ހިމަންދޫ ފަޅުތެރޭ އޮތް ފެރީ ލޯންޗެއް އަނދާ، އަޑިއަށް

އއ. ހިމަންދޫ ފަޅުތެރޭގައި އަޅާފައިވާ ލޯންޗެއްގައި ރޯވެ، އަޑިއަށް ހިނގައްޖެއެވެ.

ބަނދަރު ބޭރުގައި އަޅާފައިވާ "ކައެލް ވިންގް" ނަމަކަށް ކިޔާ 40 މީހުންގެ މި ލޯންޗު ވަނީ އެއްކޮށް އަނދާފައެވެ. މި ހާދިސާއާއި ގުޅޭގޮތުން ހިމަންދޫ ކައުންސިލްގެ ރައީސް ހުޝާމް އިސްމާޢިލް ވިދާޅުވީ، އެ ހަދިސާ ހިނގި ވަގުތު ރަށުތެރެއަށް ވަރަށް ބާރު އެއްޗެއް ގޮވި އަޑެއް އިވުނު ކަމަށެވެ.

މި ހާދިސާއާއި ގުޅިގެން ފުލުހުން ވިދާޅުވީ ހާދިސާ ރިޕޯޓްކޮށްފައިވަނީ 5:50 ގައި ކަމަށެވެ. އަދި ލޯންޗުގައި ރޯވި އަލިފާން ނިވާލީ އާންމުންނާއި ފުލުހުން އަދި ރަށު ކައުންސިލް ގުޅިގެން ކުރި މަސައްކަތުން ކަމަށް ފުލުހުން ވިދާޅުވިއެވެ. މި ހާދިސާ ހިނގި ވަގުތު ލޯންޗުގައި ކެޕްޓަންއާއި ދެ ކްރޫގެ އިތުރުން ކުޑަކުއްޖަކު ހުރި ކަމަށް ފުލުހުން ވިދާޅުވިއެވެ. ނަމަވެސް މިއިން އެއްވެސް މީހަކަށް ބޮޑު އަނިޔާއެއް ނުވާކަމަށް ފުލުހުން ވިދާޅުވިއެވެ.

ލޯންޗުގައި ފުރަތަމަ ރޯވިއިރު އަލިފާންގަނޑު ހިފާފައިވަނީ ލޯންޗުގެ ފަހަތުން އިންޖީނާ ދިމާލުން ކަމަށް މީސްމީޑިއާގައި ދައުރުވަމުންދާ ވީޑިއޯތަކުން ފެނެއެވެ. އަލިފާން ހިފި ވަގުތު ލޯންޗުގެ ފަހަތުން ތަންގަނޑެއް ފަޅައިގެން ގޮސް ހުއްޓާ ފެންނަ ކަމަށް، ކައުންސިލް ރައީސް ހުޝާމް ވިދާޅުވިއެވެ. ހިމަންދޫ ކައުންސިލުން ވިދާޅުވީ، ލޯންޗު އެއްކޮށް އަނދާ ފަޅުތެރެއަށް މިހާރު އަޑިއަށް ގޮސްފައިވާ ކަމަށެވެ.

މި ލޯންޗަކީ އެ އަތޮޅު ފެރިދޫ، މާޅޮސް އަދި ހިމަންދޫ އާއި މާލެ އާ ދެމެދު ދަތުރުކުރާ ފެރީ ލޯންޗެކެވެ. މި ހާދިސާއާއި ގުޅިގެން އެއްވެސް މީހަކަށް ބޮޑު އަނިޔާއެއް ލިބިފައިނުވާ ކަމަށް ހިމަންދޫ ކައުންސިލުން ވިދާޅުވެއެވެ.

މި ހާދިސާ ފުލުހުން ދަނީ އިތުރަށް ތަހުޤީޤު ކުރަމުންނެވެ.