންނަށް ލިބޭ ފަސޭހައިގެ އިތުރުން، އިގްތިޞާދީގޮތުން ސަރަޙައްދަށް ބޮޑެތި ކުރިއެރުންތައް ގެންނަމުންދާ މަޝްރޫޢުއަކަށެވެ.