ރައީސްގެ އިރުޝާދާއެކު ކީރިތި ޤުރުއާން ހިތުދަސްކުރުމުގެ މަޝްރޫޢުތައް ފުޅާކުރާނަން: ވަޒީރު ޑރ.ޝަހީމް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން ޤުރުއާން ހިތުދަސްކުރުމުގެ މަޝްރޫޢުތައް ފުޅާކުރައްވާނެކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

ޙާފިޡުން ދަސވެނިވުމުގެ ރަސްމިއްޔާތުގައި ވާހަކަފުޅުދައްކަވަމުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ވިދާޅުވީ ރާއްޖޭގެ ތާރީޚުގައި މިއަދު ލިޔެވިގެންމިދާ ޞަފްހާއަކީ ކުރިއަށް އޮތް ޖީލަށް އިސްލާމީ ހަޟާރަތާއި އިސްލާމީ އަޤީދާ ފޯރުކޮށްދޭނެ ވަރުގަދަ ވާހަކަތަކެއްކަމަށެވެ.

އެގޮތުން ރައީސްގެ އިރުޝާދުގެ ދަށުން އެމަޝްރޫޢުތައް ފުޅާކުރުމުގެ މަސައްކަތްތައް ކުރައްވަމުން ގެންދަވާކަމަށާއި ރާއްޖޭގައި އިސްލާމީ މަރުކަޒެއް ޤާއިމްކޮށްފައިވާ ކޮންމެ ރަށެއްގައި މި މަޝްރޫޢު އިތުރަށް ފުޅާކުރައްވާނެކަމަށް ވަޒީރު ވިދާޅުވިއެވެ. އަދި އިސްލާމީ މަރުކަޒު ޤާއިމްކޮށްފައި ނުވާ ރަށްރަށުގައިވެސް މިސްކިތްތަކުގައި މި މަޝްރޫޢު ކުރިއަށްގެންދާނެކަމަށް ވަޒީރު ވިދާޅުވިއެވެ. އަދި ސަރުކާރުގެ އިދާރާތައް ފިޔަވައި އަމިއްލަ ފަރާތްތަކުން ހިންގާ ޤުރުއާން ކްލާސްތަކުގައިވެސް ހިތުދަސްކުރުމުގެ މަޝްރޫޢުތަކަށް އެ ވުޒާރާއިން ހުރިހާ ގޮތަކުން އެހީތެެރިކަން ފޯރުކޮށްދެއްވާނެކަން ވަޒީރު ފާހަގަކުރެއްވިއެވެ. މިގޮތުން ވަޞީލަތްތަކާއި މާލީ އަދި އެހެނިހެން ގޮތްގޮތުންވެސް އެހީތެރިކަން ފޯރުކޮށްދެއްވާނެކަމަށް ވަޒީރު ވިދާޅުވިއެވެ.

"މިއަދު ދުނިޔެ މިވަނީ ކީރިތި ޤުރުއާނަށް ވަރަށް ބޮޑަށް ބޭނުންޖެހިފައި. ޒަމާނީ އަނދިރިކަމުގެ ޖާހިލިއްޔަތުން އިސްލާމްދީނުގެ ހިދާޔަތުގެ އަލިކަމުގެ ތެރެއަށް ދުނިޔެ ގެނައުމަށްޓަކައި އިޖުތިމާޢީ ޤޮތުންނާއި އަޚުލާޤު އާލާކޮށް ދިރުވުމަށްޓަކައި މިއަދު އިންސާނިއްޔަތު ކުރިއަށްވުރެ ބޮޑަށް ޤުރުއާނަށް ބޭނުންޖެހިފައިވަނީ. އެހެންކަމުން އެންމެން ގުޅިގެން މަސައްކަތް ކުރަންވީ ޤުރުއާންގެ ޖީލު އަލުން ތަރުބިއްޔަތުކޮށް ޤުރުއާނުގެ ޖީލު އަލުން އިޔާދަކުރުމަށް." އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވިއެވެ.

ވަޒީރު ޑރ. ޝަހީމް ވިދާޅުވީ އަމާޒަކީ ކޮންމެ އަހަރަކު 100 ހާފިޡުން ދަސްވެނިވާވަރަށް މި ހަރަކާތް ކުރިއަށްގެންދިޔުންކަމަށެވެ. މިއީ މި ޤައުމަށް ބޭނުން ޖެހިފައިވާކަމެއްކަން ފާހަގަކުރައްވާ ވަޒީރު ވިދާޅުވީ އިސްތިރާޖީ ވަރުގަދަ ޕްލޭންތަކެއްގެ ތެރެއިން މިކަންކަން ކުރިއަށްގެންދެވޭނެކަމަށެވެ. އަދި ސަރުކާރުން ކުރައްވާ މި މަސައްކަތްތަކަށް ރައްޔިތުންގެ ބައިވެރިވުން ބޭނުންވާކަމަށް ވަޒީރު ފާހަގަކުރެއްވިއެވެ. ކީރިތި ޤުރުއާން ހިތުދަސްކުރާ ފަރާތްތަކަށް ޚާއްސަ ޤައުނެއްވެސް ވަނީ ތައްޔާރުކޮށްފައެވެ. ވަޒީރު ވިދާޅުވީ ޤައުންއާއި ތާކިހާ ވަކި އުޞޫލެއްގެ ދަށުން މިލްކުކުރެވޭނެކަމަށެވެ.